Ẹzi Jihova Ọ rọ Kugbe Omai
1 Wọhọ Isẹri Jihova, iruo mai e rọ logbo. Jesu ọ ta nọ: “Usiuwoma na a rẹ te kake vuẹ erẹwho kpobi tao.” (Mak 13:10) A te rri rie no eriwo ohwo-akpọ ze, o rẹ wọhọ nọ onana o lọhọ họ, rekọ ere o rọ họ. Ma wo uketha ọ ẹgba nọ ọ mae ga kpaobọ evaọ ehrugbakpọ na—ẹzi Ọghẹnẹ.—Mat. 19:26.
2 Imuẹro Ikpe-Udhusoi Ọsosuọ: Nọ o je dhesẹ eruẹaruẹ Aizaya kpahe oma riẹ, Jesu ọ ta nọ: “Ẹzi Ọnowo na ọ rọ omẹ oma . . . re [mẹ] vuẹovuẹ emamọ usi.” (Luk 4:17, 18) Taure o te kpohọ odhiwu, ọ ta kẹ ikọ riẹ nnọ ẹzi ọfuafo na ọ te kẹ ae ẹgba epọvona re a se-isẹri “rite ọnyaba akpọ na.” Oyena o vrẹ no, ẹzi ọfuafo na ọ wọ Filip re ọ ta usiuwoma kẹ orieyero ovie ọrọ Ẹtiopia, ẹzi na o vi Pita bru olori udhalakpa-usoi Rom, yọ o vi Pọl avọ Banabas re a nyae ta usiuwoma kẹ erẹwho Egedhọ na. Ono ọ hai sai roro nọ ahwo oghẹrẹ uyerakpọ utioye na a te kezọ kẹ uzẹme na? Rekọ a kezọ.—Iruẹru 1:8; 8:29-38; 10:19, 20, 44-48; 13:2-4, 46-48.
3 Imuẹro Ọgbọna: Obe Eviavia u fiẹgba họ abọ nọ ẹzi ọfuafo o wo evaọ iruo usiuwoma ota ẹdẹ inẹnẹ nọ o ta nọ: “Ẹzi na avọ Ọva na a tẹ ta nọ, ‘Nyaze.’ . . . Okẹ ọvọvẹ rọ kẹ ahwo nọ a guọlọ e riẹe.” (Evia. 22:17) Ẹzi na ọ wọ utu ọva Kristi gbe egbẹnyusu “igodẹ efa” rai no re a vuẹ emamọ usi na kẹ ahwo kpobi. (Jọn 10:16) Ma rẹ wharo evaọ usiuwoma ota mai, ma re sienẹ h’emu hu re ma nya bru ahwo oghẹrẹ kpobi, fiudu họ nnọ ẹzi Ọghẹnẹ o ti fiobọhọ k’omai. 1998 Yearbook o kẹ imuẹro ivevẹ inọ ẹzi Ọghẹnẹ ọ gbẹ rọ kugbe idibo riẹ. Rri iyẹrẹ na! Evaọ ikpe iruo ivẹ nọ e vrẹ na, a tẹ ghale iẹe bu vi 1,000 eye e họ-ame kẹdẹ kẹdẹ.
4 Jọ u mu owhẹ ẹro inọ ẹzi Ọghẹnẹ ọ te gbẹ jọ kugbe omai nọ ma be vuẹ ovuẹ Uvie na te umuo nọ Jihova ọ gwọlọ na. Eriariẹ nana e rẹ tudu họ omai awọ jẹ w’omai re ma gbẹ hae ya gaga evaọ iruo Uvie nọ e mai w’uzou na.—1 Tim. 4:10.