Aikpobi A re ‘Dede Ẹme na Rehọ’ Hrọ!
1 Ima ahwo buobu a bi wuhrẹ Ebaibol na kugbe Isẹri Jihova. Re a ruẹsi te kẹ uzuazọ ebẹdẹ bẹdẹ, a re ‘dede ẹme na rehọ’ hrọ, wọhọ epanọ ahwo 3,000 nọ i kurẹriẹ jẹ họ-ame evaọ ẹdẹ Pẹntikọst 33 C.E. a ru na. (Iruẹru 2:41) Didi owha-iruo onana u fihọ omai uzou nẹnẹ?
2 U fo re ma fiobọhọ kẹ emọ-uwuhrẹ Ebaibol mai re a bọ omarọkẹ fihọ Jihova. (1 Tim. 4:7-10) Rọkẹ oyena, uko-obeva ọ Odibọgba Uvie Mai ọrọ June 1996, edhe-ẹme avọ 20, o j’iroro nọ: “Evaọ etoke ewuhrẹ na kpobi, gwọlọ uvẹ nọ whọ rẹ rọ bọ ovuhumuo riẹ kẹ ekwakwa-aghae Jihova. T’ẹme te iroro ididi ra kpahe Ọghẹnẹ. Fiobọhọ kẹ ọmọ-uwuhrẹ na re o roro kpahe ewo usu osasa kugbe Jihova.”
3 Use-Abọ nọ Ma Rẹriẹ Ovao Ku: Ahwo buobu, enọ egagọ erue e be kpọ, a wo edẹro kẹ oghẹrẹ egagọ nọ e gwọlọ umutho oke gbe omodawọ ọvo, ababọ ẹgwọlọ ugogo enwene jọ evaọ uzuazọ rai. (2 Tim. 3:5) Use-abọ nọ o rẹriẹ ovao ku omai na họ re ma fiobọhọ kẹ emọ-uwuhrẹ Ebaibol mai re a ruẹ nọ egagọ uzẹme o gwọlọ vi ẹjọ enọ i re yo ẹme Ọghẹnẹ ọvo gheghe. A re fi eware nọ a wuhrẹ na họ iruo evaọ izuazọ rai hrọ. (Jem. 1:22-25) Otẹrọnọ Ọghẹnẹ ọ jẹ uruemu rai jọ rehọ họ, u fo re a vuhu owha-iruo rai mu re a “ziheze” je ru oware nọ u kiete re a ru ei eva were. (Iruẹru 3:19) Re a wo uzuazọ ebẹdẹ bẹdẹ, ‘a rẹ ya gaga’ re a wo edikihẹ ọgaga kẹ uzẹme na.—Luk 13:24, 25.
4 Nọ whọ tẹ be ta kpahe abọ sa-sa ọrọ uruemu, nọ ọmọ-uwuhrẹ Ebaibol ra epanọ o ghine riwi eme enana gbe oware nọ o re ru okenọ ọ tẹ ruẹ ẹgwọlọ nọ o re ro ru enwene evaọ uzuazọ riẹ. Kpọ iroro riẹ rri ukoko nọ ọ be jọ wuhrẹ uzẹme na, jẹ tuduhọ iẹ awọ re o kpohọ iwuhrẹ ẹsikpobi.—Hib. 10:25.
5 Joma ru ei fihọ ute mai re ma rehọ uwuhrẹ mai nyate udu ọmọ-uwuhrẹ na. Ma te ghọghọ nọ ma be kpakpa ahwo ọkpokpọ re a dede ẹme Ọghẹnẹ rehọ jẹ họ-ame na!—1 Tẹs. 2:13.