Okuomagbe kẹ Usiuwoma Ota
1 Odibọgba Uvie Mai (ọrọ Oyibo) ọrọ August 1995 o dhesẹ ekpọvio jọ kẹ okuomagbe usiuwoma ota. Ma bi ru inwene jọ enẹna kpahe oware nọ a ta fihọ otọ evaọ uzoẹme oyena. O ta nọ oke kpobi nọ a te bi kuomagbe kẹ usiuwoma ota nọ ewuhrẹ ohiohiẹ Ẹdoka o te kuhọ no evaọ Ọgwa Uvie na, omọvo o re ru ewuhrẹ na ẹsikpobi, kugbe otu obe uwuhrẹ nọ i kokohọ eria sa-sa evaọ Ọgwa Uvie na; enọ e rọ iwuhrẹ utu obe uwuhrẹ na i re ru ẹghale ẹkuotọ gbe ahwo nọ a ti ruiruo kugbe kẹ utu rai, a vẹ lẹ olẹ ekuhọ ọvo kẹ ahwo na kpobi.
2 Ma bi ru inwene enẹna re a kẹ ikoko na uvẹ re a ruẹrẹ oware nọ o mai kiehọ eyero rai. Evaọ eria jọ o sai jọ nọ okuomagbe usiuwoma ota ọvo o rẹ jọ ziezi. Evaọ eria efa o rẹ sae mai woma re utu ovuovo a ru ẹgwa usiuwoma ota rai evaọ abọ sa-sa Ọgwa Uvie na. Onana o mae rọ ere evaọ eria nọ a je wo egheghẹrẹ eria buobu nọ a re kokohọ, wọhọ oria isukulu avivẹ, oria evu-ebe, hayo eria efa jọ evaọ ighẹ (Ọgwa Uvie) ra nọ u re fiobọhọ kẹ itu re a kokohọ ababọ edo rai nọ i re kpokpo ohwohwo. Ma nyase oyena ba kẹ ekpako na re a jiroro lele oghẹrẹ nọ eyero rai ọ rọ.
3 Oware ovona u kie kpahe olẹ na re. A sae lẹ olẹ na taure a tẹ te ghale ẹkuotọ gbe ahwo na hayo nọ a tẹ ghale ae no. Eyero obọ rai o re dhesẹ onọ o rẹ mai ru iruo ziezi. Oware nọ o mae w’uzou họ a rẹ kake ruẹrẹ eware họ evaọ Ọgwa Uvie na, taure utu na u te kpohọ ẹkuotọ na, re ogbotu inievo nọ i re dikihẹ hẹrẹ evaọ obọ ẹkuotọ na e gbẹ jariẹ hẹ. Eva uzẹme, otẹrọnọ ohwo ọ nyaze ti kuomagbe utu na uwhremu na, a sae ghale ẹkuotọ gbe ohwo kẹ e.
4 Fikiere, izi egaga kpahe epanọ a re ro ru okuomagbe usiuwoma ota e riẹ hẹ. Rekọ ahwo kpobi a rẹ daoma ruiruo re udhedhẹ gbe okugbe o jọ evaọ udevie inievo na, re a sai w’abọ vọvọ evaọ usiuwoma ota na. Eyero obọ rai o re dhesẹ oware nọ o mai fo kẹ ukoko na, je wo họ iroro ẹme Ikereakere na ọrọ 1 Ahwo Kọrint 14:40: “U fo re a ru eware kpobi ziezi gba kiete.”