‘Rri, Me bi Ru Eware Kpobi Fihọ Ekpokpọ’

Kọ o te were owhẹ re whẹ avọ ahwo uviuwou ra wha wo omokpokpọ jẹ rria bẹdẹ bẹdẹ? Kọ whọ gwọlọ rria akpọ nọ edada, uye-oruẹ, gbe uwhu o te jọ họ? Akpọ otiọye na yọ oware ewezẹ gheghe he. Evaọ uzẹme, akpọ ọkpokpọ okiẹrẹe nọ Ọghẹnẹ ọ ya eyaa riẹ na ọ kẹle no. Muẹrohọ oghẹrẹ nọ eyaa Ọghẹnẹ nana i ti ro rugba wọhọ epanọ a dhesẹ i rie evaọ obe Eviavia 21:3-5.—Sei.

‘Ọghẹnẹ o ve ti ririe irui kpobi no aro rai.’ (Eviavia 21:4) Oghẹrẹ irui vẹ Ọghẹnẹ o ti ririe no ahwo aro? Orọnikọ ame nọ ọ rẹ jọ ohwo ibiaro hayo irui oghọghọ nọ i re no ohwo aro ze he. Rekọ irui nọ Ọghẹnẹ o ti ririe no na họ enọ uye-oruẹ gbe uweri e rẹ wha ze. Orọnikọ Ọghẹnẹ o ti ririe irui na no ọvo ho, rekọ o ti si uye-oruẹ gbe uweri nọ e be wha ae ze na no.

‘Uwhu o gbẹ te jọ ofa ha.’ (Eviavia 21:4) Uwhu họ oware nọ o be mae wha oviẹ se ahwo nẹnẹ. Jihova o ti si uwhu no riẹriẹriẹ. Evaọ oghẹrẹ vẹ? O ti si uzedhe oware nọ o be wha uwhu ze na no, oye họ uzioraha nọ ma reuku riẹ mi Adamu. (Ahwo Rom 5:12) Jihova ọ te rọ ẹkwoma idhe ẹtanigbo Jesu ru ahwo-akpọ nọ a yoẹme kẹe te ẹgbagba.a Kẹsena ọ vẹ te “raha” uwhu nọ o rrọ ọwegrẹ mai na no bẹdẹ bẹdẹ. (1 Ahwo Kọrint 15:26) Ahwo-akpọ nọ a yoẹme a vẹ te rria bẹdẹ bẹdẹ avọ omokpokpọ wọhọ epanọ o rrọ ẹjiroro Ọghẹnẹ no emuhọ ze.

‘Edada e gbẹ te jọ họ.’ (Eviavia 21:4) Oghẹrẹ edada vẹ e gbẹ te jọ họ na? Edada kpobi nọ ahwo-akpọ a be reoja rai nọ uzioraha gbe sebaẹgba o wha ze, eye Ọghẹnẹ o ti sino riẹriẹriẹ.

Kẹle na, ma te rria akpọ nọ oviẹ, edada gbe uwhu o gbẹ te jọ họ. Rekọ whọ sae nọ inọ: ‘Kọ ogbẹrọnọ obọ odhiwu eware nana e te jọ via manikọ evaọ otọakpọ na?’ Orọnikọ obọ odhiwu hu. Muẹrohọ oware nọ ma rọ ta ere. Orọ ọsosuọ, oria Ebaibol na u muhọ nọ, ‘oria ẹria Ọghẹnẹ o rọ udevie ahwo,’ yọ mai ahwo-akpọ ma be rria otọakpọ na. (Eviavia 21:3) Orọ avivẹ, oria Ebaibol na o ta nọ, “uwhu o gbẹ te jọ ofa ha,” koyehọ akpọ nọ uwhu o jọ vẹre oye uwhu o gbẹ te jọ họ na. Ohwo ọvo ọ re jọ obọ odhiwu whu ẹdọvo ho, rekọ obọ otọakpọ obonẹ ọvo ahwo a bi jo whu. Fikiere, u re vevẹ inọ obọ otọakpọ obonẹ eyaa nana i ti jo rugba.

Jihova ọ gwọlọ nọ ma fievahọ eyaa akpọ ọkpokpọ nọ ọ ya na. Nọ ọ nwane ya eyaa na no, ọ tẹ kẹ omai imuẹro inọ: ‘Ri, me bi ru eware kpobi fihọ ekpokpọ.’ Kẹsena o te fibae nọ: “Eme nana kpobi eme uzẹme gbe ọtẹruo.” (Eviavia 21:5) Gbe wuhrẹ kpahe epanọ whẹ avọ ahwo uviuwou ra wha sae rọ jọ usu ahwo nọ a te ruẹ orugba eyaa Ọghẹnẹ nana.