Ẹnyate Ẹgwọlọ Ivuẹvu na Avọ Oghọghọ
1 Ẹhẹ, onana họ oke ivuẹvu na. Enẹna ma rọ ekuhọ eyero-akpọ na, yọ wọhọ epanọ Jesu ọ ta evaọ ọtadhesẹ riẹ jọ, “[Ivuẹvu] na họ urere akpọ na.” (Mat. 13:39) Eva Jọn 5:17, Jesu ọ ta nọ: “Ọsẹ mẹ o gbe bi ru iruo rite enẹna, me te je bi ru re.” Evaọ iruo oke ivuẹvu ọnana, ahwo Jihova a bi ruiruo gaga orọnikọ evaọ ẹta usiuwoma Uvie na ọvo ho rekọ te ebabọ eria egagọ. Enẹna vi epaọ anwẹdẹ kpobi, ma gwọlọ Egwa Uvie. Iyẹrẹ nọ i no obọ esẹro okogho ze kẹle na i dhesẹ nọ bu vi Egwa Uvie 2,000 a be bọ, yọ a bọ ejọ te ikpe buobu no. Bu vi ikoko 300 i bi ru iwuhrẹ evaọ iwou nọ a haya. A daoma bọ Egwa Uvie 400 re no rekọ a te rehọ ai mudhe he. Avọ uyere, Jihova ọ kpakpa idibo omarokpotọ riẹ no re a siobọno ona-iruo rai evaọ ebabọ Egwa Uvie. Orọnikọ a bi ruiruo gaga ọvo ho rekọ a bi dhesẹ ẹzi oghọghọ re.
2 Enẹna o rọ wọhọ epanọ o jọ evaọ edẹ Nehemaya nọ emọ Izrẹl a je ruiruo gaga bọ ugbẹhẹ Jerusalẹm. Nehemaya 4:6 o ta nọ “ẹzi iruo ọ jọ ahwo na oma.” Eme họ edidi emamọ udu utioye na? A jọ obaro fodẹ iẹe eva Nehemaya 8:10 nọ: “Keme evawere ỌNOWO na họ ogaga rai.” Ma ghine wo uvi iroro nọ ma rẹ rọ jọ iruiruo oghọghọ. Ma wo oghale Jihova. Ma wo ẹzi Jihova, yọ oghọghọ o rọ usu ubi ẹzi oyena.—Gal. 5:22.
3 Kake Nyabru Ogbẹgwae Ebabọ Ubrotọ: Okenọ ikoko a tẹ be j’iroro oma ọ ẹruẹrẹ hayo ebabọ ekpokpọ, ekpako ukoko na a rẹ nyabru Ogbẹgwae Ebabọ Ubrotọ na evaọ oke emuhọ iruo na. Society ọ kẹ Egbẹgwae Ebabọ Ubrotọ na ọkpọvio no, yọ inievo enana a wo eriariẹ gaga nọ i ti fiobọhọ evaọ awhaha egbefẹ evaọ okenọ wha tẹ be dẹ otọ jẹ be j’iroro ebabọ. Wha tẹ vuẹ ai ziezi kpahe ebabọ kpobi nọ e rọ oria nọ a dhe kẹ ai, ogbẹgwae ubrotọ na a sae ruẹrẹ iruiruo họ re a ku iruo na họ ababọ uye nọ a rẹ rọ bẹ iruiruo nọ i wo ona na.
4 Egbẹgwae Ebabọ Ubrotọ na a bi dhesẹ uyoyou omolahiẹ gaga evaọ idhere buobu, wọhọ ugbothabọ nọ a re kpohọ weze bru ikoko nọ i zizie i rai. Ekpako na a re dhesẹ ovuhumuo kẹ omodawọ rai ẹkwoma uwou nọ a rẹ jọ evaọ ẹdẹ nọ a fihọ na re a keria t’ẹme. Ekpako na a rẹ kareghẹhọ inọ ohrẹ nọ Ogbẹgwae Ebabọ Ubrotọ a be kẹ i no ọkpọvio nọ a kẹ rai ze. Fikiere a re muẹro h’otọ gaga kẹ ohrẹ nọ ogbẹgwae na ọ kẹ rai.
5 Ikoko jọ a j’iroro no nọ a rẹ bọ Ọgwa Uvie rai ababọ Ogbẹgwae Ebabọ Ubrotọ na nọ a rẹ nyabru keme a roro nọ ẹjiroro nọ ogbẹgwae na ọ kẹ o gwọlọ araha-igho bu hrọ. Efa e dẹ otọ no ababọ Ogbẹgwae Ebabọ Ubrotọ na nọ a vuẹ rọkẹ ọkiẹriwi fikiere a tẹ dẹ otọ fihọ oria nọ ame o re ku hayo a dẹ otọ nọ o kawo hrọ. Ikoko a rẹ rọ areghẹ wo erere no ẹromuhọ ekpako nọ a ro mu re i ruiruo evaọ Ogbẹgwae Ebabọ Ubrotọ na ẹkwoma ẹnyabru ahwo nana evaọ oke emuhọ, taure a tẹ te dẹ otọ.—Itẹ 15:22.
6 Amọfa A bi Muẹrohọ: Pọl ukọ na ọ ta nọ: “Ma wọhọ ughẹgbe rọ kẹ akpọ na no, rọ kẹ ikọ-odhiwu gbe ahwo.” (1 Kọr. 4:9) A rehọ Ileleikristi inẹnẹ ro dhe eki, yọ onana o mae rọ uzẹme evaọ etoke ebabọ Ọgwa Uvie. Ahwo a bi muẹrohọ iruo nọ a bi ru na gbe ẹzi oghọghọ iruiruo na. Fikiere, iriughe a dhesẹ iroro rai via no evaọ idhere sa-sa. Evaọ Ozubulu, Anambra State, nọ o muẹrohọ ahwo sa-sa nọ e be jọ otọ na ruiruo no, aye jọ nọ ọ be jọ ekẹloma zẹ akara ọ tẹ nọ oria nọ iruiruo na i no ze. A tẹ ta kẹe nọ a no ikpewho sa-sa ze evaọ ubrotọ oyena. Okugbe nọ ọ rọ udevie Isẹri na u te gbei unu ọ tẹ ta nọ: “Ro no oware nọ mẹ be ruẹ ze, akpọ ọkpokpọ nọ wha be ta kpahe na o ghinẹ rọ uzẹme.”
7 Okenọ inievo na a je ruiruo ẹdẹjọ evaọ Ọgwa Uvie jọ, ohwo jọ nọ ọ be nyavrẹ o te bikẹle ọ tẹ ta nọ: ‘Dede nọ mẹ rọ Osẹri hi, iruo rai i si omẹ urru. Ugho o gbẹ rọ omẹ obọ họ rekọ ziọ uwou mẹ evaọ Ẹdẹ-Ọmaha re wha rehọ unevaze ₦5,000 mẹ rọkẹ uketha iruo na.’ O te ghine ru azọhọ nọ ọ yaa na. Evaọ oria ebabọ ovo oyena aye-uku jọ ọ tẹ nyaze, nọ o dhesẹ evawere riẹ no, ọ tẹ kẹ ₦20. Ogbẹgwae Ebabọ Ubrotọ jọ a dhesẹ oghọghọ rai fikinọ ahwo na a lele oma iruo rai dede nọ o jọ oke iso. A n’iyẹrẹ nọ: ‘Okenọ a je ruiruo ebabọ na, ohwo jọ ọ tẹ ta nọ, nọ orọnọ ma be kẹle oke iso no na, j’oma va iruo na bẹsenọ oke ivo i re muhọ. Rekọ, ma tẹ gbẹ ruabọhọ iruo na. Avọ evawere, evaọ edẹ iruo nọ ma fihọ na kpobi, oso ọ rọ họ. U kri hi ahwo ẹwho na a te muhọ ẹta nọ: “Otẹrọnọ ohwo jọ o wo ehaa nọ ọ gwọlọ ru, jọ o fi ei họ ẹdẹ nọ Isẹri Jihova a te jọ ọgwa rai ruiruo, keme oso ọ te rọ họ.” ’
8 Ukoko jọ evaọ Calabar a ruẹ ẹgwọlọ nọ a rẹ rọ bọ Ọgwa Uvie ologbo. Ohwo nọ o wo ẹtighẹ nọ a ruẹ na ọ tẹ rọwo inọ ọ rẹ zẹ otọ na ₦280,000. Taure inievo na a tẹ te dhẹ koko ugho na họ, ọthueki jọ ọ tẹ ta nọ ọ rẹ hwa ₦300,000 fihọ otọ ovo na. Rekọ ohwo nọ o wo ẹtighẹ na o te lele aye riẹ j’iroro ẹme na: “O rẹ mai woma re ma ru ohwo na oma vo ukpenọ ma re ru Ọghẹnẹ oma vo.” Ọ tẹ se unuigho ubuobu na yọ uwhremu na o te bru unuigho na kpotọ no ₦280,000 kpohọ ₦180,000 kẹ ukoko na. Ọ ta nọ: “Jọ ₦100,000 o jọ ẹkẹ azọhọ mẹ kẹ ebabọ na.”
9 Obufihọ Uyoyou Unevaze: Iruiruo eriariẹ buobu a bi siobọno oke gbe eriariẹ rai re a ro fiobọhọ evaọ ẹdẹ otọ, oma uwou, ebabọ gbe ona eware ikuo, ẹwhẹhọ-erru, ẹruẹrẹ otọ, ẹruorote otọ na, edadẹ, emuore, awhaha ẹji, gbe eware efa. Inievo i bi siobọno ekwakwa rai ze re a ro ruiruo. Ẹvẹ onana o rẹ wha evawere se Ọsẹ mai te, Jihova, nọ ọ tẹ rue rai nọ a be rehọ ekwakwa gbe ẹgba rai ruiruo evaọ edhere oyoyou otiọye!—Wawo 1 Ahwo Tẹsalonika 2:6-9 gbe 2 Ahwo Tẹsalonika 3:8b.
10 Nọ ikoko i bi dhe evievi họ na, ẹgwọlọ ọ riẹ kẹ Egwa Uvie efa. O gwọlọ ugho gbe iruiruo efa re ma nyate ẹgwọlọ ọnana. Evaọ ukpe iruo nọ o vrẹ na, unu ikoko nọ e rọ Nigeria e rehọ 203 bu vi erọ ukpe ọdekọ, yọ ma gwọlọ Egwa Uvie efa re e gba ikoko ekpokpọ enana.
11 Nọ inievo buobu i gbe bi fiobọhọ evaọ ebabọ Ọgwa Uvie na, be rehọ oke gbe ẹgba rai kẹ ọvọvẹ na, use o rọ kẹ obufihọ wọhọ epanọ ẹgwọlọ iruiruo o rọ kẹ iruo ivuẹvu na. (Mat. 9:37, 38) Egbẹgwae ubrotọ buobu a n’iyẹrẹ nnọ re a wo iruiruo unevaze efa kẹ ebabọ Ọgwa Uvie o rẹ lẹliẹ iruo na vori ahwo nọ a wọ owha-iruo ọnana fihọ uzou anwẹdẹ oma.—Aiz. 6:8; Gal. 6:2.
12 Ohwo nọ O Te: Okenọ a tẹ gwọlọ bọ Ọgwa Uvie ọkpokpọ, ahwo unevaze a re no ukoko hayo ikoko nọ e te jọ ọgwa ọkpokpọ hayo onọ a be ruẹrẹ na ru iwuhrẹ gbe ikoko ekẹloma ze. A vẹ jọ enẹ wuhrẹ ejọ rai re evaọ obaro a ve te wọhọ iruiruo eriariẹ hayo erọ ona re a sae fi efọmo ọ Kingdom Hall Construction Worker Questionnaires họ.
13 Uzedhe ahwo nọ Egbẹgwae Ebabọ Ubrotọ na a gwọlọ kamara kamara họ enọ i wo eriariẹ evaọ iruo ebabọ gbe enọ e fialoma ze re a fiobọhọ evaọ ebabọ Ọgwa Uvie nọ a gwọlọ. Ahwo nana a re wo emamọ edikihẹ evaọ ukoko na, ekpako ukoko rai a ve je kuenu kẹ ae. Otẹrọnọ who te, kọ whọ sae ruẹrẹ iruẹru ra họ re who fiobọhọ evaọ abọ iruo Jihova ọnana? (Neh. 4:6) Otẹrọ ere, mi ọsẹro ukoko hayo okere-obe ra efọmo Kingdom Hall Construction Worker Questionnaire re who vi ei vẹrẹ.
14 Ofariẹ, ma wo inievo nọ e kpako no evaọ abọ-ẹzi nọ e rọ ekpako hayo idibo iruiruo gbe enọ e rẹ sae sẹro iruo. Dede nọ a riẹ kpahe ebabọ tere he, enana e sai fi obe họ re. Ahwo itienana a rẹ sai fiobọhọ evaọ eko-iruo nọ a rẹ jọ bọ ebabọ họ. A bi wuhrẹ amọfa re a rehọ ai ruiruo viere evaọ obaro. A tudu họ ekpako gbe idibo iruiruo awọ re a roro ẹme na ziezi sọ a sae fialoma rai ze kẹ iruo nana nọ o rẹ wha ujiro se Ọsẹ mai na, Jihova.—Wawo 1 Samuẹle 3:8; Matiu 4:20.
15 Ahwo Kpobi A rẹ Sai Wo Abọ: Ahwo kpobi a rẹ sai dhesẹ emamọ ẹzi kẹ iruo enana nọ e r’oja na ẹkwoma ẹrehọ oria iruo enọ i kpohọ iruo ebabọ Ọgwa Uvie evaọ urere oka. Ababọ avro ọvuọvo mai ọ gwọlọ rehọ edhere ọvuọvo ta oyẹlẹ họ iruiruo unevaze enana oma ha ẹkwoma edhesẹ nnọ iruo ebabọ Ọgwa Uvie na o rọ iruo efuafo ho. (Itẹ 24:10; Hib. 6:10) Dede na, o gwọlọ owowa, yọ oye jabọ nọ Egbẹgwae Ebabọ Ubrotọ na a jẹ be ruẹrẹ eware họ ziezi na re iruiruo unevaze a gbe mu no ukoko rai hi.
16 O tẹ make rọnọ uvẹ o rọ k’omai re ma fialoma ze evaọ uzedhe iruo ebabọ na ha, abọ obọdẹ iruo enana jọ o riẹ nọ mai kpobi a sae jọ w’abọ. Didi oware? “Eyero” mai nọ ma rẹ rọ kẹ Jihova orro. (Itẹ 3:9) Ma rẹ sai wo evaifihọ inọ o be were Jihova eva gaga okenọ ma tẹ rọ uyoyou rọ ugho tha ebabọ Ọgwa Uvie efa uke. Unevaze fihọ Ẹkpa-Ugho Ọgwa Uvie Society na u kiehọ gaga, yọ nọ ikoko buobu e be roma via na, ẹgwọlọ kẹ iwou ekpokpọ gbe enọ a be ruẹrẹ o gbẹ rọ otọ. (Iruẹru 20:35; 2 Kọr. 9:6, 7) Evaọ ikpe-udhusoi ọsosuọ na, okenọ ẹgwọlọ ọ roma via, Pọl ukọ na ọ tẹ tudu họ ahwo Kọrint awọ nọ: “Whaọ epanọ wha rọ aro eware kpobi na—eva orọwọ, eva ẹmeọta, eva eriariẹ, eva oriori kpobi, gbe eva uyoyou rai kẹ omai—wha jọ iruo aruoriwo nana kparo u re.”—2 Kọr. 8:7.
17 Irere Ilogbo: Evaọ uzẹme, Jihova o bi fiobọhọ k’omai gaga re ma bọ iwou egagọ kẹ ujiro riẹ. Uyoyou omolahiẹ họ onọ o be wọ inievo na. Nwanọ onana họ oghẹrẹ uyoyou nọ Jesu ọ ta nọ a ti ro vuhu uvi ilele riẹ. (Jọn 13:34, 35) Wọhọ epanọ Jesu o fi isiuru amọfa họ aro eriẹ na, ere a bi ru. Imuẹro e riẹ inọ, unevaze gbe ẹvi ona-iruo ọ idibo Jihova na i ti w’iruo avọ erere bu viere evaọ akpọ ọkpokpọ Ọghẹnẹ.
18 Ẹhẹ, enọ i bi w’abọ evaọ ebabọ iwou kẹ egagọ Jihova na a ruẹ orugba Olezi 127:1 no. Dede nọ iruiruo ona a bi siobọno oke gbe ẹgba rai evaọ ebabọ ovẹrẹ ọrọ Egwa Uvie iwoma na, oghale Jihova họ onọ o be wha obokparọ ze. Nẹnẹ, ma gwọlọ Egwa Uvie bu viere. Anwẹnọ u ro muhọ na, Ẹkpa-Ugho Ọgwa Uvie Society na u fiobọhọ kẹ ikoko buobu no evaọ ebabọ Ọgwa Uvie. J’omai kpobi ma gbẹ rehọ oke gbe “eyero” mai kẹ ọvọvẹ nọ ma bi rẹro oghale Jihova evaọ omodawọ mai na.—Itẹ 3:9.