Fiobọhọ kẹ Emọ Ra m’Omaa jẹ Rehọ Etoke Ehọlide Ruiruo avọ Areghẹ
1 Kọ o gbẹ rọ uzẹme inọ ma rẹ mae nyate itee eghaghae mai evaọ okenọ ma tẹ m’omaa edhere nọ ọ mai woma nọ ma rẹ rọ rehọ oke nọ ma wo ro ruiruo? Etoke ehọlide na ọ rẹ kẹ izoge mai buobu nọ e rọ isukulu eriosehọ no iruẹru isukulu rai. Ghele na, o sae jẹ via nọ a rẹ nyasiọ emọ buobu ba ababọ ẹromuhọ evaọ etoke ọnana a vẹ rehọ oke rai ruiruo thọthọ. (Itẹ 29:15) Fikiere, izoge buobu e sae raha abọ buobu etoke ehọlide rai ro rri etẹlivisiọne hayo ividio oghẹrẹ sa-sa hayo w’obọ evaọ iruẹru efa nọ e rẹ raha oke hayo enọ i fo ho. Rekọ u fo ho re onana o jọ ere.
2 Eyewọ, etoke ehọlide na ọ rẹ k’owhai emamọ uvẹ nọ wha rẹ rọ m’omaa iruẹru nọ e rẹ k’erere wọhọ uviuwou. Eyewọ buobu e ruẹ no nọ erere ọ riẹ re a m’omaa ilivi ẹgbukpe rai kie fihọ etoke ehọlide emọ rai jọ re uviuwou na o sai wo oke eriosehọ je kpohọ erẹ kugbe wọhọ oghẹrẹ oma-usehọ no iruẹru ekẹdẹ kẹdẹ rai. O sae jẹ kẹ uviuwou na uvẹ nọ a re ro w’obọ evaọ ẹwhaharo isiuru uvie na. (Itẹ 21:5) Ẹvẹ oyena o sae rọ jọ ere?
3 Fikieme wha gbẹ m’omaa wọhọ uviuwou ho re wha ru iruẹru usiuwoma ota rai wo ẹvi evaọ etoke ehọlide jọ? Etoke eriosehọ isukulu o rẹ kẹ izoge na uvẹ re a ru iruo ọkobaro obufihọ. Esẹ gbe ini e tẹ m’omaa ziezi, o rẹ sae lọhọ kẹ ae re a ru iruo ọkobaro na kugbe emọ rai. August nana, nọ ukpe iruo na u bi kuhọ na, ahwo kpobi a rẹ daoma gaga re a w’obọ vọvọ wọhọ epanọ o rẹ lọhọ te kpobi evaọ odibọgba na. Otẹrọnọ wha m’omaa re wha w’obọ evaọ odibọgba na viere wọhọ uviuwou, koyehọ ahwo kpobi a re ruiruo re a ru ei kparobọ.—Itẹ 15:22.
4 Kọ whọ sae m’omaa re who fiobọhọ kẹ ukoko ekẹloma jọ nọ o gwọlọ obufihọ evaọ eru reno ẹkwotọ riẹ? Wha sae m’omaa wọhọ uviuwou re wha ta usiuwoma evaọ ekwotọ nọ a re jo ruiruo otiẹse hayo ekwotọ nọ a ghale kẹ ahwo ho.—Mat. 24:14.
5 Evaọ abọdekọ riẹ, otẹrọnọ whẹ avọ uviuwou ra wha ti kpohọ erẹ evaọ eria jọ, m’omaa re wha kpohọ iwuhrẹ je w’obọ evaọ usiuwoma ota na kugbe ukoko nọ o rọ etẹe. Wha tẹ kpahe imoni ra nọ e rọ Isẹri hi, ruẹrẹ idhere nọ whọ sae rọ ghale uzẹme na kugbe ai fihọ.—Rri Uwou-Eroro Na ọrọ February 15, 1990 (ọrọ Oyibo), ẹwẹ-obe 25-27.
6 Didi omaa whọ be maa kẹ etoke ehọlide n’otha na? Ababọ avro whọ gwọlọ nọ uviuwou ra u wo omosasọ ugboma. Rekọ who rri uvẹ nọ o mai wuzou nọ whọ rẹ rọ kẹ uviuwou ra ọwhọ evaọ abọ-ẹzi vo ho ẹkwoma isiuru Uvie na nọ wha rẹ rọ karo ẹsikpobi evaọ uzuazọ rai.—Mat. 6:33; Ẹf. 5:15, 16.