Isẹri-Ise Ẹkwoma Uruemu Ezi
1 Evaọ akpọ odode inẹnẹ na, izoge buobu a be raha izuazọ rai kufiẹ evaọ imu-elọ, ọfariẹ-ogbe, ọwọsuọ, gbe ozighi. Wo ohẹriẹ, o rẹ sasa oma re a ruẹ uruemu ezi ọ izoge ekpakpatiẹ evaọ ukoko Ileleikristi na, yọ ababọ avro o rọ oware erru kẹ Jihova. O rọ isẹri ilogbo nọ o rẹ sai si amọfa ziọ uzẹme na.—1 Pita 2:12.
2 Eware buobu nọ e via no i dhesẹ nnọ uruemu ezi izoge Ileleikristi u kpomahọ iriughe wowoma no. Nọ ọ jẹ t’ẹme kpahe uzoge Osẹri jọ nọ ọ jọ ọmọ-isukulu riẹ, iticha jọ ọ ta kẹ eklase na soso nnọ Ọghẹnẹ ọmọtẹ nana, Jihova, họ Ọghẹnẹ uzẹme na. Ọ ta onana fikinọ uruemu ọmọtẹ na o vọ avọ adhẹẹ ẹsikpobi. Iticha ọfa jọ o kere se Society, anọ: “Me jiri owhai fiki obọdẹ izoge nọ wha wo evaọ egagọ rai. . . . Izoge rai e ghinẹ rọ oriruo. A rẹ kẹ ekpako rai adhẹẹ, a rọ wolẹ, yọ a rẹ sẹ-osẹ okpakpatiẹ. Yọ a riẹ Ebaibol rai kẹhẹ! Ere u fo nọ egagọ e rẹ ghinẹ jọ!”
3 Uruemu ezi Osẹri ọ ikpe ihrẹ jọ nọ ọ jọ eklase riẹ o were iticha ọfa jọ gaga. Oware nọ u si rie urru họ uruemu ọmọzae na nọ o rọ wowolẹ je siuru na, onọ u ru rie hẹriẹ oma no emezae efa. Uruemu osegboja riẹ kpahe orọwọ egagọ riẹ—ọ rẹ vuoma kẹ ohẹriẹ riẹ hẹ fiki eware nọ ọ rọwo, o dhẹruọ iticha na oma. Iticha na ọ ruẹ nọ a wuhrẹ iroro-oziẹbro riẹ no jegbe nnọ ọ rẹ sae “hẹriẹ uwoma no uyoma.” (Hib. 5:14) Uwhremu na, oni ọmọzae na o te weze bru iticha na, ewuhrẹ Ebaibol o te muhọ. Ukuhọ riẹ, iticha na ọ tẹ họ-ame je zihe ruọ ọkobaro oke-kpobi!
4 Uruemu ezi Osẹri jọ u kpomahọ uzoge ọmọzae jọ evaọ isukulu riẹ. O ghine wo ohẹriẹ—ọ jọ wolẹ, o wo osegboja kẹ ewuhrẹ, yọ ẹsikpobi ọ rẹ sẹ-osẹ okpakpatiẹ; ofariẹ, wo ohẹriẹ no emetẹ efa, o re lele emezae vievie he. Ọmọzae na ọ ruẹ nọ ọ be rehọ ehri-izi Ebaibol ro yeri. Uzoge ọmọzae na ọ nọ riẹ enọ kpahe orọwọ egagọ riẹ yọ eware nọ o wuhrẹ no obọ riẹ ze i si rie urru gaga. O te muhọ ewuhrẹ, u lehie he ọ tẹ họ-ame, ukuhọ riẹ ọ tẹ ro iruo odibọgba ọkobaro na jẹ ruọ iruo Ebẹtẹle.
5 Otẹrọnọ whẹ yọ uzoge Oleleikristi nọ ọ gwọlọ se emamọ isẹri kẹ amọfa, sẹro uruemu ra evaọ kabọ kabọ. Whọ kuvẹ re omoyọrọ ra u whrehe he ẹkwoma obọ nọ whọ rẹ lọhọ kẹ iruemu, eriwo, hayo edhere-uzuazọ odode akpọ na. Fi oriruo uruemu ukpehru h’otọ evaọ ẹme-unu ra, ẹgọ, gbe osẹ, orọnikọ okenọ whọ rọ usiuwoma gbe iwuhrẹ ukoko ọvo ho rekọ te okenọ whọ rọ obọ isukulu gbe okenọ whọ be zaharo. (1 Tim. 4:12) Who ti wo uvi oghọghọ okenọ ohwo jọ o te wo isiuru kẹ uzẹme na fikinọ who bi “ru re elo [ra] o lo” ẹkwoma uruemu ezi ra.—Mat. 5:16.