Ividio Nọ E Te K’owhẹ Otoriẹ gbe Ọwhọ!

O jọ April 1951. Isẹri Jihova buobu nọ e jọ Soviet Union vẹre—iviuwou soso—a koko i rai họ, mu ai fihọ imoto nọ a rẹ rọ fa ewha, a te mu ai no ẹwho rai kpohọ Siberia. Fikieme egọmeti ologbo Soviet na ọ rọ gwọlọ voro ai no orẹwho na riẹriẹriẹ? Ẹvẹ inievo mai e rọ zọ jẹ tubẹ kparobọ ghelọ uye ogaga nọ a ruẹ evaọ ikpe buobu na? Whọ te ruẹ iyo na evaọ ividio na Faithful Under Trials—Jehovah’s Witnesses in the Soviet Union. Rri rie, re ovuẹ riẹ nọ o rẹ kẹ otoriẹ na o wọ owhẹ yọrọ ẹgbakiete ra kẹ Jihova, makọ oware nọ o rẹ via kpobi kẹhẹ!

Kọ whọ sae k’iyo enọ nana?

(1) Okevẹ egọmeti ọ kaki ro kuenu kẹ Isẹri Jihova evaọ Russia? (2) Taure Ẹmo Akpọ II o te ti fi gbe okenọ o fi vrẹ no, ẹvẹ Soviet Union o ro wo idu buobu iviuwou Isẹri efa? (3) Ẹvẹ ẹrọwọ rai ọ rọ wọso eriariẹ-ikpehru Lenin? (4) Eme họ Operation North (Ẹgwae nọ a lẹlẹ jọ emu gba evaọ Ẹkpẹlobọ-Ọre), kọ eme Stalin o rẹro nnọ ọ rẹ te rọ ẹkwoma riẹ wo t’obọ? (5) Eme emu kpohọ orẹwho ofa u dhesẹ kẹ isẹri na, kọ eme a ta kẹ ae nnọ a ru re a se ae ba emu kpohọ orẹwho ofa? (6) Evaọ erẹ othethei ọrọ itreni kpohọ Siberia, ẹvẹ inievo mai a rọ ta udu họ owhowho awọ nọ u gbe ahwo nọ a mu rai na unu? (7) Iye vẹ Isẹri na a thihakọ rai evaọ obọ Siberia? (8) Eruẹrẹfihotọ abọ-ẹzi vẹ ahwo Jihova a rri ghare gaga, kọ fikieme? (9) Fikieme u ro no inievo mai eva ze re a fi uzuazọ rai họ awa re a ruẹsi wo ebe tobọ, kọ ẹvẹ a ro fikparobọ ghelọ omodawọ ogaga nọ egọmeti o je ru re ebe na e se ae obọ ba ete? (10) Ẹvẹ Khrushchev ọ rọ ruabọhọ ẹwọso ahwo Ọghẹnẹ? (11) Ẹvẹ ikpahwo egọmeti a rọ daoma re a raha ẹrọwọ emọ Isẹri na? (12) Otoriẹ ogbagba vẹ inievo mai a wo kpahe oware nọ o wha riẹ ze nọ a bi ro kpokpo ai? (2002 Yearbook, ẹwẹ-obe avọ 203-204) (13) Ẹvẹ omodawọ ọwọsuọ kpobi nọ ahwo na a ru kpahe ukoko Ọghẹnẹ o rọ rẹriẹ zihe bru ahwo ọwọsuọ na? (2002 Yearbook, ẹwẹ-obe avọ 220-221) (14) Eware vẹ Isẹri nọ e jọ Soviet Union vẹre na a je siuru rai nọ i te ai obọ uwhremu na? (15) Eme họ oware nọ u fi obọ họ kẹ inievo mai evaọ etoke edawọ rai, kọ ẹvẹ abọ urere ividio na u ro dhesẹ uzẹme ọ Jerimaya 1:19 via? (16) Jọ usu ikuigbe edikihẹga evaọ otọ odawọ na ta kpahe ọjọ nọ ọ mai te owhẹ udu jẹ kẹ owhẹ ọwhọ.