Kọ U Wo Ikọ-Odhiwu jọ nọ I Yoma?

Uyo onọ yena họ Ee, ikọ-odhiwu jọ e riẹ nọ i yoma. Kọ bovẹ a no ze? Kareghẹhọ nọ Ọghẹnẹ ọ ma ikọ-odhiwu evaọ oghẹrẹ nọ a sae rọ salọ oware nọ a gwọlọ ru. Nọ Ọghẹnẹ ọ nwane ma Adamu avọ Ivi no, ukọ-odhiwu ọgbagba jọ ọ tẹ rehọ uvẹ ẹsalọ nọ o wo na ruiruo thọthọ, jẹ wha ọkparesuọ ze evaọ otọakpọ. Kẹsena o te ru Adamu avọ Ivi ghẹmeeyo kẹ Ọghẹnẹ. (Emuhọ 3:​1-7; Eviavia 12:9) Ebaibol na ọ fodẹ odẹ ukọ-odhiwu nana hayo ọkwa nọ ọ jọ evaọ obọ odhiwu taure ọ tẹ te wọso Ọghẹnẹ hẹ. Rekọ nọ ọ wọso Ọghẹnẹ no, Ebaibol na o te sei Setan, onọ otofa riẹ o rrọ “ohwo ọwọsuọ” hayo Ẹdhọ, onọ otofa riẹ o rrọ “ohwo-ọtaraha.”​—Matiu 4:​8-11.

U yoma kẹhẹ inọ ọwọsuọ na ọ jọ etẹe kuhọ họ. Evaọ oke Noa, ikọ-odhiwu buobu nọ Ebaibol na ọ fodẹ unu rai hi, a tẹ “nyasiọ oria nọ u fo nọ a rẹ rria ba” evaọ obọ odhiwu. A tẹ ziọ obọ otọakpọ obonẹ je nwene oma zihe ruọ ahwo-akpọ, kẹsena a te je gbe-ọfariẹ jẹ rọ ere nyasiọ ẹjiroro nọ Ọghẹnẹ ọ rọ ma ae ba.​—Jud 6; Emuhọ 6:​1-4; 1 Pita 3:​19, 20.

Kọ eme ọ via kẹ ikọ-odhiwu iyoma yena? Okenọ Ọghẹnẹ ọ rọ ame raha akpọ na, a te nwene oma zihe ruọ ẹzi je zihe kpohọ obọ odhiwu. Rekọ Ọghẹnẹ ọ kẹ rai uvẹ re a zihe ziọ “oria rai” evaọ obọ odhiwu hu. Ukpoye, o le rai no odhiwu je gbolo ai fihọ “ebi ọlala” nọ a re se Tatarọs. (Jud 6; 2 Pita 2:4) Ikọ-odhiwu nana nọ i zihe ruọ idhivẹri no na a tẹ ruọ abọ Setan Ẹdhọ na, ọnọ ọ rrọ “osu idhivẹri na” nọ o bi ru “omariẹ wọhọ ukọ-odhiwu elo.”​—Matiu 12:24; 2 Ahwo Kọrint 11:14.

Ebaibol na o wuhrẹ omai nọ Ọghẹnẹ ọ rọ Uvie Mesaya na mu no evaọ obọ odhiwu evaọ ukpe 1914.a Nọ a nwane rọ Uvie na mu no, a te le Setan avọ idhivẹri riẹ no obọ odhiwu ziọ otọakpọ obonẹ. Emuemu gbe ọfariẹ-ogbe nọ ọ da akpọ na fia nẹnẹ na u dhesẹ nọ, idhivẹri na a be lẹliẹ ahwo buobu ru eware iyoma.​—Eviavia 12:​9-12.

Ofariẹ, emuemu nọ o bi dhe evievihọ kẹdẹ kẹdẹ gbe ozighi nọ ọ da oria kpobi fia na, yọ imuẹro nọ i dhesẹ nọ oke nọ u kiọkọ kẹ ae u tulo ho. Kẹle na, Ọghẹnẹ ọ te raha idhivẹri nana no. Nọ Uvie Ọghẹnẹ u te su akpọ na te odu ikpe (1,000) no, Ọghẹnẹ ọ vẹ te kẹ izi imuomu nana umuvẹ jọ re a dawo ahwo-akpọ. Kẹsena Ọghẹnẹ ọ ve te raha ai no riẹriẹriẹ.​—Matiu 25:41; Eviavia 20:​1-3, 7-10.