Kpohọ Ikokohọ Evaọ Eria nọ Ukoko Jihova O Ruẹrẹfihọ
1 Ahwo Jihova a be hae tha ọruẹrẹfihotọ nọ o ru kpahe eria egagọ uke ẹsikpobi. Evaọ otọ Uvie okugbe Izrẹl na, a juzi kẹ emọ Izrẹl nnọ a kpohọ Jerusalẹm, “orẹwho nọ ỌNOWO na ọ ha no udevie erua Izrẹl na kpobi ze, re o fi odẹ riẹ họ etẹe,” vrẹ ẹsiẹvo egbukpe.—1 Iv. 14:21; Ọny. 34:23, 24.
2 O Gwọlọ Ẹzi Oma-Urodheidhe: Emọ Izrẹl buobu a jẹ ria thabọ no Jerusalẹm yọ a rẹ nya owotọ edẹ buobu re a te te Jerusalẹm. Rekọ enọ i se edikihẹ abọ-ẹzi rai gboja evaọ udevie rai a wo ovuhumuo kẹ ikokohọ ilogbo enana a te je ru omadawọ ogaga nọ o gwọlọ re a jariẹ. A wo ovuhumuo kẹ ọruẹrẹfihotọ Jihova, nọ a riẹ nọ o rọ kẹ ewoma okrẹkri rai na.—Luk 2:41.
3 Uzẹme, erẹ ugbothabọ re a kpohọ ikokohọ ilogbo o sae gwọlọ omodawọ. Ghelọ omodawọ nọ o rẹ sae gwọlọ, oghọghọ gbe irere abọ-ẹzi nọ a re wo no ikokohọ mai ze i wo ibe he. (2 Irv. 30:26; Neh. 8:17) Ikpe nọ i kpemu no, inievo mai a ru omodawọ ogaga re a kpohọ ikokohọ nọ a jẹ hae wọ n’oria ruọ oria—ejọ rai nọ i thabọ gaga no iwou rai. (yb86-E 198-199) Iriruo ọgbọna e riẹ erọ ahwo nọ a rẹ nya ugbothabọ re a jariẹ. Ndjaukua Ulimba, ọzae nọ ọ kpako te ikpe 73 no ọ rẹ nya ikilomita 450 ẹsibuobu yọ o rẹ rehọ iẹe edẹ 16 re o te te ọgwa okokohọ na evaọ oria riẹ!—Rri w98-IS 5/1 ẹwẹ. 32; km-IS 9/98 3 edhe. 3-4.
4 Kọ whọ ruẹrẹ oma kpahe re whọ rẹriẹ ovao ku ebẹbẹ, edawọ, gbe use-abọ nọ e sae romavia evaọ edẹ urere enana re whọ sai ru ehaa kugbe ahwo Jihova? Wọhọ epanọ Pọl ukọ na ọ kareghẹhọ omai evaọ Iruẹru 14:22: “Udevie ikpokpoma buobu ma rẹ nya vrẹ ruọ uvie Ọghẹnẹ.” Fikiere, whọ jọ ofa nọ o ghare, hayo idhere nọ i woma ha e k’owhẹ oyẹlẹ hẹ nọ whọ rẹ rọ se use na re a kokohọ rọkẹ uthubro Ọghẹnẹ. Eru omodawọ nọ o gwọlọ avọ isiuru egaga re whọ jariẹ evaọ ikokohọ ilogbo kpobi nọ Jihova ọ ruẹrẹfihọ ẹkwoma ukoko riẹ o te ghinẹ wha eghale abọ-ẹzi ze, ‘keme ẹdẹ ọvo evaọ ọgua Jihova o woma vi edẹ odu evaọ oria ofa.’—Ol. 84:10.
5 Who Dhesẹ Ẹzi Mẹrẹjọmẹsa Ha: O be hae kẹ iwhowho-uvie buobu idhọvẹ evaọ okenọ Society ọ gbẹ rọwo fihọ isiuru rai kẹ Ọgwa Okokohọ ofa ha u te no ọnọ a bi jo ru okokohọ enẹna no fiki ẹjiroro jọ. Uyoma gaga, ahwo jọ a veghe uzou no wọso oria nọ a fi rai họ jẹ se nọ a re kpohọ ikokohọ họ dede nọ a wo edhere nọ a sae rọ nya, hayo a bi wo ehoo ẹnya fikiọ ova-ehru gbe idhere nọ i woma te he. Onana u fo ho. Uduotahọ amọfa awọ re a gbabọkẹ ọruẹrẹfihotọ Ọghẹnẹ evaọ eme wọhọ onana u fo ho, yọ u re dhesẹ ẹzi mẹrẹjọmẹsa. (1 Kọr. 4:2) Nọ ukoko na o rẹ daoma re o ru ei kiehọ inievo na oma evaọ oria nọ o jọ lọhọ kpobi na, okejọ o rẹ sae jariẹ nọ a re ro s’omai re ma ru oware nọ u wo erere kẹ amọfa jẹ rọ erere kẹ ukoko na. Ma te ru oware nọ o rẹ were Jihova eva jẹ gwọlọ orọnikọ erere omobọ mai ọvo ẹsikpobi hi, orọnikọ amọfa a re wo erere ọvo ho, rekọ evaọ ekuhọ riẹ ma re wo eghale Jihova.—Rom 15:1, 2; 1 Kọr. 10:31-33; 1 Tẹs. 2:4.
6 Muẹrohọ Eware nọ E Mae r’Oja: Evaọ uzẹme, u fo re mai kpobi, wọhọ emọ Izrẹl ẹrọwọ na ma mai wo isiuru kpahe emu abọ-ẹzi na vi oria nọ Ọgwa Okokohọ na ọ rọ. Dede nọ eruo ikokohọ okogho gbe erọ obọdẹ evaọ okegbe ohwo o sai kiehọ ahwo kpobi oma, itieye na e rẹ sae lọhọ ẹsikpobi hi yọ e rẹ rehọ igho buobu. Igho gbe ekwakwa nọ o rẹ rehọ re okogho ọvuọvo o wo ọgwa obọ riẹ o sae rro vi ebẹbẹ nọ e r’otọ obọnana. Roro kpahe unuigho ebabọ na, ẹruorote, gbe ẹraha ọkpakpata ọrọ iwou na fikinọ a be rehọ ae ruiruo ẹsikpobi hi. Evaọ uzẹme, o rẹ sae whaha ẹruọsa nọ a hae rọ kẹ eware nọ e mae r’oja, otẹrọnọ a mu riẹ họ evaọ okenọ o gbẹ r’oja gaga ha.
7 Ọtamuo mai ọ rẹ jọ re ma dhesẹ ẹzi ọso-ilezi na wọhọ epanọ a dhesẹ evaọ Olezi 122:1: “Eva e were omẹ hrọ nọ a ta kẹ omẹ nọ, ‘Ma kpo obọ uwou ỌNOWO!’ ” Tha ọruẹrẹfihotọ Jihova uke avọ oruọzewọ gbe ajọwha ẹkwoma ekpohọ ikokohọ evaọ eria nọ a ruẹrẹfihọ na. (Hib. 10:24, 25) Omodawo kpobi nọ ma ru re ma sai wo uthubro abọ-ẹzi o te jọ kẹ erere ebẹdẹ bẹdẹ mai.