Ono O re Yiwi Fru Eyae-Uku Re?

¹ “Enọ e rẹ re uvuhu họ eyae-uku, a . . . wo obrukpe ologbo.” (Mak 12:40) Fikieme Jesu ọ jẹ t’ẹme ọnana? Dede nọ ọ jẹ t’ẹme kpahe uruemu omoya gbe ogbekuo orọ ikere-ebe oke riẹ, ghele na o rọ vevẹ nnọ eyae-uku nọ ọ fodẹ evaọ etenẹ na u fiẹgba họ epanọ erivo ọrọ ẹkẹ-uvẹ ahwo otiọye na o yoma te. O rẹ sae wha ẹdhoguo obrukpe Jihova ze.—Aiz. 1:23.

² Rekọ eme u dhesẹ re a “re uvuhu họ eyae-uku”? Roro kpahe iriruo enana. Obe-usi jọ o n’iyẹrẹ nnọ okenọ ọzae ọ aye jọ o whu no, imoni ọzae na a tẹ ghale uwou ọzae na kẹ oma rai jẹ wọviẹ aye-uku na nnọ o kpe ọzae riẹ no. A rehọ enọ egaga fae ovao enwenọ euwa esa soso. Uwhremu na a tẹ ta kẹe nnọ ọ da ame nọ a rọ họ ori na. A daoma gbae họ re ọ rọo ọsọrọo riẹ jọ. Nọ ọ se, a te lei no uviuwou na je vu ei wa re ọyọvo ọ ko unu riẹ avọ emọ esa riẹ nọ ọsẹ o whu seba. Evaọ oria ofa, aye-uku jọ ọ ta nọ tubọ ekpako ukoko jọ i gboja kẹe evaọ okenọ a gboro uku-oriọ ọzae riẹ mi ei ẹkwoma unoma evei na inọ a gwọlọ rẹro te oghẹrẹ nọ ọ rẹ rehọ okwakwa nana ruiruo. Agbẹta nọ aye-uku jọ ọ rọ ta nnọ ‘re a jọ aye-uku o wọhọ ẹrria evaọ orẹwho nọ uvumọ ohwo ọ be jọ ta ẹvẹrẹ ra ha, orẹwho nọ u rri owhẹ wọhọ oware aghọ.’

³ Nọ ezae rai i te whu no, eyae-uku i re wo iroro evedha, ofu, uye edada, ọkora, je reghe evaọ iroro ẹsejọ. Re ohwo jọ o kuọ uye-iroro orọ ekwakwa uzuazọ nọ a mi ohwo kugbe ebẹbẹ enana o wọhọ ẹsenọ a re si ufi kekeke yao uriohọ ohwo nọ ọ rọ deghedeghe. Ọraha o re noi ze. Uvo-uthei, ọkwa nọ a re kru thọthọ, ogbori, gbe ozodhẹ iruemu-ẹwho yọ usu eware jọ nọ e rẹ lẹliẹ ahwo kienyẹ eyae-uku gbe emọ nọ i wo esẹ hẹ. Dede na, uvumọ inoma eyena u re si ofu Ọghẹnẹ no ohwo nọ ọ reabe uzou hu. (Ọny. 22:22, 23) Onana o soriẹ nọ Ileleikristi a jẹ yọrọ oma hrọ re a siọ eyae-uku gbe emọ nọ i wo esẹ hẹ ba e kienyẹ hayo ẹwhariọ.

⁴ O rọ oware ọkora inọ, ezae-orọo Ileleikristi jọ, rite ẹdẹ uwhu rai, a rẹ zọhọ fihọ uye eyae rai ẹkwoma esino efe rai hayo ẹwhaha eyae rai re a siọ oria nọ igho ebanke, azọhọ kẹ eware idudhe, gbe ekwakwa efe efa ba ẹriẹ. Fiba oyena, a re kere epanọ a rẹ ghale uku rai fihọ otọ họ, keme ẹsejọhọ a gwọlọ nọ eyae (gbe emọ) rai a reuku uvumọ oware rai evaọ okenọ a te whu no ho. A vẹ rehọ ogbori gele eyae (gbe emọ) rai fihọ uye nọ u fo ho. Onana u dhesẹ nọ ahwo otiọye na a you eyae rai wọhọ ugboma obọrai hi.—Ẹf. 5:28, 29.

⁵ Dede na, o rọ oware nọ a re jiri inọ amọfa a re kere uku oghalọ rai vevẹ nọ u re dhesẹ eware nọ a rẹ seba kẹ aye gbe emọ rai nọ uwhu u te kpe ai. Eware nọ e via no i dhesẹ nnọ onana yọ ọruẹrẹfihọ oyoyou gbe onọ u w’areghẹ. O rẹ whaha okienyẹ nọ ọ rẹ sae via. Uzẹme, o rọ ‘iruo nọ i re dhesẹ ẹrẹreokie ọ areghẹ via.’—Mat. 11:19; 2 Kọr. 12:14; 1 Tim. 5:8.

⁶ Oware jọ nọ o lẹliẹ Jihova brukpe “isuisuẹsu Sọdọm” họ okienyẹ eyae-uku. (Aiz. 1:10, 17) Fikiere ọ gbẹ rọwo gaviezọ kẹ elẹ rai hi. Ẹlahiẹ eyae-uku gbe emọ nọ i wo esẹ hẹ o rẹ sai su kpohọ obọdẹ uvẹ-iruo nọ a re mi ohwo evaọ ukoko na. Ẹdhoguo na ọ rẹ sae tubẹ ga viere kẹ ahwo nọ a rehọ ofruriọ hayo uvouthei lahiẹ eyae-uku gbe/hayo emọ nọ i wo esẹ hẹ. A rẹ sai si ahwo otiọye na no ukoko Ileleikristi na ajokpanọ a dhesẹ uvi ekurẹriẹ. Fikiere ekpako na a re muẹrohotọ re a ‘mi eyaeuku unu gu’ jẹ sẹro rai no obọ ahwo nọ a wọhọ erae ijihẹ.—Aiz. 1:17; Mak 12:40; 1 Kọr. 5:10, 11; 6:10; 1 Tim. 3:8.

⁷ Jọ mai kpobi ma thoma kpahe je no omai eva ze re ma “[riwi] imiwhrori avọ eyaukuotọ nọ uye o rẹbẹ,” ma vẹ rọ ere rehọ egagọ nọ a jẹrehọ kẹ Jihova, Ọghẹnẹ ẹruọsa mai na.—Jem. 1:27.