Uwuhrẹ Ebaibol Uviuwou Ẹsikpobi—Fikieme U je Wuzou Tere?
1 “Ẹvẹ mẹ vọ avọ uyere te kẹ Jihova fiki ewuhrẹ nọ ọsẹ gbe oni mẹ a kẹ omẹ! Mẹ riẹ nọ o zọhọ fihọ ukoko Jihova nọ mẹ rrọ kpekpekpe kugbe ẹsikpobi na.” Eme eyena nọ omọvo Ugboma Esuo na ọ ta na i fielo họ okpomahọ ologbo ọrọ uwuhrẹ Ebaibol uviuwou ẹsikpobi. Ghelọ omodawọ ikẹdẹ kẹdẹ re a sae rria, fikieme a jẹ yọrọ uwuhrẹ Ebaibol uviuwou ẹsikpobi?
2 Dhesẹ Uyoyou kẹ Ọghẹnẹ: Uyoyou udidi kẹ Ọghẹnẹ o rẹ wọ omai re ma nya lele ithubro riẹ kpobi. (1 Jọn 5:3) Onana o kẹre te ewuhrẹ emọ mai no oke emaha ze. (Izie. 6:5-7) Emọ a wo isiuru re a wuhrẹ ai. A rẹ kaki muẹrohọ je yo oware kpobi nọ ma ru jẹ ta yọ a rẹ raro kele oriruo mai vẹrẹ gaga. (Itẹ 20:7) Fikiere u fo nọ ekwakwa Ọghẹnẹ e rẹ kake jọ udu esẹ gbe ini na. Edhesẹ ekwakwa Ọghẹnẹ itieye na yọ imuẹro uyoyou kẹ Ọghẹnẹ.—Itẹ 27:11.
3 O rẹ Jọ Ekpọfia: Nọ o rọnọ emọ mai a rọ igbori evaọ uzuazọ na, Setan gbe akpọ omuomu riẹ a be rẹriẹ ovao ku ai. A bi tunyẹ ai re a le ekwakwa efe gbe itee akpọ. Emọ Ileleikristi a gwọlọ obufihọ re a tẹrovi itee abọ-ẹzi, ogbẹrọ ere he a re kie lọlọhọ.—Rom 12:2.
4 Uwuhrẹ Ebaibol uviuwou ẹsikpobi, onọ o rọ owowa o rẹ sai fiobọhọ kẹ emọ re a wo itee Ikereakere nọ i wo erere. Enana i kugbe isase Ebaibol omobọ ohwo ẹsikpobi, kẹdẹ kẹdẹ; ẹjọ owhowho-uvie nọ ọ te họ-ame he, gbe ẹnyaharo kpohọ omarọkẹ gbe ame-ọhọ. Itee efa e sai kugbe ẹjọ ọkobaro obufihọ, ete kẹ iruo odibọgba oke-kpobi wọhọ ọkobaro, iruo Ebẹtẹle; hayo ekpohọ Isukulu Ewuhrẹ Odibọgba na. (Ol. 110:3) Ababọ avro, itee Ikereakere itieye na i re fiobọhọ kẹ emọ yerikugbe akpọ nọ ebẹbẹ e vọ nẹnẹ na.—Ol. 119:93.
5 Hai Wuhrẹ Ai Edhere Ọghẹnẹ: Ẹbọ uviuwou ogaga abọ-ẹzi o rẹ rehọ ona gbe oke. Whọ jọ oware ovo o whaha owhẹ hẹ evaọ ẹrehọ oke nọ u fo re whọ rọ bọ uviuwou ra ga je wuhrẹ ai. Ruẹ nọ ahwo kpobi evaọ uviuwou na a riẹ oke uwuhrẹ uviuwou na gbe obe nọ a ti wuhrẹ na. Fiobọhọ kẹ ai ru edhere Ọghẹnẹ fihọ ọrọ obọ rai. (Ol. 119:33, 34, 66) Dadamu evaọ omodawọ ra re who wuhrẹ Ebaibol na kugbe uviuwou ra ẹsikpobi. U wo aghare vi “erere” iwo jọ kpobi.—Ol. 119:36.