A Ti Siwi Eghẹrẹ Ahwo Kpobi
1 Jihova ọ gwọlọ nọ “ahwo kpobi a wo usiwo, re a ze te riẹ uzẹme na.” (1 Tim. 2:4) Dede nọ ukuoriọ, oria-ẹria, gbe okegbe u re kpomahọ ahwo gaga, a wo uvẹ nọ a rẹ rọ salọ epanọ a gwọlọ yere uzuazọ rai. A rẹ sai ru oware nọ u woma a vẹ rria, hayo a rẹ sai ru oware nọ u yoma a ve whu. (Mat. 7:13, 14) Ẹvẹ otoriẹ onana u re kpomahọ eriwo mai te kpahe ahwo nọ ma be wha emamọ usi Uvie na bru?
2 U fo re ma nwani wo ọtamuo nọ eware wọhọ orẹwho hayo uruemu oria hayo ọkwa uyerakpọ i re dhesẹ isiuru ohwo kpahe uzẹme na ha. Uzẹme na o rẹ sae jọ isiuru kẹ ahwo nọ i kpohọ isukulu esese hayo ilogbo, enọ i bi le isuẹsu, ewena, enọ e ta nọ Ọghẹnẹ ọ rọ họ, enọ e se eriariẹ kpahe Ọghẹnẹ, makọ rọkẹ irumuemu nọ a riẹ odẹ dede. Ahwo nọ i no oria gbe uyerakpọ sa-sa ze a nwene edhere uruemu rai vẹre no yọ enẹna a bi rẹro uzuazọ evaọ akpọ ọkpokpọ Ọghẹnẹ. (Itẹ 11:19) Fikiere, u fo re ma sioma hemu hu re ma wha ovuẹ Uvie na bru eghẹrẹ ahwo kpobi.
3 Roro Kpahe Iriruo Enana: Ọzae jọ ọ m’oma nọ o ti kpe ọsẹ-aruakpọ riẹ no rekọ ọ tẹ d’obọ ji. Uwhremu na ọ tẹ jiroro nọ o re thuruwhu rekọ ọ sai ru ei hi. Nọ a mu ei fihọ uwou-odi fikiọ uji-utho gbe ekiọthuọ imu iyoma no, orọo riẹ o tẹ raha. Nẹnẹ na ohwo ọnana ọ be rria uzuazọ oruọzewọ jẹ reawere orọo evawere gbe emamọ usu kugbe ọsẹ-aruakpọ riẹ. Eme o wha enwene na ze? O wuhrẹ Ebaibol na kugbe Isẹri Jihova je fi oware nọ o wuhrẹ họ iruo. Jihova o bruoziẹ riẹ nọ ọ te sae nwene he he.
4 Upelẹ aye jọ nọ odẹ riẹ o jẹ hae do wọhọ ọnọ o re ru arozaha TV o wha evawere sei hi. Rekọ nọ emamọ uruemu Isẹri na o were iẹe oma no, ọ tẹ jẹ uwuhrẹ Ebaibol rehọ, o te je mu obọ họ efihọ kẹ amọfa re a wuhrẹ kpahe emamọ usi Uvie na. Oria kpobi nọ ọ nyate evaọ odibọgba n’uwou-ruọ-uwou a jọ vuhu iei, rekọ ọ jẹ rehọ evawere dhesẹ nọ ọ gwọlọ nọ a riẹe wọhọ omọvo Isẹri Jihova viukpọ ọnọ ọ rẹ zaharo.
5 Okenọ Osẹri jọ o ru ọruẹrẹfihotọ uwuhrẹ Ebaibol kugbe ọnọ o je vi Uwou-Eroro Na, nọ ọrivẹ riẹ o yo kpahe iẹe ọ tẹ nyaze uwuhrẹ na. Ọrivẹ na ọ tẹ nwani vuhu uzẹme nọ ọ be hae gwọlọ na mu! Ọye avọ ọzae riẹ a tẹ bẹre obe orọo-ofa nọ a kẹ rai no a tẹ ruẹrẹ họ. Ọ nya kodo gaga no evaọ uwuhrẹ isi-erọgbẹva je kuomagbe egagọ imizi, rekọ ọ tẹ nwani ku ebe eghaghae riẹ kufiẹ gbe eware efa kpobi nọ o wo nọ i w’abọ kpahe egagọ idhivẹri. Ọ tẹ nwani mu iwuhrẹ họ ẹnya je mu imoni gbe egbẹnyusu riẹ họ ẹta kẹ kpahe ẹrọwọ ọkpokpọ riẹ. Enẹna o bi sisẹri kẹ amọfa avọ ajọwha.
6 U fo re ma kaki bruoziẹ ohwo ọvo ho. Ukpoye, joma rehọ ajọwha ghale emamọ usi na kẹ ahwo evaọ oria kpobi. Ma wo ẹjiroro kpobi nọ ma re ro fievahọ Jihova, ọnọ ‘ọ rẹ ruẹ oware nọ o rọ udu na,’ ọ te jọ “Osiwi ahwo kpobi.”—1 Sam. 16:7; 1 Tim. 4:10.