Wo Erere No Ọruẹrẹfihotọ Ewuhrẹ Jihova Ze
1 Ọmoha jọ evaọ obọ United States o wo iruo ọghọ ilogbo jọ—iruo evaọ ekọmpene ekwakwa ẹmuofio gbe erọ idedeghe. Rekọ nọ o je wuhrẹ Ebaibol na, o te vuhumu nọ iruo riẹ na e wọso ehri-izi Ebaibol. (Aiz. 2:4) Iroro-oziẹbro riẹ i te je kpokpo iei. Ọ ruẹ vevẹ nọ ọ te sae jọ iruo riẹ na ọ vẹ jẹ jọ okiovo na yọrọ iroro-oziẹbro efuafo ho. (1 Pita 3:21) Epọvo na re, ahwo buobu nẹnẹ a raha ikpe buobu no evaọ ilale ogha-ewuhrẹ jọ nọ a vuhumu uwhremu na evaọ uzuazọ rai inọ o wọso ehri-izi Ebaibol. Ẹvẹ ma sae rọ riẹ ogha-ewuhrẹ nọ o te wha irere ikrẹkri ze?
2 Ọruẹrẹfihotọ Ewuhrẹ Okpehru Jihova: Jihova o bi wuhrẹ omai uvi ẹjiroro uzuazọ gbe epanọ ma rẹ rọ rehọ izuazọ mai ruiruo nọ e rẹ mae kẹ erere. O bi wuhrẹ omai re ma ru emamọ iruo. (Ẹf. 4:28) O bi wuhrẹ omai epanọ ma sai ro wo ẹnyaharo evaọ ewoma izuazọ mai evaọ abọ iroro, uruemu, gbe evaọ abọ-ẹzi. O bi wuhrẹ omai epanọ ma sae rọ rria evaọ udhedhẹ kugbe inievo mai, uviuwou mai, gbe erivẹ mai. O bi ru onana ẹkwoma obe riẹ, Ebaibol na, gbe ẹkwoma ukoko riẹ.
3 Iwuhrẹ ukoko mai i wuzou gaga evaọ abọ nana re. Nọ ma bi kpohọ je bi w’obọ kẹse kẹse evaọ iwuhrẹ isoi na kpobi na, ma bi wo ewuhrẹ ọkẹkẹe wọhọ egbodibo emamọ usi na gbe obọdẹ ewuhrẹ ọliọliọ kpahe ẹria uzuazọ Oleleikristi. (2 Tim. 3:16, 17) Owuhrẹ Ologbo mai ọ be jẹ k’omai ewuhrẹ Uvie efa ẹkwoma ikokohọ esese gbe ilogbo. Ute mai o rẹ jọ inọ uvumọ ewuhrẹ hayo abọ riẹ jọ o re vo omai vievie he otẹrọnọ oma mai o ga yọ uyero mai o k’omai uvẹ nọ ma rẹ rọ nya.
4 O Rọ Edhere Obokparọ: Eva Olezi 1:1-3 ma se nọ: “O ghale ohwo nọ ọ rẹ nya evaọ edhere ahwo omuomu hu. . . . Awere riẹ ọ rẹ jọ evaọ uzi ỌNOWO . . . Koware koware nọ o ru, u re woyei obọ.” A re duku uvi obokparọ evaọ Ọghẹnẹ nọ a re ru eva were—kugbe elele uzi Jihova nọ a re duku evaọ Ebaibol na nọ a bi je ru vẹ eva iwuhrẹ Ileleikristi na.
5 Ọmoha nọ a jọ edhe-ẹme emuhọ fodẹ na o te mu Isẹri Jihova họ elele kpohọ iwuhrẹ je fi ewuhrẹ Jihova họ iruo evaọ uzuazọ riẹ. Ọ tẹ nyasiọ iruo osa ulogbo riẹ ba, ọ tẹ rehọ iruo ekpokpọ nọ e kẹ riẹ ‘iroro-oziẹbro ovevẹ’ kugbe Jihova. Ọ tẹ rehọ uzuazọ riẹ mudhe kẹ Jihova je bi ruiruo wọhọ ọkobaro. Enẹna ọ sae ta nọ: “Vẹre, uzuazọ mẹ kpobi o jọ orọ ebabọ ekwakwa ilogbo ẹmuofio rọkẹ ikpakpe erivẹ. Rekọ Jihova, ẹkwoma aruoriwo riẹ, o rovie edhere na k’omẹ avọ uviuwou mẹ re ma zihe ro idibo riẹ nọ e rehọ oma mudhe no jẹ rehọ izuazọ mai kẹ emamọ usi orọ uzuazọ ebẹdẹ bẹdẹ evaọ aparadase otọakpọ nọ ma rẹ wha se ahwo.”
6 Joma rehọ osegboja gwọlọ re Jihova o wuhrẹ omai, rọkẹ ujiro Riẹ gbe erere ebẹdẹ bẹdẹ mai!—Aiz. 48:17.