Ileta Nọ I No Obọ Ugboma Esuo Na Ze
Nọ ma be nya ruọ ikpe emuhọ erọ ikpe udhusoi avọ 21 na, o rrọ oware evawere re ma kere se owhai, ‘imoni na kpobi’ wariẹ akpọ na họ, re ma jiri owhai fiki iruo egaga rai. (1 Pita 2:17) Enwenọ ikpe 2,000 nọ i kpemu no, Jesu ọ nọ inọ: “Nọ Ọmọ ohwo ọ te tha, kọ ọ rẹ te ruẹ ẹrọwọ eva akpọ na?” (Luk 18:8) Iruo ọwhọ rai evaọ etoke ukpe iruo n’ukpo na e kuyo oruarua kẹ onọ Jesu na inọ E! A rehọ owhai otujọ j’ijehwẹ je se ẹkoko no fiki ẹrọwọ rai. Evaọ eria buobu, wha thihakọ emo, ọraha okpẹtu, ẹyao, hayo ohọo. (Luk 21:10, 11) Fiki ọwhọ rai kẹ iruo iwoma, Jesu ọ rẹ sae “ruẹ ẹrọwọ eva akpọ na.” Ababọ avro, oghọghọ o rrọ obọ odhiwu fiki oyena!
Ma riẹ nnọ akothiho ọ lọhọ họ. Roro kpahe edawọ inievo mai evaọ orẹwho ukiediwo-ọre Esia jọ. Ozighi mukpahe Isẹri Jihova yọ oware ikẹse kẹse evaọ ẹkwotọ na. Kẹle na, iporisi e wha ozighi fihọ okokohọ ọkpakpatiẹ ahwo nọ a bu te oware wọhọ 700. Edhere nọ a bru dhe o whaha 1,300 efa ẹnya. Otu ugbarugba jọ nọ a ruru ovao rai, enọ ejọ rai e rrọ iporisi, a zighi oria okokohọ na ku, kpe ahwo buobu nọ a kpohọ okokohọ na ukpe ugbobọ, a te tu erae họ ibutu nọ a jẹ te jọ ru okokohọ na. Evaọ etoke efa jọ, ahwo otu-ọwhọ egagọ a rehọ imire nọ a tehe itu fihọ fa inievo mai yoyoma.
Oghẹrẹ ozighi oruo otiọye na o rẹ kẹ uye gaga rekọ u gbunu hu. A kẹ Pọl ukọ na ẹgba ẹzi ro kere nnọ: “Ahwo kpobi nọ a guọlọ uzuazọ Ọghẹnẹ uyero eva Kristi Jesu a re wo ukpokpoma.” (2 Tim. 3:12) Evaọ ikpe udhusoi ọsosuọ, Ileleikristi i thihakọ ukpokpoma ẹmeunu gbe orọ ugbobọ, yọ a tube kpe ejọ whu dede. (Iruẹru 5:40; 12:2; 16:22-24; 19:9) Epọvo na o jọ evaọ ikpe udhusoi avọ 20 na, yọ ababọ avro, o te gbẹ jọ ere evaọ ikpe udhusoi avọ 21 na. Ghele na, Jihova ọ ta k’omai nnọ: “Ekuakua ẹmo ọvo nọ a gali vi owhai nọ i re wo iruo e [rrọ] họ.” (Aiz. 54:17) Imuẹro na e sasa udu kẹhẹ! Uzẹme, ma rrọ ghaghae kẹ Jihova gaga te epanọ ọ rọ ta ẹkwoma Zekaraya ọruẹaro riẹ inọ: “Ọnọ ọ rehọ obọ te [owhai] ọ rehọ obọ te ọmọ-ẹro mẹ.” (Zek. 2:8) Ewegrẹ egegagọ Jihova a sae wo obokparọ riẹriẹriẹ hẹ. Egagọ efuafo e te kparobọ!
Wọhọ oriruo, evaọ orẹwho nọ ma kake fodẹ na, Isẹri Jihova a reawere ẹvi ọkpokpọ ivẹ evaọ unu iwhowho-uvie evaọ etoke ukpe iruo 2001 na. Ẹhẹ, inievo mai a thihakọ evaọ obei ghelọ ọbẹwẹ, wọhọ epanọ a bi ru evaọ eria kpobi na. Wariẹ akpọ na họ evaọ etoke ukpe iruo nọ o vrẹ na, k’oka k’oka ahwo 5,066 e jẹ họ-ame wọhọ oka omaromudhe rai kẹ Jihova. Enẹna ahwo ọkpokpọ nana a gba riẹ mu no, kuomagbe omai kpobi, re a “dikihẹ ga avọ imuẹro eva oreva Ọghẹnẹ.”—Kọl. 4:12.
Je roro kpahe eware nọ e via kẹle na evaọ Grisi. Ghelọ ikpe buobu erọ ọwọsuọ ọgaga n’obọ Ichọche Ọtọdọks ọrọ Griki na ze, enẹna egọmeti o kuenu kẹ Isẹri Jihova no wọhọ “egagọ nọ a riẹ.” Obe nọ o kẹ udu nana o ta haro nnọ uwou Ebẹtẹle nọ o rrọ Grisi na yọ “oria ofuafo gbe onọ a ro mudhe kẹ iruo efuafo gbe egagọ Ọghẹnẹ.” Eva e tẹ jẹ were omai re ma vuẹ owhai nnọ evaọ ukpe iruo nọ o vrẹ na, ekotọ i bru oziẹ buobu kẹ omai evaọ eme nọ i kpomahọ egagọ mai evaọ Bulgaria, Canada, Germany, Japan, Romania, Russia, gbe United States. Ma kẹ Jihova uyere fiki ẹthẹ iruo nọ o rovie fihọ evaọ ekwotọ eyena.
Nọ ma bi roro kpahe idhere nọ Jihova ọ be rọ tha ahwo riẹ uke evaọ edẹ urere nana, ma ruẹ nnọ ọye họ Ogbẹnyusu nọ ọ mai woma kpobi nọ ma rẹ sai wo. Usu nọ ma wo kugbei o be were omai oma, nọ ma riẹ nnọ o you mai, bi wuhrẹ omai, jẹ be kpọ omai vi na. Ẹhẹ, edawọ ẹrọwọ i ti gbe t’omai. Rekọ ẹrọwọ ọgaga fihọ Jihova ọ te sẹro mai. Jemis o kere nnọ: “Imoni mẹ, re egheghẹrẹ edawọ i te te owhai, wha rehọ iẹe avọ evawere, keme na wha riẹ nọ odawọ nọ u te orọwọ rai na, o rẹ rehọ akothiho ọwhawha tha.” (Jem. 1:2, 3) Ofariẹ, akothiho mai o re dhesẹ uyoyou mai kẹ Jihova via, yọ onana o rẹ wha oghọghọ buobu s’omai! Jọ u mu owhai ẹro, inievo eghaghae, inọ Jihova ọ te tha omai omomọvo uke. Otẹrọnọ ma kru ẹrọwọ mai, ababọ avro, o ti fiobọhọ k’omai nya ruọ akpọ ọkpokpọ na. Ọ gwọlọ nọ ma kparobọ.
Fikiere, ma tuduhọ owhai inievo na awọ, te emaha te ekpako, re wha fi obọdẹ eghale nọ e rrọ obaro na h’iroro rai. Ajọ uruemu mai o jọ wọhọ orọ Pọl ukọ na, ọnọ o kere nnọ: “Me kele nọ uye oruẹ oke onana u te nọ a [rẹ] sai kele ie dhe oruaro nọ o te via eva mai hi.” (Rom 8:18) Wha rẹro so Jihova evaọ okenọ wha tẹ rẹriẹ aro dhe okpẹtu oghẹrẹ kpobi. Wha thihakọ, wha fioma h’otọ họ. Wha te vioja vievie he. Ẹme Ọghẹnẹ ọ k’omai imuẹro nnọ: “Enọ i kiẹrẹe e rẹ te zọ fiki orọwọ rai.”—Hab. 2:4.
Inievo rai,
Ugboma Esuo ọ Isẹri Jihova