Kọ Whọ Kareghẹhọ?
Kọ whọ romatotọ se uvitha Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:
Re esẹgbini nọ okpẹtu o le no ẹkwotọ rai a sai fiobọhọ kẹ emọ kruga evaọ egagọ Jihova, fikieme u ro fo re a roro kpahe ẹvẹrẹ?
Emọ na a rẹ sai wuhrẹ ẹvẹrẹ ẹkwotọ nọ wha kpohọ na evaọ obọ isukulu hayo okegbe rai. U re woma gaga re ọmọ ọ riẹ vi ẹvẹrẹ ọvo. U fo nọ esẹgbini a re roro kpahe ukoko ẹvẹrẹ nọ emọ rai a te jọ wo otoriẹ uzẹme na je wo ẹnyaharo ziezi, sọ ukoko ẹvẹrẹ rai hayo orọ ẹvẹrẹ ẹkwotọ nọ a kwa nya na. Esẹgbini Ileleikristi a rẹ rọ ẹgwọlọ emọ rai karo evaọ ẹme nana.—w17.05, ẹwẹ. 9-11.
“Eware” vẹ Jesu o wo họ iroro okenọ ọ nọ Pita nọ: “Kọ who you omẹ vi eware nana?” (Jọn 21:15)
O wọhọ nọ Jesu ọ jẹ ta kpahe iyei nọ e jọ etẹe hayo okọ iyei-ikpe na. Nọ Jesu o whu no, Pita o zihe kpohọ okọ iyei-ikpe riẹ. O gwọlọ nọ Oleleikristi o re roro kpahe oware nọ ọ rẹ rọ karo evaọ uzuazọ riẹ.—w17.05, ẹwẹ. 22-23.
Fikieme Abraham ọ rọ vuẹ aye riẹ inọ ọ ta nọ oniọvo riẹ ọ rrọ? (Emu. 12:10-13)
Uzẹme riẹ họ, ọsẹ ọvona o yẹ Sera avọ Abraham rekọ ọvuọ oni riẹ. Orọnọ Sera ọ ta nọ Abraham yọ ọzae riẹ, a hai ti kpe Abraham no, yọ ọ hai ti gbe yẹ ọmọ nọ Ọghẹnẹ ọ ya eyaa riẹ kẹe na ha.—wp17.3, ẹwẹ. 14-15.
Oware areghẹ vẹ Elias Hutter o ru re ọ sai fiobọhọ kẹ ahwo nọ a gwọlọ wuhrẹ ẹvẹrẹ Hibru?
Ọ gwọlọ nọ emọ isukulu riẹ a vuhu ohẹriẹ nọ o rrọ uzedhe eme Hibru gbe eme-ofiba nọ e rẹ jọ obọ emuhọ gbe ekuhọ eme Hibru evaọ Ebaibol na. Re ọ sai ru onana, o te printi uzedhe eme Hibru mu gbalọ, rekọ eme nọ a fiba obọ emuhọ gbe obọ ekuhọ eme na o te printi rai wọhọ eme gheghe. Ọkpọ oware ovona a ru evaọ eme-obotọ Ebaibol New World Translation of the Holy Scriptures—With References na.—wp17.4, ẹwẹ. 11-12.
Eme Oleleikristi o re roro kpahe nọ ọ tẹ gwọlọ riẹ sọ u fo re o wo ugbeke nọ ọ rẹ rọ thọ omariẹ no obọ ahwo oyoma?
Eware jọ họ: Ọghẹnẹ o rri uzuazọ ghaghae. Jesu ọ ta kẹ ilele riẹ nọ a du wo ọgbọdọ nọ a rẹ rọ thọ oma ha. (Luk 22:36, 38) Mai Ileleikristi ma re duwu egbọdọ mai zihe ruọ etẹkpẹ. Uzuazọ o ghare vi ekwakwa eyero-akpọ. Ma rẹ rọ adhẹẹ kẹ obruoziẹ-iroro amọfa, yọ ma rẹ jọ emamọ oriruo kẹ amọfa. (2 Kọr. 4:2)—w17.07, ẹwẹ. 31-32.
Fikieme iku nọ Matiu avọ Luk a gbe kpahe emuhọ uzuazọ Jesu i ro wo ohẹriẹ nọ ohwohwo?
Matiu ọ tẹrovi Josẹf, wọhọ oriruo oghẹrẹ nọ o jariẹ oma nọ Meri ọ ta kẹe nọ o dihọ no, gbe okenọ ukọ-odhiwu ọ ta kẹe nọ jọ a dhẹ kpobọ Ijipti re a jọ obei etoke jọ. Luk ọ tẹrovi Meri; wọhọ oriruo, okenọ o weze bru Ẹlizabẹt gbe oware nọ Meri o ru okenọ Jesu ọ daji obọ etẹmpol.—w17.08, ẹwẹ. 32.
Eware vẹ e via kpahe Ebaibol na rekiyọ ọ gbẹ riẹ ghele?
Otofa eme nọ a ro kere Ebaibol na i bi dhe enwenwene nọ oke o be nyaharo na. Enwene nọ ọ romavia no evaọ ofẹ isuẹsu u ru nọ ẹvẹrẹ nọ ahwo buobu a be jẹ u bi ro nwene. A mukpahe ahwo nọ a jẹ fa Ebaibol na fihọ evẹrẹ nọ ahwo a be mae jẹ.—w17.09, ẹwẹ. 19-21.
Kọ Mai Omomọvo Ma Wo Ukọ-Odhiwu nọ Ọ be Thọ Omai?
Ijo. Jesu ọ ta kpahe ikọ-odhiwu erọ ilele riẹ nọ i bi rri ovao Ọghẹnẹ. (Mat. 18:10) Orọnikọ Jesu ọ be jọ oria Ebaibol nana ta nọ mai omomọvo ma wo ukọ-odhiwu nọ ọ be thọ omai hi, ukpoye ọ be ta nọ ikọ-odhiwu na a bi muẹrohọ ilele riẹ omomọvo.—wp17.5, ẹwẹ. 5.
Oghẹrẹ uyoyou vẹ o mae rro kpaobọ?
Uyoyou a·gaʹpe họ onọ o mae rro kpaobọ keme ehri-izi e rẹ wọ ohwo dhesẹ iẹe. Ohwo nọ o wo uyoyou utiona o re wo ọdawẹ jẹ whẹtiẹ ahwo homa. Rekọ oware nọ a mai ro vuhu iei họ ewoma nọ o rẹ wọ ohwo ru kẹ amọfa ababọ oriobọ.—w17.10, ẹwẹ. 7.