Ẹnya Lele Isiuru nọ A Duku —O r’Oja Evaọ Eruo Ilele
1 Evaọ okenọ ọ jẹ rehọ ithubro urere kẹ ilele ẹrọwọ riẹ, Jesu ọ ta nọ: ‘Wha . . . ru ilele . . . wha wuhrẹ ai.’ (Mat. 28:19, 20) Ẹkwoma eme enana Jesu o dhesẹ vevẹ kẹ ilele riẹ nnọ o gwọlọ re a ruiruo ọ ewuhrẹ. Onana o rẹ gwọlọ ezihebru ahwo na re a bọ isiuru rai.
2 Ẹvẹ A Re Ro Ru Onana?: O rọ oware obẹbẹ kẹ inievo jọ re a duomahọ abọ iruo usiuwoma ota onana. Ẹsejọ o rẹ jọ ere fikinọ a wo imuẹro kpahe oghẹrẹ ẹme nọ a rẹ te ta evaọ okenọ a te zihe he. Rekọ o bẹ tere he. O rẹ mai woma re whọ m’omaa ẹme nọ whọ te ta evaọ oke ozihebro nọ whọ tẹ nwani ku iweze ọsosuọ ra na họ no. Kere eme nọ i si ohwo nọ o wo uwou na urru. Onana o rẹ kẹ owhẹ owọ-ẹme nọ whai imava wha jọ rọwokugbe nọ whọ rẹ jọ muhọ. Ofariẹ whọ sae nọ ohwo nọ o wo uwou na onọ jọ nọ whọ te kuyo riẹ evaọ oke ozihebro. O tẹ lọhọ, zihe nya evaọ ẹdẹọvo ọyena hayo evaọ umutho edẹ jọ. Nọ u te lehie te eka jọ no, isiuru ohwo nọ o wo uwou na e sai fu no yọ o rẹ jọ bẹbẹ re a wariẹ kpare ae. Ru ẹmeọta ra lọlọhọ, vevẹ, je dh’obọ te ugogo ẹme na. Rehọ Ebaibol na rọ tha ẹme ra uke. Whaha izoẹme nọ a rẹ jọ vro-avro. Fielo họ abọ isiuru ọrọ ovuẹ Uvie na.
3 U fo re ẹmeọta ra ọ jọ abọvo ho. Ẹsibuobu obokparọ o rẹ r’oma hwa uvẹ nọ whọ rẹ rọkẹ ohwo nọ o wo uwou na re ọ t’ẹme. Nọ enọ nọ a rẹ rọ riẹ iroro ohwo. Onana o rẹ lẹliẹ owhẹ wuhrẹ evaọ edhere nọ o wo aghare.
4 Obufihọ nọ U Rovie Fihọ: A kẹ obọdẹ iroro-ejẹ nọ ma rẹ sai rri kpohọ evaọ obe ọ Our Ministry na. Wọhọ oriruo, muẹrohọ obọdẹ ekpọvio nọ e rrọ ẹwẹ-obe avọ 88 gbe 89 na. Tubọ ese idhe-eme ene nọ e rrọ otọ uzou-ẹme na “Eruo Izihebro” na o rẹ tuduhọ omai awọ. Whọ rẹ sae jẹ rehọ Izoẹme Ebaibol rọ kẹ Iroro e Jẹ (Ukere ọ 1998) na ro ruiruo.
5 Kẹvẹ otẹrọnọ oghẹrẹ uzoẹme jọ o roma via evaọ iweze ọsosuọ na nọ whọ gwọlọ wo evuẹ efa kpahe? Obufihọ obọdẹ ofa họ obe na Reasoning From the Scriptures. Ugogo izoẹme buobu e riẹ nọ a rẹ t’ẹme kpahe. A dhesẹ idhere nọ a rẹ rọ rehọ eme na ruiruo evaọ ẹwẹ-obe avọ 7 gbe 8. A kẹ iroro-ejẹ kpahe epanọ a rẹ rọ rehọ eme na ruiruo. Edhe-ẹme avọ 4 evaọ ẹwẹ-obe avọ 7 o ta nọ: “Ẹvẹ whọ sai ro duku ugogo ẹme nọ whọ gwọlọ evaọ obe onana? Ẹsibuobu whọ rẹ sai duku ei lọlọhọ ẹkwoma erovie ovavo kpohọ uzoẹme ulogbo nọ u dhesẹ owọ-ẹme nọ wha be ta na. Evaọ otọ izoẹme ilogbo na kpobi, enọ nọ e viodẹ na e rọ vevẹ; a re kere ai mu gbalọ riwi akotọ ẹkpẹlobọ na. Whọ gbẹ kaki duku oware nọ whọ gwọlọ họ, rri Okiẹ-eme nọ o rrọ obemu ọ obe na.”
6 Fikiere ẹjiroro ọ riẹ nọ ma re ro wo iroro eliọliọ evaọ ẹnya lele isiuru nọ ma duku evaọ iruo usiuwoma ota mai, o tẹ make rọnọ umutho gheghe ma riẹ. Oware nọ o mai w’uzou họ ọdawẹ nọ ma re wo kẹ amọfa. Ukoko Jihova nẹnẹ o kẹ ebe gbe iwhowho-uvie nọ i wo ona rọkẹ ewuhrẹ mai no. Okenọ ma te duku ahwo oruọzewọ nọ “a bi dimẹ je bi bo” fiki eware etọtọ nọ a be ruẹ, u fo re uyoyou mai o w’omai re ma zihe je fiobọhọ kẹ ae.—Izik. 9:4-6.