Thihakọ Evaọ Iruo Ọkobaro Na
1 Avro ọ riẹ hẹ inọ ma wo ovuhumuo kẹ ekobaro nọ e rrọ udevie mai na. A bi ruiruo gaga re a gwọlọ enọ i te via evaọ ekwotọ ikoko rai. Fikiere, mai kpobi ma rẹ ghọghọ nọ a tẹ rehọ ekobaro efa ghale ukoko mai.
2 Dede na, evaọ oke nọ u kpemu kẹle na, idu ekobaro jọ i whrehe no. Nọ ebẹbẹ kakao jọ e tẹ romavia, a ve no iruo odibọgba oke-kpobi na. Evaọ ukpe iruo ọ 2001 na, ekobaro 1,176 evaọ Nigeria i zihe kpohọ iwhowho-uvie. Eware buobu e sae whae ze, ẹsejọhọ otunyẹ edẹ urere ebẹbẹ nana, ẹbẹbẹ ẹyao ọgaga jọ, ẹruorote ọsẹ hayo oni ohwo hayo ọrivẹ-orọo ohwo, evihọ ewha-iruo uviuwou, gbe eware itieye efa. (2 Tim. 3:1) Ma weri kugbe ahwo nọ u kpomahọ ere na. Re ma whaha etausiuwoma omorọkẹ enana efa nọ i re no iruo na, didi uketha ma rẹ sae kẹ ae? Eme o gwọlọ nọ a re ru re a daji iruo ọkobaro na?
3 Whọ Kuvẹ re Eware Elọhoma I fi Owhẹ Kparobọ họ: Itẹ 24:10 o ta nọ: “Otẹrọnọ udu u no owhẹ awọ oke uye, yọ ogaga ra utuloho.” Ekobaro i wo ebẹbẹ buobu nọ a re lele muabọ. Eme elọhoma i re fiba ebẹbẹ na i ve je ru ai whrehe viere. Nọ iruo odibọgba oke-kpobi e rrọ iruo omarodheidhe na, ekobaro i gbe wo oghọghọ họ a sae daji iruo na ha.—Neh. 8:10.
4 Nọ idibo iruo oke-kpobi i bi lele ibe ẹrọwọ rai ruiruo na, oghọghọ rai u re vi haro otẹrọnọ a wuhrẹ epanọ a re lele amọfa yeri ziezi. Fikiere o gwọlọ re a gbẹ ghọghọ makọ okenọ ohwo jọ o te ru ai eva dha. A rẹ sai ru onana ẹkwoma inievo rai nọ a re rri wọhọ ahwo-akpọ nọ a gba ha wọhọ ae omarai, enọ e rẹ sai ruthọ. (Jem. 3:2) Otẹrọnọ ibe ọgegagọ jọ o ru rie eva dha, ọkobaro ọ rẹ sae lẹ se Jihova re o fiobọhọ kẹe kpairoro vrẹ iruthọ amọfa.
5 Otẹrọnọ ẹyao ọ be kẹ owhẹ elọhoma, who fiomahọ otọ họ. Ekobaro jọ a thihakọ no ghelọ eyao, avọ ovuhumu inọ a te thihakọ edawọ a re dhesẹ Ẹdhọ fihọ ọtọrue.—Itẹ 27:11.
6 Ọkobaro jọ nọ o ru iruo na vrẹ ikpe 45 no ọ rehọ ohrẹ onana kẹ ekobaro nọ ebẹbẹ e nyẹ yaotọ inọ: “U fo re ma roro kpahe eghale buobu nọ ma wo jẹ kpahe idu ọ amọfa nọ a be ruẹ-uye ebẹbẹ nọ e rro vi emai na.” Onana o kẹ omosasọ kẹhẹ!—1 Pita 5:6-9.
7 Tuduhọ Ekobaro na Awọ: Uduotahawọ o rẹ lẹliẹ omai kpobi nyaharo. Omomọvo mai ọ rẹ sai ru abọ ologbo re ọ tuduhọ ekobaro awọ. A gwọlọ uduotahawọ n’obọ idibo nọ a ro mu ze je no obọ iwhowho-uvie ze. Jihova ọ ta kẹ Mosis nọ ọ tuduhọ Joshua awọ jẹ bọe ga. (Izie. 3:28) Kọ whọ sai fiobọhọ kẹ ọkobaro jọ ẹkwoma usiuwoma nọ who re lele iei nya evaọ ẹdẹ-iruo oka na jọ, okenọ ọ rẹ kake ruẹ uvumọ ohwo lele iei kpohọ usiuwoma ha na? Kọ o lọhọ k’owhẹ re whọ rọ uketha kẹ ekobaro evaọ araha-ugho ọ erẹ-ọnya rai hayo araha ọfa evaọ okenọ u te fo? Kọ ẹsejọ whọ sai zizie ai ziọ uwou ra kẹ emuọriọ hayo ghale emu nọ a re there kẹ ae? Kọ ẹvẹ kpahe eme ọbọga erọ ovuhumuo nọ whọ rẹ ta kẹ ae fiki ẹzi omarodheidhe rai?
8 Ẹgwọlọ re A Thihakọ: Ẹnyate ute euwa na o gwọlọ ithihakọ. Avro ọ riẹ hẹ, ẹbẹbẹ ugho hayo ebẹbẹ omobọ ohwo efa hayo ewha-iruo ukoko e rẹ sae whaha ohwo nọ ọ gbẹ nyate ute na ha. Rekọ oware kpobi nọ u ru ọkobaro nọ o je kie kpotọ gaga evaọ ẹnyate ute euwa na, o re gbe te kẹ iruo na ha otẹrọnọ ogbẹgwae iruo ukoko na a ruẹ nọ ẹbẹbẹ na ọ sai kuhọ evaọ umutho emerae jọ họ, ajokpanọ o te kẹ ọkwa ọkobaro nọ a re riwi-aro fikinọ oma rai o ga ha.
9 Fikiere, ahwo nọ a muọ iruo ọkobaro họ no a rẹ sai dhesẹ nnọ a ghine riwi uvẹ-ọghọ rai na ghaghae ẹkwoma ‘ẹya’ gaga evaọ iruo Jihova. (Luk 13:24) Ohwo o re siobọno eware jọ re ọ ruẹse daji iruo odibọgba oke-kpobi na. (Hib. 13:15) O tẹ jẹ gwọlọ nọ ekobaro a rẹ nya lele omaa emu-ẹzi nọ Jihova ọ be kẹ na re a ruẹse jọ gaga evaọ abọ-ẹzi. O gwọlọ omodawọ ogaga gbe emamọ omaa, wọhọ epanọ ekobaro nọ e be kparobọ a sai se-isẹri riẹ.—Ẹf. 5:15, 16.
10 Ekobaro a ghinẹ rrọ oghale kẹ ukoko nọ a rrọ. Fikiere jọ mai kpobi ma fiobọhọ kẹ ae daji iruo na ẹkwoma uketha nọ ma rẹ kẹ ae.