Kọ Whọ Riẹ Oria nọ Oke O Rrọ?

EME who re ru nọ whọ tẹ gwọlọ riẹ oria nọ oke o rrọ? Ẹsejọhọ who ti rri oke nọ whọ gba fihọ obọ hayo ughọjọ nọ o rrọ ugbẹhẹ. Ohwo jọ ọ tẹ nọ owhẹ oria nọ oke na o rrọ, ẹvẹ whọ te rọ vuẹe? U wo idhere buobu nọ a sai ro se oke.

Ma rehọ iẹe nọ oke o rrọ ughọjọ ọvo gbe ubro. Whọ sai se kẹe inọ 1:30. Whọ rẹ sai je se kẹe nọ 13:30 otẹrọnọ enẹ a rẹ jọ oborai se oke. Orọ uwhremu nana yọ orọ ahwo nọ a re rri euwa udhegbene nọ e rrọ okpẹdẹ na ro kele oke rai. U tube wo ahwo jọ nọ a rẹ jọ oborai se oke ovo nana “ivẹ ubro,” otọ riẹ họ iminiti ọgba i no rie re o gba ighọjọ ivẹ.

Nọ who te bi se Ebaibol na ẹsejọhọ whọ te hai nọ omara nọ, ‘Ẹvẹ ahwo a jẹ hai tube ro se oke evaọ okenọ a ro kere Ebaibol na?’ Orọnikọ edhere ọvo jọ a jẹ hai ro ru onana ha. A jọ Ikereakere Hibru na fodẹ “irioke,” “ọre-ote-uzou,” “uvo,” “udevieuvo,” gbe “owọwọ.” (Emu. 8:11; 19:27; 43:16; Izie. 28:29; 1 Iv. 18:26) Rekọ u wo okejọ nọ a jọ Ebaibol na fodẹ ugogo oria nọ oke o jọ dẹẹ.

Evaọ oke ahwo nọ a gbiku rai fihọ Ebaibol na, a jẹ hae rọ iroroke mu, maero kọ evaọ aso. Yọ taure a te ti yẹ Jesu, ahwo Izrẹl a ghale oke aso fihọ abasa nọ a jẹ hai se irou hayo irroro. (Enu. 2:19) A jọ obe Ibruoziẹ 7:19 fodẹ “ohẹrẹ-oke udevie aso.” Evaọ oke Jesu, ahwo Griki gbe Rom a tẹ te ghale oke aso nọ a re ro rou hayo rroro na kpohọ abane.

A jọ ebe Usiuwoma na fodẹ oke irou nana unuẹse buobu. Wọhọ oriruo, “etoke iroi avọ ene” Jesu ọ rọ jọ ehru ame nya bru ilele riẹ nọ e jọ evaọ okọ na. (Mat. 14:25) Evaọ ọtadhesẹ riẹ jọ, Jesu ọ ta nọ: “Eva e were erigbo . . . nọ Olori rai ọ nyaze di họ bi rou! Uzẹme mẹ be ta kẹ owhai, o ti ku ewu iruo họ ọ vẹ ta kẹ ae nọ a keria re a re emu, ọ vẹ gbodibo kẹ ae. Yọ otẹrọnọ ọ nyaze evaọ etoke iroi avọ ivẹ, hayo makọ ọrọ avọ esa o je di ae họ nọ a ruẹrẹ oma kpahe, eva e rẹ were ai!”​—Luk 12:37, 38.

Abọ ene irou na kpobi Jesu o wohọ iroro nọ ọ ta kẹ ilele riẹ nọ: “Wha ruabọhọ erou, keme wha riẹ okenọ ọnọ o wo uwou na ọ te nyaze he, sọ owọwọ hayo udevie aso hayo okenọ ọkpa ọsosuọ o re ro bo hayo irioke.” (Mak 13:35) “Owọwọ” họ oke irou ọsosuọ na, yọ oke nana u re muhọ nọ ọre o te kiediwi no rite oware wọhọ ighọjọ izii. “Udevie aso” họ oke irou avọ ivẹ, yọ u re muhọ no oware wọhọ ighọjọ izii rite udevie aso. Oke irou avọ esa họ “okenọ ọkpa ọsosuọ o re ro bo” koyehọ taure oke u te ti rie, yọ u re muhọ no udevie aso rite oware wọhọ ighọjọ esa taure oke u te rie. O sae jọnọ oke irou nana ọkpa o ro gine bo evaọ aso nọ a ro mu Jesu na. (Mak 14:72) “Irioke” họ oke irou avọ ene, yọ u re muhọ no oware wọhọ ighọjọ esa rite okenọ ọre ọ rẹ rọ va ze.

Fikiere, dede nọ ighọjọ sa-sa nọ ma bi ro rri oke nẹnẹ e jariẹ evaọ oke ahwo nọ a kere Ebaibol na ha, u wo oghẹrẹ nọ a jẹ hai ro rri oke taso tuvo.