Jọ Odibọgba Ra Nyaharo Evaọ Abọ-Ẹzi
1 Jesu Kristi ọ kẹ ilele riẹ ujaje re a jọ evuovuẹ ọ “usiuwoma uvie na.” (Mat. 24:14) Iwhowho-uvie emamọ usi na buobu i ti muhọ kri hi, yọ ẹsejọhọ a ti wo ona te ere evaọ odibọgba na ha. Kọ whẹ yọ omọvo rai jọ? Kọ ẹvẹ whọ sai ro ru ẹnyaharo re who ‘ru odibọgba ra gbunu’?—2 Tim. 4:5.
2 Wo Eriwo Ọliọliọ: Rri iruo usiuwoma ota na wọhọ “efe,” uvẹ-ọghọ. (2 Kọr. 4:7) Nọ ma te duomahọ odibọgba na, yọ ma bi dhesẹ uyoyou, omarokpotọ, gbe edikihẹ ga mai kẹ Jihova. Yọ ma bi je dhesẹ isiuru nọ i n’evaze nọ ma wo kẹ erivẹ mai via. (Luk 10:27) Jesu Kristi, Oriwiruo mai, o wo eriwo ọliọliọ kpahe iruo usiuwoma ota na. O wo ohrọoriọ kẹ ahwo yọ ẹsikpobi ọ ruẹrẹ oma kpahe re o fiobọhọ. (Mat. 8:3) Evaọ aruorokele Jesu Kristi, o gwọlọ nọ oma o rẹ wọ owhẹ re who w’obọ evaọ iruo na wọhọ epanọ oma gbe iyero ra e kuvẹ te.
3 Fi Omovuọ Kparobọ: Iwhowho-uvie emaha gbe ibuobu nọ i muhọ obọ a re lele omovuọ muabọ. Rekọ a rẹ sai fi omovuọ kparobọ. Omọvo Ugboma Esuo na jọ ọ ta kpahe omariẹ okejọ nnọ: “Nọ mẹ ruọ emuhọ etoke ikpe ikpegbọ mẹ, me te zihe ruọ ohwo nọ ọ rẹ dhomovuọ gaga vi epaọ anwẹdẹ. Omovuọ nana o wha ọzadhe ologbo ze evaọ idhere buobu rekọ maero evaọ abọ edhesẹ via ẹrọwọ mẹ evaọ ẹvuẹ emamọ usi Uvie na.” Kọ ẹvẹ o ro fi ẹbẹbẹ nana kparobọ? Ọ ta nnọ: “Jihova ọ rẹ yare oware nọ ọ riẹ nnọ ma rẹ sai ru hu mi omai hi. Dede na, fiki ẹgba riẹ ọvo ma sai ro ru oware nọ ọ yare. Yọ oware ofa họ—otẹrọnọ who ghine you inievo ra nọ wha gbe bi ruiruo na, a rẹ tha owhẹ uke.” Evaọ uzẹme, iwhowho-uvie nọ i wo ona nọ who re lele ruiruo ẹsikpobi evaọ ukoko na yọ obufihọ ulogbo evaọ efikparobọ ẹbẹbẹ omovuọ.
4 Ru Ona Usiuwoma Ota Ra Woma Viere: Isukulu Odibọgba Esuo-Ọghẹnẹ na gbe Ewuhrẹ Odibọgba na e rẹ kẹ obọdẹ ewuhrẹ evaọ abọ ọnana. Efihiruo oware nọ who wuhrẹ no iwuhrẹ nana ze o rẹ sai ru ẹnyaharo ra evaọ odibọgba vẹrẹ. A be hae jọ iwuhrẹ enana jiroro k’omai ẹsikpobi nnọ ma hai wuhrẹ ẹmeọta mai evaọ omaruẹrẹhọ kẹ odibọgba na. Oyena u re ru ẹriẹriẹ ẹmeọta ra nyaharo, ru usiuwoma ota ra wo ẹgba viere, jẹ bọ evaifihọ ra ga. Wọhọ epanọ o rẹ ghinẹ jọ, epanọ ma ru odibọgba na woma te, ere ma rẹ reawere riẹ te jẹ ruẹ iyẹrẹ te re.
5 Lẹ se Jihova: Nọ ma te ru utho ẹgba mai re ma fi ezadhe ẹnyaharo abọ-ẹzi kparobọ no, ma rẹ lẹ kẹ ẹzi Jihova re o fiobọhọ k’omai kparobọ. (1 Jọn 5:14, 15) Ọ rẹ kẹ omai ogaga nọ u vi orọ igheghe.—2 Kọr. 4:7.
6 Ẹhẹ, orọnikọ oghọghọ gbe evawere obọnana ọvo ẹnyaharo nọ who ru o re fiobọhọ kẹ owhẹ wo ho rekọ u re je ru owhẹ wo oria evaọ akpọ ọkpokpọ Ọghẹnẹ re, oria nọ whọ jẹ sae nyaharo bẹdẹ bẹdẹ evaọ otọ Uvie odhiwu riẹ.