Ọruẹrẹfihotọ Okokohọ Okogho Ọkpokpọ
1 Olori mai ọ ruẹaro inọ ilele riẹ a te ruẹ uye. (Mat. 24:9) Ẹvẹ ma re rri edawọ? Eme o ti fi obọ họ kẹ omai thihakọ uye? Ọruẹrẹfihotọ okokohọ okogho rọkẹ ukpe 2004 na ọ te kẹ uyo enọ nana. Uzoẹme riẹ họ “Ghọghọ Evaọ Ẹruore na. Thihakọ Evaọ Ukpokpoma.”—Rom 12:12.
2 Ọzọhọkugbe-Eriariẹ Ivẹ: Ọzọhọkugbe-eriariẹ ọsosuọ, nọ uzoẹme riẹ o rrọ “Mọ Ibi avọ Akothiho” na, u ti dhesẹ idhere nọ ma rẹ rọ mọ ibi. A te kiẹ iwhowho-uvie buobu riwi kpahe epanọ a be rọ ta usiuwoma je wuhrẹ ahwo avọ iroro ovẹrẹ. Maero, o te mai woma re esẹgbini a kezọ kẹ abọ na “Eva Okenọ Jihova Ọ tẹ Whọku Omai,” onọ o te ta kpahe epanọ esẹgbini a sae rọ jiroro kugbe emọ rai. Ohwo nọ o ti ru ẹme urere ọzọhọkugbe-eriariẹ na o ti fi elo họ oware nọ ma re ru hrọ re akpọ na ọ se omai ba esi kpemu nọ ma gbẹ rọ mọ ibi hi.—Mak 4:19.
3 “Dhẹ Ohrẹ na avọ Akothiho” họ uzoẹme ọzọhọkugbe-eriariẹ avivẹ na. U ti dhesẹ epanọ uzuazọ mai o rọ wọhọ ohrẹ-odhẹ. Fikieme o jẹ gwọlọ nọ ma rẹ dhẹ-ohrẹ lele izi na? Ẹvẹ ma sai ro si owha ogbẹgbẹdẹ kpobi no oma avọ obokparọ re o se omai ba ẹbẹ evaọ ohrẹ-odhẹ kẹ uzuazọ na? Uthubro Ikereakere ẹruoke nọ a te kẹ na u ti fi obọ họ kẹ omai kpobi ruabọhọ ohrẹ-odhẹ na avọ akothiho.
4 Akothiho Ọ rẹ Wha Ọjẹrehọ Ọghẹnẹ Ze: Eme nọ esẹro ọnyawariẹ a ti ru e te bọ ẹrọwọ ahwo nọ a gaviezọ je fi uthubro na họ iruo ga. Uzoẹme ẹme jọ nọ ọsẹro ubrotọ o ti ru họ “Akothiho O re Su Kpohọ Ọjẹrehọ.” Ovuẹ ogbotu na o te kuyo enọ nana: Odẹ ono erẹwho na i re fi ẹruore họ, kọ eme oyena u w’obọ kpahe? Ẹme urere na, “Ẹkwoma ọ Akothiho Wha ti ro Wo Uzuazọ Rai,” o te ta kpahe epanọ Jesu ọ sai ro thihakọ okienyẹ ababọ unu-ofiẹ.
5 Kareghẹhọ wha obe ọ Isukulu Odibọgba ra gbe Uwou-Eroro nọ a ti wuhrẹ evaọ oka yena lele oma. Kere eme fihọ otọ nọ i re fi obọ họ kẹ owhẹ nya lele ẹme na, nọ who ti je ro ruiruo evaọ obaro. Evaọ obaro, a ti ru ọkiẹkpemu ọruẹrẹfihotọ okokohọ na evaọ ukoko kpobi.
6 Jihova omariẹ ọ ruẹrẹ emuore abọ-ẹzi nana fihọ no. Nyaze! Mọ Re! Ma ti bo ubo oghọghọ otẹrọnọ ma rẹ jariẹ re ma wo erere no ọruẹrẹfihotọ na kpobi ze.—Aiz. 65:14.