UZOẸME UKE NA | OWARE NỌ UVIE ỌGHẸNẸ O SAI RU KẸ OWHẸ

Oghẹrẹ vẹ Uvie Ọghẹnẹ O te rọ Wha Eghale Se Owhẹ?

Whọ jọ izoẹme nọ e vrẹ na ruẹ nọ Isẹri Jihova a se Uvie Ọghẹnẹ gboja gaga. Yọ ma riẹ nọ eva e were owhẹ gaga nọ who se kpahe eghale nọ Uvie Ọghẹnẹ o te wha ze evaọ obaro. Rekọ whọ sai je roro nọ, kọ eware nana kpobi i ti gine rugba?

Orọnikọ oyena o nwani dhesẹ nọ whẹ yọ ohwo ogheghẹ hẹ nọ whọ gbẹ nwane rọwo eware yena evaọ oke ọsosuọ họ. (Itẹ 14:15) A rẹ sae rehọ uruemu ra na dhesẹ ọkpọ uruemu nọ ahwo obọ Bẹriaa a wo. Nọ a kaki yo usiuwoma Uvie na, a tẹ jẹe rehọ avọ oghọghọ, rekọ a nwane rọwo eme nọ a yo na kpobi hi. Ukpoye, a tẹ jẹ kiẹ Ikereakere na riwi “sọ epanọ a ta kẹ ae na ere eghinẹ rọ.” (Iruẹru Ikọ 17:11) Koyehọ ahwo Bẹria na a jẹ rọ eware nọ a yo na wawọ Ikereakere na sọ ginọ uzẹme. Uwhremu na, u te ti mu ae ẹro inọ emamọ usi nọ a yo na ginọ Ẹme nọ o no obọ Ọghẹnẹ ze.

Ma bi zizie owhẹ nọ who ru epọvo na re. Nọ who te bi wuhrẹ Ebaibol na kugbe Isẹri Jihova, whọ rẹ sae rehọ eware nọ Isẹri Jihova a rọwo kpahe Uvie Ọghẹnẹ rọ wawo oware nọ Ebaibol na o gine wuhrẹ.

U te no Uvie Ọghẹnẹ nọ who ti wuhrẹ kpahe no, whọ te jọ Ebaibol na ruẹ iyo enọ jọ nọ i wuzou gaga evaọ uzuazọ.

Bovẹ ma no ze?
Ẹjiroro vẹ ma rọ rrọ uzuazọ?
Fikieme Ọghẹnẹ ọ rọ kuvẹ kẹ uye-oruẹ?
Eme ọ rẹ via kẹ omai nọ ma te whu?
Kọ a te raha otọakpọ na?
Ẹvẹ uviuwou o sai ro wo evawere?

U te no ere no, who te wuhrẹ Ebaibol na u ti fiobọhọ kẹ owhẹ “bigba Ọghẹnẹ.” (Jemis 4:⁠8) Oghẹrẹ nọ who si kẹle Ọghẹnẹ te, ere eware nọ Uvie Ọghẹnẹ u ti ru kẹ owhẹ enẹna gbe evaọ obaro i ti mu owhẹ ẹro te. Nọ Jesu ọ jẹ lẹ se Ọsẹ obọ odhiwu riẹ, ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.”—⁠Jọn 17:⁠3.

Isẹri Jihova a sae rọ obe nana wuhrẹ Ebaibol na kugbe owhẹ.

Whọ tẹ gwọlọ nọ Isẹri Jihova a wuhrẹ Ebaibol na kugbe owhẹ, ta kẹ omọvo rai jọ hayo jọ oria Itanẹte www.jw.org/iso kere eme fihọ efọmo nọ ọ rrọ oria nana. (Rovie oria YARE UWUHRẸ EBAIBOL evaọ oria ọsosuọ na)

a Bẹria yọ okpẹwho nọ ọ jọ orẹwho Masidonia evaọ oke anwae.

Oware nọ O Lẹliẹ E Riẹ Rri Uvie Ọghẹnẹ Ghaghae

A jọ obọ isukulu ta kẹ ọmọ ikpe 10 jọ nọ a re se Folake inọ o kere kpahe uzoẹme na, “Oware nọ O Mae Were Omẹ Evaọ Akpọ Na.” Folake ọ tẹ salọ nọ o re kere kpahe oware nọ o be lẹliẹe ta kẹ ahwo kpahe Uvie Ọghẹnẹ.

Folake ọ ta nọ: “Uvie Ọghẹnẹ yọ egọmeti dẹẹ, rekọ a rẹ rue riẹ hẹ, whọ tẹ maki ku ẹno fihọ dede, whọ rẹ sae rue riẹ ghele he.”

Kẹsena Folake o te kere kpahe eghale Uvie na nọ o bi rẹro rai. Nọ ọ jẹ fodẹ ebẹbẹ jọ nọ Uvie na u ti kuhọ, o te kere nọ: “Oma o rẹ jọ omẹ ọkọkora nọ mẹ tẹ ruẹ ahwo nọ a wo iwou hu nọ a be rria otafe, gbe emọ eboba nọ ohọo u bi kpe whu evaọ eria sa-sa evaọ akpọ na. Rekọ eva e rẹ were omẹ nọ me te se obe Aizaya 65:21. Oria Ebaibol yena o ta kpahe ahwo nọ a te rria evaọ otọ Uvie Ọghẹnẹ inọ: ‘A rẹ te bọ iwou a vẹ ria ae tọ, a rẹ te kọ ọgbọ-evaene a vẹ re ibi riẹ.’”

Folake ọ tẹ jẹ ta nọ o bi rẹro okenọ Ọghẹnẹ ọ te rọ rehọ ẹkwoma Uvie riẹ si eyao kpobi no. Ọ jọ uzoẹme nọ o kere kpahe evaọ obọ Isukulu na fodẹ obe Eviavia 21:4, onọ o ta nọ Ọghẹnẹ o “ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.” Nọ o je ku ẹme riẹ họ, o kere nọ oware nọ o rẹ mae were iẹe evaọ akpọ na họ re ọ ta kpahe Jihova gbe Uvie riẹ. Uzẹme riẹ họ, ọmọ nana o rri Uvie Ọghẹnẹ ghaghae gaga!