Kọ Wha Ru Riei Evaọ April?

Oke vẹ ma rẹ sae ta nọ ukoko u ru rie no? A tudu họ omai kpobi awọ re ma w’abọ evaọ obọdẹ usi ovravra emagazini evaọ amara April gbe May, kugbe ẹdẹ nọ a fihọ evaọ April kẹ Ẹdẹ Emagazini obọdẹ. Otẹrọnọ iwhowho-uvie nọ e rọ ukoko na kpobi a w’abọ evaọ obọdẹ usi ovravra na jọ, evaọ ẹdẹ obọdẹ nọ a fihọ kẹ ẹghale emagazini hayo edẹ efa evaọ udevie amara na, a tẹ jẹ niyẹrẹ iruo usiuwoma ota rai, ma rẹ sae ta nọ, “Ma ru riei!” Enẹna nọ April ọ vrẹ no na, u fo re ma roro kpahe epanọ ma ru riei te. Odibọgba Uvie Mai ọrọ March 1996, ẹwẹ-obe 5, evaọ otọ uzoẹme na “Rehọ Emagazini Mai ru Emamọ Iruo,” o kẹ ezọhọfihọ 17 kpahe epanọ a re ro ru ei evaọ April gbe May.

Kọ emagazini ukoko rai i re evaọ April? Bro iwhowho-uvie i w’abọ evaọ obọdẹ usi ovravra emagazini amara nukpo? Kọ who ti w’abọ vọvọ evaọ usi ovravra amara nana? Ma wo uvẹ buobu nọ ma rẹ rọ ghale emagazini—n’uwou ruọ uwou, evaọ iyẹrẹ, n’uye-eki ruọ uye-eki, evaọ ejẹ emagazini, etoke isẹri-ise owọwọ, okenọ ma te bi ru ozihebro, nọ ma tẹ be nyabru emọ-uwuhrẹ Ebaibol mai vẹre, nọ ma tẹ be dẹ eware, nọ ma te bi kpohọ erẹ, t’ẹme kugbe imoni mai, ibe-iruiruo, erivẹ, ibe-isukulu, iwuhrẹ-isukulu, evaọ ofa-edhere, gbe evaọ oria ẹhẹrẹ. Ma sae ghinẹ ta nọ uvẹ nọ a re ro fi emagazini họ ada e wariẹ omai họ.

Ikoko kpobi nọ i ru ri iei evaọ April ma jiri rai, yọ ma tudu họ owhai awọ re wha ruẹ nọ wha ru ri iei evaọ May re. Kọ ẹvẹ kpahe ikoko nọ e sae ru ei evaọ April he? Keme jabọ whọ gbẹ kiẹ ezọhọfihọ nọ i w’iruo evaọ Odibọgba Uvie Mai ọrọ March 1996 riwi hi? Jọ u mu ekobaro gbe iwhowho-uvie kpobi ẹro nọ a wo emagazini nọ i ti te ai ghale. A rẹ sae tube mu iwhowho-uvie ekpokpọ họ evaọ usiuwoma ota amara nana re a sae w’abọ evaọ obọdẹ usi emagazini ovravra na.—Riwi obe ọ Our Ministry, ẹwẹ-obe 97-100.

Who te wo emamọ abọ evaọ obọdẹ usi ovravra emagazini na u ti ru owhẹ reawere edẹro didi nọ u re no erugba odibọgba ra vọvọ ze.—Izik. 9:11; Luk 17:10.