Fikieme Ahwo A be rọ Lẹ?

Kọ whọ rẹ lẹ kẹse kẹse? Ahwo buobu a re ru ere, makọ ahwo nọ a rọwo Ọghẹnẹ dede he. Rekọ, fikieme ahwo a be rọ lẹ? Ekiakiẹ jọ nọ a ru evaọ obọ France, u dhesẹ nọ a tẹ ghale ahwo orẹwho na kpohọ abava, abọvo ahwo orẹwho na a rẹ lẹ hayo fọ kpoko roro didi evaọ okenọ a te wo ẹbẹbẹ ọvo.” Fikiere oware nọ o rẹ wọ ahwo France lẹ họ re awaruọ rai o kpotọ, orọnikọ re a gọ Ọghẹnẹ hẹ, yọ ere ahwo Europe buobu a re ru re. U te no ere no, amọfa a rẹ lẹ se Ọghẹnẹ evaọ okenọ a tẹ gwọlọ oware jọ ọvo. Yọ a re roro nọ epanọ a rọ nwane lẹ na, ere Ọghẹnẹ ọ te rọ nwane kuyo olẹ na.—Aizaya 26:16.

Kọ ẹvẹ kpahe owhẹ omara? Kọ who roro nọ okenọ ma te wo ẹbẹbẹ jọ ọvo ma rẹ rọ lẹ? Otẹrọnọ whọ ginẹ rọwo nọ Ọghẹnẹ ọ rrọ, kọ who roro nọ olẹ o sai fi obọ họ kẹ owhẹ? Manikọ who roro nọ Ọghẹnẹ o bi yo elẹ ra ha? Ebaibol na o ti fi obọ họ kẹ owhẹ riẹ nọ orọnikọ okenọ ma te wo ebẹbẹ ọvo ma rẹ rọ lẹ hẹ, rekọ olẹ u re fi obọ họ kẹ omai si kẹle Ọghẹnẹ.