Kọ Whọ be Hae Daoma Rri Vrẹ Okafe?

OSẸRI JIHOVA jọ evaọ obọ Canada nọ a re se Don, ọ rẹ daoma ta usiuwoma kẹ ahwo nọ a be rria iyẹrẹ evaọ ẹkwotọ riẹ. Don ọ ta kpahe omọvo ahwo nana jọ inọ: “Ọzae jọ nọ o wo uwou hu nọ a re se Peter họ ohwo nọ ọ mai gbe nọ mẹ jọ iyẹrẹ na ruẹ no. Ọ jẹ hae tọtọ ahwo oma, yọ ọ rẹ tubẹ rọwo nọ a kẹle iẹe he. Ahwo a jẹ hae gwọlọ fiobọhọ kẹe ẹsibuobu rekọ ọ rẹ rọwo ho.” Ghele na, evaọ etoke ikpe ikpegbene, Don ọ rọ odiri fiobọhọ kẹ ọzae nana nọ o wo uwou hu na.

Ẹdẹjọ, Peter ọ tẹ nọ Don nọ: “Fikieme whọ jẹ be rọ fiki mẹ lahiẹ oma ra? Ahwo a re rri omẹ nyase ba. Fikieme whọ jẹ be daezọ mẹ?” Don ọ tẹ nabe rọ eria ikere esa kẹ Peter uyo na, yọ eria ikere nana i duobọte Peter gaga. Orọ ọsosuọ, Don ọ nọ Peter sọ ọ riẹ nọ Ọghẹnẹ o wo odẹ, kẹsena ọ tẹ vuẹe nọ jọ o se Olezi 83:18. Orọ avivẹ, Don ọ vuẹ Peter nọ jọ o se obe Ahwo Rom 10:​13, 14 re ọ riẹ ẹjiroro nọ ọ be rọ daezọ riẹ. Etẹe na o ta nọ, “ohwo kpobi nọ o bi se odẹ Jihova a re ti siwi ei.” Orọ urere, Don o se Matiu 9:​36, jẹ vuẹ Peter nọ jọ o sei kẹ omariẹ. Oria ikere yena o ta nọ: “Nọ [Jesu] ọ ruẹ ogbotu na, ohrọ rai o tẹ re iẹe keme a rrọ oyoya jẹ vahabọ wọhọ igodẹ nọ i wo othuru hu.” Nọ Peter o se eria ikere nana no, irui oviẹ i te su noi aro ze, kẹsena ọ tẹ nọ Don inọ: “Kọ mẹ rrọ usu igodẹ nana?”

Peter o te mu inwene họ eru. Ọ họ, ọ tẹ jẹ nabe nware etuagba riẹ, kẹsena o te ku emamọ iwu nọ Don ọ kẹ riẹ họ. No umuo oke yena vrẹ, Peter ọ tẹ jẹ hae rẹrote oma riẹ.

Peter o wo obe jọ nọ o re kere eware fihọ. Eware nọ o kere fihọ abọ emuhọ obe na i woma tere he, rekọ enọ o kere fihọ iẹe uwhremu na i wo ohẹriẹ gaga. Eware jọ nọ o kere họ: “Me wuhrẹ kpahe odẹ Ọghẹnẹ nẹnẹ. Obọnana, mẹ rẹ sae lẹ se Jihova. Eva e were omẹ gaga nọ mẹ rọ riẹ odẹ riẹ. Don ọ vuẹ omẹ nọ Jihova ọ rẹ sae jọ ogbẹnyusu mẹ, inọ ọ te gaviezọ kẹ omẹ oke kpobi nọ mẹ gwọlọ lẹ sei, makọ oware nọ mẹ gwọlọ vuẹe kẹhẹ.”

Inievo eva riẹ Peter o kere eme urere riẹ se, ọ ta nọ:

“Oma o be riẹ omẹ ru nẹnẹ na ha. Owho u te omẹ oma no. Rekọ o tẹ make rọnọ nẹnẹ me ti whu, mẹ riẹ nọ mẹ te wariẹ ruẹ [Don] ogbẹnyusu mẹ evaọ Aparadase. Obọnana nọ wha bi se obe nana, mẹ gbẹ riẹ hẹ. Wha tẹ jọ uwhori mẹ ruẹ ọzae jọ nọ ọ rrọ omoni hayo ogbẹnyusu mai hi, wha lele iei ta ẹme. Ivie, wha se omobe nana nọ uke riẹ o rrọ ekọlọ iburu na [ọ jẹ ta kpahe obe na, “Uzẹme nọ U re Suohwo kpo Uzuazọ Ebẹdẹbẹdẹ” nọ a kẹ riẹ ikpe jọ nọ i kpemu].a Obe na u dhesẹ nọ mẹ te wariẹ ruẹ ogbẹnyusu mẹ evaọ Aparadase. Me fi ẹrọwọ họ onana gaga. Mẹ yọ oniọvo rai, Peter.”

Nọ a ru uwhori Peter no, oniọvo ọmọtẹ riẹ nọ a re se Ummi ọ ta nọ: “Oware wọhọ ikpe ivẹ nọ i kpemu, mẹ avọ Peter ma ruẹro. Evaọ etoke ikpe buobu, oyena o jọ orọ ọsosuọ nọ mẹ rọ ruẹ nọ eva e be were iẹe. Ọ tubẹ hwẹ dede.” Ummi ọ ta kẹ Don nọ: “Me ti se obe na keme oware nọ o sai duobọte oniọvo mẹ udu, o te jọ obọdẹ oware.” Ummi ọ tẹ jẹ rọwo nọ Osẹri Jihova jọ ọ hae rọ obe Eme Ebaibol na O Gine Wuhrẹ? na wuhrẹ iẹe.

Mai omamai ma rẹ sai rri vrẹ oghẹrẹ nọ ahwo a rrọ evaọ okafe, dhesẹ uvi uyoyou kẹ ae, jẹ rọ ithihakọ fiobọhọ kẹ oghẹrẹ ahwo kpobi. (1 Tim. 2:​3, 4) Ma te ru ere, ẹsejọhọ ma te sai fiobọhọ kẹ ahwo wọhọ Peter, enọ i siuru hu evaọ aro ahwo rekinọ a wo emamọ eva. Jọ u mu omai ẹro inọ Jihova nọ ọ rẹ ruẹ “obọ eva” na, o ti ru ubi uzẹme nọ ma kọ dhẹ evaọ idu ahwo nọ a wo evezi.​—1 Sam. 16:7; Jọn 6:44.