Usiwo Imu Efa nọ E Kare-Azẹ
1 Nọ Ogbẹgwae Uruẹme Kugbe Iwou-Imu i bi weze bru edọkita gbe esipito fiki Isẹri Jihova evaọ Nigeria re a wuhrẹ ai kpahe usiwo imu efa nọ e kare-azẹ na, o rọ unevaze edọkita gbe ewena nọ e rẹ bẹre-oma buobu re a siwi inievo emezae gbe inievo emetẹ mai ababọ azẹ nọ a re se fihọ ae oma. Ma ghine vuhu aghare oghale onana nọ u no obọ Jihova ze na mu no. Ewena imu itieye na nọ e gwọlọ ruiruo kugbe omai a bu vi 800 no evaọ Nigeria.
2 Okenọ ọ t’ẹme kugbe Ogbẹgwae Uruẹme Kugbe Iwou-Imu na no, edọkita jọ evaọ obọ Kaduna ọ tẹ ta kpahe ọruẹrẹfihotọ na nọ: “Emamọ ẹjiroro. Nọ ahwo na a wo omobe ọ Advance Medical Directive na u ru eware lọhọ kẹ omai kpobi no [ọnọ ọ be mọ avọ edọkita].” Ọfa nọ o no Rivers State ze ọ ta nọ: “Me vuhu aghare ọ ewhowho otoriẹ kpahe [seba ero ruiruo] azẹ na mu no evaọ esiwo enọ e be mọ evaọ ẹsipito mai.” Evaọ obọ Ogun State ẹdọkita jọ ọ ta nọ: “Ọruẹrẹfihotọ na o rovie aro mai gaga. Gbẹ hai ru ei haro. Me yere owhai.” Evaọ obọ Kwara State ọfa ọ ta nọ: “Ohwo kpobi nọ ọ be mọ o wo udu nọ ọ rẹ rọ jiroro oware nọ ọ gwọlọ wọhọ usiwo nọ o mai woma kẹe, yọ orọ owha-iruo ọbo nọ o w’iroro kpobi re o roro kpahe uye ohwo riẹ nọ ọ be mọ re o ru oware kpobi nọ ọ sai ru re ọnọ ọ be mọ na ọ sae zọ ababọ enwene ẹrọwọ egagọ riẹ.” Eme enana e tudu họ omai awọ, o gbẹ rọ ere?
3 Ghele, ẹsibuobu otu Ogbẹgwae Uruẹme Kugbe Iwou-Imu na a rẹ wha evuẹ no obọ edọkita gbe enọso na ze. A ta nọ edọkita na a bi g’unoma nọ ma be kake vuẹ ae evaọ oke ọsosuọ họ hayo evaọ oke usiwo ho inọ ọnọ ọ be mọ na yọ Osẹri gbe nọ a rẹ rehọ azẹ ruiruo ho evaọ usiwo hayo oma-obẹrọ na. Efa e ta nọ ma be wha omobe ọ Advance Medical Directive/Release mai lele oma ha re u vuhu omai wọhọ Isẹri, re a se omai azẹ ba ẹkẹ taure a tẹ te riẹ. Ofariẹ, esipito jọ a bi g’unoma nọ ma be kaki te ẹsipito evaọ ẹruoke he. Ma be hae hẹrẹ bẹsenọ ẹyao na ọ rẹ ga vi esiwo no tao. Inievo, ma ta eme enana kpobi no vẹre evaọ ileta mai ọrọ February 1, 1995, ro se ikoko kpobi, gbe evaọ uko obeva ọ Odibọgba Uvie Mai ọrọ August 1994 (ọrọ Oyibo). Ma re ru ebẹbẹ kẹ omobọ mai gbe esipito otẹrọnọ ma gbẹ nya lele eruẹrẹfihotọ nọ a m’oma rai na ha. Ma be wariẹ jẹ owhai riẹ kpahe eware enana re o rehọ ‘edhere ekareghẹhọ jaja iroro rai vi.’—2 Pita 3:1.
4 Nọ whọ tẹ rẹriẹ ova dhe avro kpahe azẹ evaọ ẹsipito, vuẹ ekpako oria ra vẹrẹ vẹrẹ enọ e te vuẹ Ogbẹgwae Uruẹme Kugbe Iwou-Imu na. A ti fiobọhọ kẹ owhẹ evaọ ẹmeọta kugbe edọkita ra kpahe oware nọ o re ru ababọ azẹ nọ o re ro ruiruo.