Fiobọhọ k’Amọfa re A Wo Eriariẹ Egbagba
1 Wọhọ epanọ whọ riẹ na, ahwo buobu a riẹ nọ a be rria ekwotọ sa-sa, te orẹwho onana, enọ i re kpohọ ichọche rekọ umutho eriariẹ ọvo a wo kpahe Ebaibol na. O rrọ uvẹ-ọghọ mai re ma fiobọhọ kẹ ahwo otiọye na re a wo eriariẹ egbagba na evaọ September nọ ma bi ti fi obe ọ Eriariẹ na họ ada evaọ odibọgba na.
2 Kareghẹhọ Owọ-Eme Enana: U do fo ho re a wuhrẹ didi kpahe egagọ efa buobu re a tẹ ruẹsi se emamọ isẹri evaọ orẹwho onana. Uzẹme na nọ a rẹ rehọ edhere ẹmeọta ọlọlọhọ, avọ ona rọ ta o rẹ wha emamọ owojẹ ze ẹsibuobu. Onọ jọ nọ o fodẹ ẹbẹbẹ jọ evaọ okegbe na nọ whọ rẹ nọ ọvo whọ vẹ jẹ ta kẹ ọnọ o wo uwou na inọ Ebaibol na e kẹ uyo jọ kpahe iẹ o rẹ sai su kpohọ emamọ ẹmeọta. Evaọ oke emuhọ na, who dhesẹ nọ ẹme nọ whọ be ta na o kpehru vi oware nọ ọnọ o wo uwou na ọ rọwo ho.
3 Rehọ Ekwakwa nọ I Fo Ruiruo: Nwanọ iroro ọ ahwo oghẹrẹ egagọ kpobi a wo h’eva rọ ruẹrẹ obe ọ Eriariẹ na gbe ibroshọ Gwọlọ na họ. A rẹ sae rehọ ebe enana ro fiobọhọ kẹ ahwo nọ a riẹ obe ziezi je gbe enọ e riẹ umutho hayo e riẹ vievie he. Iwoho nọ a sai ro ruiruo ziezi e vọ rai eva.
4 Gwọlọ Oware nọ Wha jọ Rọwo Kugbe Via: O bẹ hẹ re a duku oware nọ wha jọ rọwo kugbe ahwo buobu nọ a wo iwou na. A riẹ nọ ma be rria etoke nọ emuemu o je bi vihọ gbe nnọ omodawọ ohwo-akpọ re o si ebẹbẹ no akpọ na u kie no. Nọ ahwo buobu a rri uzuazọ wọhọ nọ o vọ avọ ebẹbẹ un’ọjọ ut’ọjọ nọ i wo ifue he na, a wo isiuru kpahe eme ọ uzuazọ uviuwou, ugbarugba gbe omofọwẹ, gbe oware nọ o rẹ via evaọ oke uwhu. Iriruo edhere ẹmeọta ivẹ jọ nọ whọ sae dawo e rrọ etenẹ.
5 Onana o sai si ọzae nọ o wo uviuwou urru:
◼ “Me bi weze bru ahwo nọ a wo ọdawẹ kpahe oghẹrẹ uzuazọ uviuwou nọ o rrọ ekwotọ buobu nẹnẹ. Eme who roro nọ u re fiobọhọ gba uviuwou kugbe? [Kuvẹ kẹ uyo.] Ahwo jọ a wo Ebaibol rekọ a ghinẹ riẹ oware nọ o ta kpahe uzuazọ uviuwou ho. Mẹ gwọlọ ghale ẹjiroro jọ nọ ọ rrọ eva Ahwo Kọlọsi 3:18-21 kugbe owhẹ.” Nọ who te se ikereakere na no, dhesẹ uzou avọ 15 orọ obe Eriariẹ na kẹ ọnọ o wo uwou na re whọ ta nọ: “O te were omẹ re mẹ raha umutho oke jọ ro se uzou onana kugbe owhẹ.”
6 Uzoge ọ rẹ sae kuyo kẹ onana:
◼ “Kọ whọ rẹ rọwo nnọ epanọ aghare uruemu o bi nwene kpatakpata nẹnẹ na avọ ababọ imuẹro kpahe obaro mai na, ma gwọlọ ọkpọvio nọ a re fievahọ evaọ uzuazọ? [Kuvẹ kẹ uyo.] Dede nọ oye họ obe nọ o mae kpako, Ebaibol na ọ kẹ uvi ithubro kẹ uzuazọ ọgbọna gbe uzuazọ uviuwou evawere.” Kẹsena who ve rovie kpohọ uzou avọ 2 evaọ obe ọ Eriariẹ na, who ve se edhe-ẹme avọ 10 gbe uhie-ẹme ọsosuọ orọ edhe-ẹme avọ 11 na, kugbe 2 Timoti 3:16, 17. Otẹrọnọ o dhesẹ isiuru, who ve fi obe ọ Eriariẹ na họ ada, dhesẹ omaa obe uwuhrẹ Ebaibol ọvọvẹ mai kẹe. Who te rri nọ o te mai woma re who mu uwuhrẹ na họ evaọ ibroshọ Gwọlọ na, whọ sai ru ere. Whọ te ruẹ obọdẹ eme emuhọ efa nọ e rrọ ẹwẹ-obe avọ 2-7 evaọ omobe ọ Epanọ A ro Muhọ Jẹ Ruabọhọ Ebaibol E rọ Jiroro na.
7 Reawere ọ Iyẹrẹ Iwoma: Ọmọzae jọ nọ ọ kpako te ikpe 22 no ọ nya bru oniọvo-ọmọtẹ jọ nọ o je se-isẹri evaọ eki ọ tẹ yare nọ o ru uwuhrẹ Ebaibol kugbe ei. Ọmọzae na ọ ta kẹe nnọ ikpe eree nọ e vrẹ no o yo ẹme Ebaibol nọ oni riẹ avọ oniọvo-ọmọtẹ na a jẹ ta. Dede nọ uvi iyo Ebaibol kẹ ebẹbẹ ohwo-akpọ i si ọyomariẹ urru, oni riẹ o wo isiuru hu yọ ọyomariẹ o roro nọ evaọ okioye na ọ maha vi epanọ ọ rẹ rọ gwọlọ uzẹme na k’omobọ riẹ. Enẹna nọ ọ kpako no na, ọ gwọlọ wuhrẹ viere. Ọmoha na ọ raha oke he. Evaọ edẹ 23 ọvo, o te wuhrẹ obe Eriariẹ na reno, yọ emerae ene ọvo nọ ọ nyaku oniọvo-ọmọtẹ na evaọ eki no, ọ tẹ yare nọ a họe ame!
8 Oniọvo-ọmọzae jọ o muọ uwuhrẹ họ kugbe ọzae jọ nọ ọ nyaku evaọ itreni. Ọzae na o wo ẹbẹbẹ evaọ orọo riẹ. O te je wo ẹbẹbẹ idieda. Ọzae na ọ rọwo nọ Osẹri na ọ nya bru ei kpobọ uwou re o dhesẹ ohrẹ Ebaibol kpahe uzuazọ uviuwou kẹe. Iwuhrẹ Ebaibol kpahe uruemu ezi i te si ei urru, ọ tẹ rọwo nọ a wuhrẹ Ebaibol kugbe ei. Ọzae na avọ uviuwou riẹ a te muọ iwuhrẹ họ ẹnya. Uwhremu na a tẹ ghale uzẹme na kugbe egbẹnyusu gbe imoni rai. Enẹna, imazeza evaọ usu rai a jẹ uzẹme na rehọ no!
9 Oreva Ọghẹnẹ họ re ‘oghẹrẹ ahwo kpobi a wo usiwo, re a ze ti wo eriariẹ egbagba uzẹme na.’ (1 Tim. 2:4) Iroro-ejẹ enana jọ nọ a dhesẹ fihọ uzoẹme onana nọ who re ro ruiruo o te k’owhẹ uvẹ nọ who re ro fiobọhọ k’ahwo jọ wo eriariẹ egbagba nọ i re su kpohọ uzuazọ ebẹdẹ bẹdẹ.