Se Isẹri Wọhọ Emamọ Ọrivẹ
1 Jesu ọ ta nọ “you omọfa epanọ who you oma ra.” (Mat. 22:39) Ababọ avro, who bi “ru iruo ezi” kẹ ibe enọ e rọwo, kọ whọ sai ru uyoyou ra kẹre te enọ e be rria kẹle owhẹ? (Gal. 6:10) Evaọ edhere vẹ?
2 Ẹkwoma Edhesẹvia Omara: Kọ erivẹ ra a riẹ nọ whẹ yọ Osẹri? Otẹrọnọ a riẹ ere he, emejabọ who gbe weze bru ai evaọ usiuwoma ota ha? Iyẹrẹ na e sai gbe owhẹ unu! Hayo otẹrọnọ o te mai kiehọ owhẹ oma ere, daoma se isẹri kẹ ai evaọ edhere ọnyakuo. Okenọ whọ tẹ rọ otafe, whọ rẹ sae ruẹ e rai nọ a be jọ ighẹ rai ruiruo hayo nọ a be nya evaọ iyẹrẹ na. Nya bru ae avọ ovao nọ o rọ sasasa. Daoma t’ẹme kpahe ẹrọwọ ra, oria nọ Ọgwa Uvie na ọ rọ, gbe oware nọ a re ru evaọ etẹe, jẹ fodẹ amọfa jọ evaọ okegbe na nọ i bi kpohọ etẹe. Zizie ai re a nyaze iwuhrẹ na. Daoma se emamọ isẹri kpahe emamọ usi na kẹ ahwo kpobi nọ whọ riẹ.—Iruẹru 10:42; 28:23.
3 Ẹkwoma Emamọ Uruemu Ra: Uruemu owhẹwhẹtiẹ ra o rẹ t’ẹme buobu kpahe owhẹ yọ o rẹ sai rovie edhere na re who se isẹri. O rẹ jẹ rehọ “eru kẹ uwuhrẹ Ọghẹnẹ.” (Tait. 2:7, 10) Dhesẹ uvi isiuru kẹ erivẹ ra. Jọ whẹtiẹwhẹtiẹ avọ ororokẹ. Rọ adhẹẹ kẹ abọ uzuazọ rai nọ o kuoma dhere gbe okegbe rai nọ ọ rrọ dhedhẹ. Otẹrọnọ ọjọ ọ be mọ, dhesẹ ororokẹ re whọ jẹ kẹ obufihọ. Okenọ uviuwou okpokpọ jọ o tẹ kwa ziọ okegbe na obọ, wẹriẹ re who dede ae rehọ. Iruemu ẹwo itieye i re wo emamọ okpomahọ yọ e rẹ were Jihova eva.—Hib. 13:16.
4 Ẹkwoma Epanọ Ekwakwa Ra E Rọ: Re whọ jọ emamọ ọrivẹ o kẹre te ẹruorote uwou ra re o jọ fuafo. Uwou gbe ighẹ nọ e rọ fuafo je wo erru yọ isẹri k’omarai. Rekọ uwou nọ o rọ gbegbe hayo onọ u wo ekwakwa nọ a gbabọkẹ no nọ e wariẹ e riẹ họ o sae kpọ ovao ahwo no ovuẹ Uvie na. Fikiere, u wuzou gaga re who ru uwou, ighẹ, gbe imoto ra jọ fuafo jẹ jọ kpatiẹ.
5 Edhesẹ ọdawẹ kẹ ahwo nọ e rọ otafe ukoko Ileleikristi na u re dhesẹ uyoyou kẹ erivẹ ra. Eme ọ rẹ sai noi ze? O sae jọ nọ fiki “iruo iwoma rai” nọ a be ruẹ, ejọ evaọ usu rai a vẹ te “kẹ Ọghẹnẹ oro.”—1 Pita 2:12.