Iwuhrẹ I Re Fiobọhọ kẹ Izoge Na

¹ Ọmọtẹ ikpe ikpegbọ jọ ọ ta nọ: “Ẹsejọ me re roro nọ izoge i wo etoke nọ ọ mae ga evaọ uzuazọ. Ma rrọ udevie ahwo nọ i bi bru igberẹ, be lọ imu-egaga, jẹ da idi.” Kọ ere who roro? O tẹ rọ ere, kọ eme who roro nọ o ti fiobọhọ k’owhẹ họre ikpomahọ iyoma enana? Whọ gwọlọ ẹrọwọ, ẹrọwọ ọgaga kpahe ẹgbagba ọ idhere Jihova, keme ababọ oyena “o rẹ bẹbẹ re ohwo ọ were Ọghẹnẹ.” (Hib. 11:6) Ekpohọ iwuhrẹ ukoko u re fiobọhọ k’owhẹ bọ imuẹro gbe ọtamuo Oleleikristi ra ga re whọ whaha oware uyoma.

² Iwuhrẹ E Rẹ k’Owhẹ Eware Buobu: Eme o re ru emamọ emu nọ a bi lele egbẹnyusu ekpekpe re jọ orọ omawere? Ogbẹrọnọ ekugbe ọ emu omakpokpọ avọ usu evawere evaọ uyero ọ oma-usehọ na? Whaọ, iwuhrẹ mai e rẹ kẹ omawere ọvona, rekọ evaọ abọ-ẹzi.

³ Eme nọ a rẹ ta evaọ iwuhrẹ na e rẹ bọ ohwo ga, i re no eme kpahe ebẹbẹ ikẹdẹ kẹdẹ uzuazọ rite iwuhrẹ ọ eruẹaruẹ igbunu Ebaibol ze. A rẹ kẹ obọdẹ uthubro nọ u re wuhrẹ owhẹ epanọ a rẹ rọ rria edhere uzuazọ nọ o mai woma jẹ rria te use-abọ nọ whọ be nya ku. Egbẹnyusu nọ a rẹ jọ obọ iwuhrẹ na duku họ enọ e mai woma evaọ oria kpobi, yọ uyero abọ-ẹzi na u re siuru jẹ rọ orọ ufuoma. (Ol. 133:1) Agbẹta nọ uzoge jọ ọ rọ ta nọ: “Me re kpohọ isukulu kẹdẹ kẹdẹ, yọ o rẹ lọhọ omẹ oma. Rekọ iwuhrẹ na e wọhọ ẹtẹre-ame evaọ udhude, oria nọ mẹ rẹ jọ ru oma mẹ kpokpọ re mẹ sae rria te okpẹdẹ isukulu ọfa.” Ọfa jọ ọ ta nọ: “Mẹ ruẹ no inọ usu okpekpe kugbe amọfa nọ a you Jihova u bi fiobọhọ k’omẹ sikẹle iẹe.”

⁴ Ẹkwoma odẹ ufihotọ evaọ Isukulu Odibọgba Ọghẹnẹ na, whọ rẹ sai wuhrẹ epanọ a re ro koko evuẹ Ebaibol họ, ruẹrẹ ae fihọ ẹme, jẹ tae evaọ edhere ẹmeọta-kugbe rọkẹ ogbotu nọ ọ rrọ Ọgwa Uvie. Dai roro erere nọ ọ riẹ re a wuhrẹ owhẹ epanọ who re ro wuhrẹ amọfa uzẹme uzuazọ usiwo nọ o rrọ Ẹme Ọghẹnẹ na avọ ona! Diẹse ọfa izoge e jẹ sai wo ewuhrẹ ọghaghae otiọye na?

⁵ Epanọ A Sai Ro Wo Erere Nọ Ọ Mae Rro No Iwuhrẹ Ze: Re a wo erere nọ ọ mae rro no iwuhrẹ ze, eware esa jọ e r’oja. Enana họ oma-oruẹrẹhọ, abọ-owo, gbe efihiruo eme na.

⁶ Ruẹrẹ Oma Họ Kẹ Ae: Ru uvẹ fihọ kẹse kẹse re whọ rọ ruẹrẹ oma kpahe kẹ iwuhrẹ na. Whọ kuvẹ hẹ re iruo isukulu, iruo ubroke, hayo iruẹru oma-urukpokpọ i mi owhẹ oke nọ o gwọlọ nọ whọ rẹ rọ ruẹrẹ oma kpahe kẹ iwuhrẹ. O rẹ kẹ erere re a wo emamọ omaa iruo. Orọ ọsosuọ kpobi, nya lele omaa isase Ebaibol ẹkpoka orọ Isukulu Odibọgba Ọghẹnẹ na. O rẹ rehọ umutho iminiti jọ ọvo kẹdẹ kẹdẹ re a se je roro kpahe izou nọ a fodẹ nọ a se na. Ru uvẹ fihọ rọ ruẹrẹ oma kpahe kẹ Uwuhrẹ Obe Ukoko gbe Ewuhrẹ Uwou-Eroro na. Ahwo jọ a re ru onana ẹdẹ ọvo hayo ivẹ taure edẹ iwuhrẹ na i te te. Epanọ o rẹ lọhọ te kpobi, ru epọvo na re kpahe abọ nọ a m’omaa rai fihọ Ewuhrẹ Odibọgba k’oka k’oka na.

⁷ Jarae w’Obọ: Ebaibol na ọ ta nọ evaọ okenọ ọ jọ ikpe 12, a ruẹ Jesu evaọ etẹmpol na, nọ ọ be kezọ, nọ enọ, jẹ be k’iyo. (Luk 2:46, 47) Koyehọ, ọ roma kpobi kẹe riẹriẹriẹ. Who ti wo erere no iwuhrẹ na ze viere evaọ okenọ whọ tẹ daoma re whọ jarae w’obọ.—Itẹ 15:23.

⁸ U fo re who fi iroro ra kpobi họ oware nọ a bi wuhrẹ evaọ obọ iwuhrẹ na. Ẹsejọ, re a kezọ kẹ ovuẹ o rẹ bẹ vi ovuẹ nọ a rẹ kẹ. Fikieme? Iroro mai e rẹ sai ghoro nọ omọfa ọ tẹ be t’ẹme. Kọ ẹvẹ ma rẹ rọ họre onana? Ẹkwoma eme nọ ma re kere fih’otọ. Kere eme nọ i wuzou nọ who ti ro ruiruo okiofa fih’otọ. Eme nọ a re kere i ti fiobọhọ kẹ owhẹ t’iroro ra vi ọruẹrẹfihọ ewuhrẹ na. Ofariẹ, rovie Ebaibol ra, je rri rie nọ oruẹme na o te bi se ikereakere na.

⁹ Fibae, ru ei fihọ ute re who w’obọ evaọ ẹmeọta enọ gbe iyo evaọ obọ iwuhrẹ na. Who ti tube wo erere viere dede otẹrọnọ who re roro ziezi kpahe ẹme nọ whọ gwọlọ ta na tao. Itẹ 15:23 o ta nọ: “Re a kẹ uyo nọ u kiete yọ oware evawere kẹ ohwo.”

¹⁰ Fi Oware nọ Who Wuhrẹ h’Iruo: Owojẹ urere họ re whọ ruẹ nọ oware nọ who wuhrẹ na o ‘rọ oma ra ru iruo.’ (1 Tẹs. 2:13) Nọ who bi fi eware iwoma nọ who wuhrẹ evaọ iwuhrẹ na h’iruo na, who ti sikẹle Jihova Ọghẹnẹ viere. Ọ te jọ ohwo nọ ọ ghinẹ rrọ k’owhẹ, yọ whọ te ruẹ oghọghọ ulogbo gbe evevọwẹ nọ whọ be ruabọhọ ẹnya evaọ “uzẹme na,” bi ru ei fihọ orọ obọ ra na.—3 Jọn 4.

¹¹ Inievo ọ izoge emezae gbe emetẹ, nọ wha be ruẹrẹ oma kpahe ẹsikpobi kẹ iwuhrẹ na, be jarae w’obọ, je fi eware nọ wha wuhrẹ h’iruo na, wha te reawere iwuhrẹ na vọvọ. Eva oke ovona, wha ti wo erere kpobi nọ wha rẹ sai wo no ai ze. O te bọ ẹrọwọ rai ga, wọhọ epanọ o te bọ ọtamuo rai ga na re wha gbẹ roma kpotọ kẹ Ọsẹ obọ odhiwu rai, Jihova.—Ol. 145:18.