“Mai Yọ Ibe Iruiruo Ọghẹnẹ”
1 Pọl ukọ na o kere nnọ: “Ẹkọ mẹ kọ, Apọlọs o te ku ame họ, rekọ Ọghẹnẹ o te ru ei rro . . . Mai yọ ibe iruiruo Ọghẹnẹ.” (1 Kọr. 3:6, 9, NW ) Ileleikristi evaọ ikpe-udhusoi ọsosuọ a vuhumu vevẹ inọ obokparọ rai evaọ odibọgba na o roma hwa Jihova Ọghẹnẹ.
2 Eva Ebe-Iwuhrẹ Ebaibol: Ma te woi fihọ iroro nnọ iruo nọ a k’omai na e kẹre te ewuhrẹ nọ ma re wuhrẹ amọfa kpahe eware nọ Kristi o jie na, u fo re ma hae lẹ kpahe iruo aru-ilele mai na. Ere oruo u re dhesẹ evaifihọ Jihova, ọnọ o re ru eware rro.
3 Odibọgba Uvie Mai ọrọ June 1996, ẹwẹ-obe avọ 3, edhe-ẹme avọ 7, o ta nnọ: “Re a rehọ olẹ ọkpọvio gbe oghale Jihova ro mu uwuhrẹ na họ je kuhọ u re fi ọghọ họ uwuhrẹ na, o rẹ lẹliẹ ohwo rọ udu kpotọ, o vẹ jẹ rẹriẹ iroro mai [bru] Jihova wọhọ Owuhrẹ uzẹme na.—Jọn 6:45.”
4 Eware jọ vẹ i fo nọ a re kugbe olẹ evaọ obe-uwuhrẹ Ebaibol? Olẹ oriruo Jesu gbe olẹ Pọl rọkẹ Ahwo Filipai họ obọdẹ iriruo erọ olẹ. (Mat. 6:9-13; Fil. 1:9-11) U du gwọlọ nnọ elẹ mai e rẹ jọ thethei hi, rekọ e rẹ ta kpahe igogo eware jọ. O r’oja re ma ku eme ajiri kugbe ei rọkẹ Jihova fiki obọdẹ iruo riẹ nọ a re kele mu hu. Ma rẹ sai dhesẹ ovuhumuo oruaro riẹ, orro uvie riẹ, gbe ekwakwa egbagba riẹ. (Ol. 145:3-5) Odẹ ọmọ-uwuhrẹ Ebaibol na nọ ma rẹ fodẹ evaọ olẹ na, ẹsejọhọ be fodẹ uyero riẹ, jẹ be lẹ nnọ o ru ẹnyaharo abọ-ẹzi o te kẹe erere. Nọ ọ be nyaharo na, ma rẹ sae yare oghale Jihova kẹ omodawọ riẹ re o kpohọ iwuhrẹ jẹ ghale uzẹme nọ o bi wuhrẹ na kugbe amọfa. Ku ayare ọ eghale Jihova kpahe iruo usiuwoma ota akpọ soso na kugbe ei.
5 Okevẹ u fo nnọ a rẹ rọ lẹ evaọ obe-uwuhrẹ Ebaibol? Olẹ a re ro muọ uwuhrẹ nọ u dikihẹ no họ. Dede na, rehọ oke dhesẹ kẹ ọmọ-wuhrẹ na kpahe epanọ a rẹ lẹ re who te mu olẹ họ evaọ uwuhrẹ. Jọ mai kpobi ma rẹro so Jihova kẹ oghale riẹ kpahe omodawo mai nọ ma bi ru ebe-iwuhrẹ Ebaibol na.