Uyere kẹ Ohrọ Ọghẹnẹ
1 Taure o te ti zihe ruọ Oleleikristi, Pọl ukọ na ọ wọso ẹnyaharo Egagọ-Ileleikristi gaga. Dede na, a dhesẹ ohrọ kẹe keme ogbori o je ro ru ei. Jihova o dhesẹ aruoriwo, ọ tẹ rọ iruo usiuwoma ota kẹ Pọl. Ọ rehọ iruo yena ghaghae. (Iruẹru 26:9-18; 1 Tim. 1:12-14) Uyere kẹ ohrọ Jihova o wọ Pọl lahiẹ oma evaọ erugba odibọgba riẹ.—2 Kọr. 12:15.
2 Wọhọ epaọ ohrọ Ọghẹnẹ, a kẹ omai odibọgba re. (2 Kọr. 4:1) Wọhọ Pọl, ma rẹ sai dhesẹ ovuhumuo mai rọkẹ ohrọ nọ a dhesẹ kẹ omai na ẹkwoma oma nọ ma rẹ dawo gaga re ma fi obọ họ kẹ amọfa nya haro evaọ abọ-ẹzi. Edhere jọ nọ ma sai ro ru onana họ ẹkwoma emuhọ gbe eru ebe-iwuhrẹ Ebaibol.
3 Emuhọ Ebe-Iwuhrẹ Ebaibol: Edhere jọ nọ a re ro mu ebe-iwuhrẹ Ebaibol họ họ ẹkwoma ẹtohọ ejẹ emagazini. Nọ ma bi weze bru ahwo nọ a rrọ ejẹ mai kẹse kẹse na, ma rẹ riẹ kpahe ọdawẹ rai viere. Ẹsejọhọ evaọ obaro, uzoẹme jọ evaọ emagazini na o sae jọ onọ who re no ruọ obe-uwuhrẹ Ebaibol evaọ ibroshọ Gwọlọ na. Evaọ iweze efa nọ whọ tẹ rehọ emagazini se ohwo na, o sae lọhọ re wha ruabọhọ ẹmeọta evaọ ibroshọ Gwọlọ na.
4 O Gwọlọ Olẹ avọ Omodawọ: Olẹ gbe omodawọ ogaga u re fi obọ họ evaọ iruo usiuwoma ota mai. Oniọvo-ọmọtẹ jọ nọ ọ rrọ ọkobaro, ọnọ o wo obe-uwuhrẹ Ebaibol ovuọvo ọ lẹ inọ Jihova ọ rọ ebe-iwuhrẹ efa ghale iẹe. Yọ o ruiruo lele elẹ riẹ re. Ọ kiẹ odibọgba riẹ riwi o te muẹrohọ nnọ ọ be hae ta ẹme kpahe ebe-iwuhrẹ Ebaibol kẹ ahwo ho evaọ okenọ ọ tẹ rrọ ozihebro. O te mu ere họ eruo yọ u lehie he, o te wo ebe-iwuhrẹ Ebaibol ivẹ efa.
5 Ẹvẹ o rrọ uvẹ-ọghọ kẹ omai te re ma w’obọ evaọ ewhowho “usiuwoma aruoriwo Ọghẹnẹ” na! (Iruẹru 20:24) Jọ uyere kẹ ohrọ Ọghẹnẹ o w’omai re ma wo osegboja evaọ obọ nọ ma re fi họ kẹ amọfa re a wo erere no aruoriwo Jihova ze.