Ileta Nọ I No Obọ Ugboma Esuo ze
Inievo Eghaghae:
“ARUORIWO avọ udhedhẹ nọ u no obọ Ọghẹnẹ Ọsẹ mai jegbe Ọnowo Jesu Kristi ze u te owhai.” (1 Kọr. 1:3) Ọwhọ nọ ma be rọ hẹrẹ okenọ eware nọ e be wẹ kpobi e te rọ kẹ Jihova oruaro nọ u fo rie ọ rro w’umuo ho! (Ol. 150:6) Nọ ma be hẹrẹ ẹdẹ ologbo ọyena, ma re gbe whowho emamọ usi Uvie Ọghẹnẹ na je ru ilele.
Iruo odibọgba na họ ugogo iruo Jihova nọ a bi ru evaọ otọakpọ na nẹnẹ. (Mak 13:10) Fikinọ ma riẹ isiuru egaga nọ Jihova o wo kpahe iruo nana, ma rẹ lẹ re o fi obọ họ k’omai ru iruo na, vuhumu nnọ ohwo-akpọ kpobi o wo uvẹ nọ o re ro wo erere no ọruẹrẹfihotọ ẹtanigbo na ze. (Evia. 14:6, 7, 14, 15) Evaọ uzẹme, ma be rẹriẹ ovao ku ebẹbẹ, rekọ ẹvẹ eva e rẹ were omai te inọ a “rehọ ogaga nọ uno ehru gọ [omai] ẹgọ” no re ma sai ru odibọgba nana gba!—Luk 24:49.
O rẹ sasa oma gaga re ma kiẹ ukpe iruo nọ o vrẹ na riwi je roro kpahe oware nọ Jihova ọ rehọ ẹkwoma idibo omarokpotọ riẹ rugba no. Avọ ẹgba ẹzi ọfuafo na, ahwo Ọghẹnẹ a dhesẹ ọkpọ uyoyou Kristi no, a rọ ere fi egrẹ kparobọ no evaọ akpọ na soso. Uyoyou utioye na u dhesẹ oma via vevẹ eva ikokohọ ilogbo mai. No June rite December 2003, ahwo nọ a no erẹwho nọ i bu vi udhusoi ze a kpohọ ikokohọ akpọ-soso 32 nọ a jọ unuakpọ ezeza ru. A kiẹ imishọnare, idibo ebabọ akpọ-soso, gbe ahwo Ebẹtẹle nọ e rrọ erẹwho efa riwi eva ikokohọ ilogbo gbe erọ akpọ-soso.
Eva ikokohọ nana, a si obọ no ebe na “Ruẹ Otọ Uwoma Na” gbe “Wuhrẹ Mi Owuhrẹ Ologbo Na.” Fibae, a whowho inọ a bi ti mu obe-ewuhrẹ ọ Isukulu Iruo Ọkobaro onọ a wariẹ kere họ ero ruiruo evaọ isukulu na evaọ ubrobọ ekuhọ ukpe iruo 2004 na. Nọ oke o be nya haro na, ekobaro nọ i kri no nọ i kpohọ isukulu na no vẹre a ti kuomagbe eklase nọ ekobaro ekpokpọ e rrọ.
Obufihọ Ọghẹnẹ gbe ọghoruo ahwo-akpọ u ru rie lọhọ nọ a be rọ bọ Egwa Uvie efa buobu, maero evaọ erẹwho nọ a jọ wo ugho tere he. Fiki ẹgwọlọ emu abọ-ẹzi nọ o bi dhe ẹruẹro evaọ akpọ na soso, a bi ru iwou egha buobu rro viere evaọ erẹwho buobu. Enẹna, ma wo ibroshọ Reawere Uzuazọ Otọakpọ Bẹdẹ Bẹdẹ! na evaọ evẹrẹ 299 no, yọ unu nọ a kere no u bu te ima 139 no; Eriariẹ Nọ I Re Su Kpohọ Uzuazọ Ebẹdẹ Bẹdẹ u bu vi ima 93 no evaọ evẹrẹ 161; yọ ibroshọ na Eme Ọghẹnẹ Ọ Gwọlọ Mi Omai? u bu vi ima 200 no evaọ evẹrẹ 267.
Ma rehọ abava dede ahwo 258,845 nọ e rehọ ame-ọhọ dhesẹ omarọkẹ rai via evaọ ukpe iruo nọ o vrẹ na! Dede nnọ Uvie Ọghẹnẹ nọ wha be tha uke u ru Setan mukpahe owhai viere no, u ru owhai fihọ obọdẹ ahwo nọ Jihova ọ be ghale no re, jẹ be tha owhai uke evaọ abọ-ẹzi nọ wha be dhẹ ohrẹ nọ a fihọ kẹ owhai na. (Hib. 12:1, 2; Evia. 12:17) Ẹhẹ, jọ u mu owhẹ ẹro inọ ‘ọnọ ọ be sẹro ra o re go fiki owezẹ hẹ.’—Ol. 121:3.
Uzoẹme Ẹgbukpe 2004 na, “Wha rroro . . . Wha ruẹrẹ oma kpahe” o nwane rrọ ẹruoke. (Mat. 24:42, 44, NW ) A jọ Ẹme Ọghẹnẹ dhesẹ Ileleikristi wọhọ erara evaọ uyerakpọ nana nọ o be vrẹ na. (1 Pita 2:11; 4:7) Fikiere, u fo re ma tẹrovi eware abọ-ẹzi, re ma ru izuazọ mai lọhọ, jẹ kiẹ idu mai riwi ziezi. “Odudu ologbo na” ọ be gwọlọ mu omai lọ, dẹ omai rehọ fihọ uyerakpọ riẹ.—Evia. 12:9.
Isase Ebaibol ekẹdẹ kẹdẹ e r’oja ma tẹ gwọlọ jaja aro vi. O rẹ sai fi obọ họ k’omai ‘ru Ee mai jọ Ee’ evaọ ẹnyate omarọkẹ mai jẹ “yọrọ ẹruọrọsuọ ọsosuọ mai na whawha te urere.” (Jem. 5:12; Hib. 3:14) Isase Ebaibol ekẹdẹ kẹdẹ o rẹ sai fi obọ họ k’omai kareghẹhọ epanọ akpọ na o kiuke ku itee Ọghẹnẹ nọ i re nwene he thabọ te no. (Mal. 3:6; 2 Tim. 3:1, 13) Eriariẹ Ebaibol e rẹ sai fi obọ họ k’omai whaha ‘iku anwae nọ a nabe ma kiete’ jẹ yọrọ ẹrọwọ mai kẹ Jihova.—2 Pita 1:16; 3:11.
Esẹgbini, nọ wha be rehọ ọwhọkuo gbe ọkpọhọ-iroro Jihova yọrọ emọ rai na, kọ wha bi fi obọ họ kẹ ae fi itee abọ-ẹzi họ je ‘rroro’? (Ẹf. 6:4) Kọ wha bi wuhrẹ ai re a rri obaro na wọhọ epanọ Jesu, ọzae nọ ọ mai wo areghẹ nọ ọ rria no, o rri obaro riẹ? Jesu ọ hae sae jọ ọwena, oku-eware, hayo ọbo nọ ọ mae rro nọ ọ rria no, rekọ ukpoye o le odibọgba oke-kpobi na. Jọ oriruo riẹ ọ wọ owhai fi obọ họ kẹ emọ rai re a fi isiuru Uvie na họ oware ọsosuọ evaọ uzuazọ rai.
Utu ọrigbo ẹrọwọ na, onọ Ugboma Esuo na a rrọ ẹro kẹ, o be rehọ udu kpobi yere “otu obuobu” na fiki obọ nọ a bi fihọ k’omai ru owha-iruo mai gba orọ ‘emamọ usi uvie na nọ ma re whowho nya otọakpọ na kpobi wariẹ re o jọ isẹi.’ (Evia. 7:9; Mat. 24:14, 45) Whai inievo eghaghae, jọ u mu owhai ẹro inọ Jihova ọ be kareghẹhọ “iruo rai . . . gbe uyoyou nọ owha be rehọ fiki riẹ ruẹ gbe epanọ wha be ga erezi na, wọhọ epa o nọ wha ruẹabọhọ na.” (Hib. 6:10) Nọ who bi se eware isiuru nọ e via je muẹrohọ iyẹrẹ omodawọ okugbe rai evaọ ewẹ-obe 2004 Yearbook of Jehovah’s Witnesses na, riẹ nnọ who ru abọ ologbo no evaọ isẹri-ise akpọ-soso nana.
Ajọ wha rẹriẹ ovao ku obaro na avọ udu nọ wha gbe bi ‘rri kparo kpohọ ẹhwa osa na,’ ababọ uvẹ nọ wha rẹ kẹ ohwo-akpọ jọ hayo idhivẹri re a bru iruo rai dhe. (Hib. 11:26; Kọl. 2:18) Ẹhẹ, fi eva họ Jihova, avọ udu inọ o ti fi obọ họ kẹ enọ i you rie kpobi re a le uvi uzuazọ na t’obọ.—Jọn 6:48-54.
Riẹ nọ eva e be were omai inọ ma bi lele owhai ruiruo rọkẹ oruaro Jihova.
Inievo rai,
Ugboma Esuo orọ Isẹri Jihova