Edhere nọ O Re Su Kpohọ Uzuazọ Ebẹdẹ Bẹdẹ—Kọ Who Duku Ei No?
1 Onana họ uzoẹme ibroshọ ọkpokpọ nọ a si obọ no eva Okokohọ Ubrotọ “Iwhowho Uvie Ajọwha” nọ ma ru kẹle na. Joma wo otoriẹ obọdẹ okwakwa okpokpọ nana nọ a ruẹrẹhọ kẹ ẹkwotọ Africa dẹẹ na. Whọ sae rehọ iẹe ru uwuhrẹ kugbe uviuwou ra je ru iwuhrẹ Ebaibol kugbe amọfa. Ababọ avro, o te jọ usu obọdẹ ekwakwa mai nọ ma re ro mu iwuhrẹ Ebaibol họ! Kọ whọ rọ oma totọ sei no? Iviena ru ere.
2 Mu ẹro họ ihie-eme ivẹ ọsosuọ evaọ Uwuhrẹ 1 na: “Enwenọ ohwo kpobi evaọ Africa ọ rọwo nnọ u wuzou re a gọ Ọghẹnẹ. Ghele na, a wo ọrọwokugbe evaọ oghẹrẹ nọ a rẹ rọ gọe he.” U dhesẹ egagọ anwae ahwo Africa gbe ozọ eda nọ o da ota fia na vevẹ. U ti fi obọ họ kẹ ahwo ruẹ epanọ a rẹ rọ salọ egagọ uzẹme na dede nọ a rẹriẹ ovao dhe oghẹrẹ egagọ sa-sa nọ i re reghe ohwo, maero nọ ekpokpọ i bi muhọ kẹdẹ kẹdẹ na. U wo ifoto iwoma buobu gbe idhesẹvia nọ a re wo otoriẹ rai lọlọhọ. U wo obọdẹ ovuẹ kẹ ahwo Africa! Roro kpahe izoẹme jọ nọ a jọ ibroshọ ọkpokpọ nana ta kpahe:
● Uwuhrẹ avọ 3 u dhesẹ ahwo nọ Jihova, Jesu, gbe ijẹle a rrọ, u te je dhesẹ emuhọ Setan avọ idhivẹri riẹ gbe epanọ a be rọ “viẹ akpọ kpobi họ.”—Evia. 12:9.
● Uwuhrẹ avọ 4 o ta kpahe uruemu gbe egagọ esemọ, oware nọ ahwo Africa a rọ rọwo iẹe gbe oware nọ u gbe ro fo ho, jẹ vọ avọ enwoma. U dhesẹ oware nọ ẹwẹ hayo ẹzi na ọ gbẹ rọ zọ vrẹ uwhu ugboma na ha.
● Uwuhrẹ avọ 5 nọ uzoẹme riẹ o ta nnọ “Uzẹme Kpahe Emajiki, Ẹva-ọgba, gbe Eda” u dhesẹ epanọ erọwọ itieye na e nya ruọ iruemu-ewho Africa diwi te. Edhe-ẹme avọ 4 ọ ta nọ: “A ta nnọ erieda e rẹ nya siọ ugboma rai ba eva aso a vẹ rra vrẹ, re a kuomagbe erieda efa hayo re a re ahwo.” Ẹvẹ ma sai ro dhesẹ nọ onana yọ ọrue? Uyo na o rrọ edhe-ẹme avọ 10-12. Edhe-ẹme avọ 7 o dhesẹ epanọ Setan ọ be rọ viẹ ahwo họ roro nnọ o wo ogaga vi onọ o ghine wo. Edhe-ẹme avọ 15-17 o dhesẹ nnọ Jihova ọ ga vi idhivẹri na kpekufiẹ, keme ogaga riẹ o basa ha. Edhe-ẹme avọ 7, 8 o dhesẹ iroro na inọ ogaga ebi o rrọ emu oware kpobi nọ o via hayo ohwo kpobi nọ o whu fihọ ọrue.
● Uwuhrẹ avọ 6 rite orọ avọ 9 i re fi obọ họ kẹ ahwo ruẹ vevẹ epanọ a re ro vuhu egagọ uzẹme no udevie egagọ erue kpobi. Edhe-ẹme avọ 9 rite 11 erọ Uwuhrẹ avọ 7 i dhesẹ via nnọ iruo igbunu nọ ichọche Africa a ta nnọ a re ru na yọ onọ a ro no ogaga ọ eda ze onọ ahwo a rẹ gwọlọ rọwo. A kẹ obọdẹ uduotahawọ nọ a re ro kuomagbe egagọ uzẹme evaọ Uwuhrẹ avọ 8.
3 Kọ whọ gbẹ rọwo nnọ ibroshọ ọkpokpọ nana o te jọ obọdẹ okwakwa nọ a re ro ru iruo evaọ iruo n’uwou ruọ uwou, ozihebro, gbe obe-uwuhrẹ Ebaibol? Whọ sae ruẹ nnọ u woma re who wuhrẹ iẹe kugbe ohwo nọ ọ be ruẹrẹ oma kpahe kẹ ame-ọhọ. Onana u re fi obọ họ rekọ o rrọ ute rọkẹ ame-ọhọ họ. U ti w’iruo evaọ idhere efa buobu. Fiki iruẹru ọ ikoko-idhere nọ e da isukulu fia evaọ orẹwho na, o rẹ jọ oware areghẹ re esẹgbini e rọ oma totọ wuhrẹ ibroshọ nana kugbe emọ rai. O te jọ ọthọwẹ no obọ ahwo nọ a be daoma gele ai ruọ iruẹru-imizi ẹkwoma ewoma nọ a rẹ ta fihọ iẹ wọhọ oware nọ o rẹ thọ ae je fi obọ họ kẹ ae pase ziezi. A rẹ sai wuhrẹ iẹe kugbe ahwo nọ a gbẹ be dhozọ eda, hayo enọ e be dhozọ inọ ohwo jọ ọ be “wha” ẹyao rai ze. O rrọ usu ebe nọ a ti fihọ ada evaọ June. Gbẹ rehọ iẹ ruiruo vọvọ!