Ọjọriẹ Ehaa Ekareghẹhọ

Enana họ eware nọ o gwọlọ nọ a rẹ rẹro te taure ehaa Ekareghẹhọ na u te ti te evaọ Edivẹ-Oka, April 2:

◼ Ahwo kpobi, kugbe ọnọ ọ te kẹ ovuẹ na, a rẹ riẹ uzedhe oke gbe oria ehaa na.

◼ A re wo oghẹrẹ ibrẹdi gbe udi nọ a gwọlọ na te obọ no a vẹ jẹ ruẹ rai họ.—Rri Uwou-Eroro, February 15, 1985, ẹwẹ-obe 19 (ọrọ Oyibo).

◼ A rẹ kake wha emẹjẹ nọ o kiehọ, ohọ-emẹjẹ, imidhe, gbe egalase ze ọgwa na a vẹ jẹ ruẹ rai họ oria rai.

◼ A re ru Ọgwa Uvie na hayo oria ọfa nọ a ti kokohọ fo tẹtẹtẹ evaọ ẹruoke.

◼ Eruẹrẹahwohọ gbe enọ e te wọ emu na a rẹ kake salọ ae jẹ kẹ ae uthubro kpahe oghẹrẹ nọ a re ru gbe ẹkẹ-iruo rai.

◼ A re ru ọruẹrẹfihọ re a wọ ibrẹdi gbe udi se ọnọ a kẹ ẹzi kpobi nọ oma riẹ o ga ha nọ ọ sae nyaze he.

◼ Okenọ a tẹ ma-oma ehaa nọ o vrẹ ọvo evaọ Ọgwa Uvie ọvo na, emamọ ọruẹrẹfihọ ọ rẹ ja riẹ evaọ udevie ikoko na re a siọ ahwo ba ẹkeke evaọ oria ohẹrẹ, unuẹthẹ, iyẹrẹ, gbe oria imoto.