UZOẸME UKE NA | WHỌ SAI SI KẸLE ỌGHẸNẸ
Edhere Uzuazọ Nọ O Woma Vi Ọnana, Ọ Rrọ Họ
Eme who re ru re whọ sai si kẹle Ọghẹnẹ? Ma ta kpahe eware buobu nọ whọ sai ru no re whọ sai wo emamọ usu kugbe Ọghẹnẹ. Eye họ:
Whọ rẹ riẹ odẹ Ọghẹnẹ je ru re amọfa a riẹ odẹ na, Jihova.
Who re lele iei ta ẹme ẹsikpobi ẹkwoma olẹ gbe Ẹme riẹ, Ebaibol na nọ who re wuhrẹ.
Who re ru eware nọ e rẹ were iẹe ẹsikpobi.
Who re si kẹle Ọghẹnẹ nọ who te bi ru re amọfa a riẹ odẹ riẹ, lẹ sei, wuhrẹ Ẹme riẹ, je ru eva were iẹe
Ro no eware nọ ma fodẹ na ze, kọ whọ sae ta nọ who bi ru oware kpobi nọ o gwọlọ re whọ sai si kẹle Ọghẹnẹ? Kọ u wo eria jọ nọ o gwọlọ nọ whọ rẹ gbẹ jọ daoma? Ma riẹ nọ onana o te gwọlọ omodawọ mi owhẹ, rekọ roro kpahe irere nọ i ti te owhẹ.
Aye jọ nọ a re se Jennifer nọ ọ be rria obọ America ọ ta nọ: “O tẹ make rọnọ o gwọlọ omodawọ mi omai re ma sai wo emamọ usu kugbe Ọghẹnẹ, yọ oware nọ u fo eruo. Usu nana o rẹ wha eghale buobu se omai, wọhọ oriruo, eva nọ ma fihọ Ọghẹnẹ e te ga viere, ma ti wo otoriẹ oghẹrẹ ohwo nọ Ọghẹnẹ ọ rrọ ziezi, maero na, ma ve ti you rie ziezi. Edhere uzuazọ nọ o woma vi ọnana, ọ rrọ họ!”
Otẹrọnọ whọ gwọlọ wo emamọ usu kugbe Ọghẹnẹ, o te were Isẹri Jihova re a fiobọhọ kẹ owhẹ. A rẹ sai wuhrẹ Ebaibol na kugbe owhẹ ọvọvẹ. Ma te je zizie owhẹ re who kpohọ obọ Ọgwa Uvie rai, oria nọ a rẹ jọ wuhrẹ Ebaibol na, whọ te jọ etẹe ruẹ ahwo nọ a wo emamọ usu kugbe Ọghẹnẹ.a Who te ru ere, o te jọ owhẹ oma wọhọ ọso-ilezi na nọ ọ ta nọ: “Uwoma kẹ omẹ re me sikẹle Ọghẹnẹ.”—Olezi 73:28.
a Re whọ sae yare uwuhrẹ Ebaibol hayo re whọ riẹ oria nọ Ọgwa Uvie nọ ọ kẹle owhẹ oma ọ rrọ, ta kẹ ohwo nọ ọ kẹ owhẹ emagazini nana hayo kpohọ Oria Evuẹ Itanẹte www.jw.org/iso mai, rri kpobọ otọ evaọ oria ọsosuọ na whọ te ruẹ oria nọ a kere fihọ nọ FONU HAYO KERE SE OMAI.