Jiri Ọnọma Ra Ẹkwoma Itee Abọ-Ẹzi nọ Who re Fihọ
1. (a) Ẹvẹ ohwo ọ sae rọ riẹ obonọ o bi yeri uzuazọ rri? (b) Itee vẹ Noa avọ Mosis a le tobọ?
1 Re ohwo ọ riẹ obonọ o bi yere uzuazọ riẹ riwi, u fo re o fi itee họ. Ebaibol na e kẹ iriruo ahwo nọ a fi itee họ je le itee na tobọ. Noa o ru iruo nọ ọ rọ bọ okọ evaọ ikpe 50. Eme ọ jọ ute riẹ? Re “o siwi uviuwou riẹ soso.” Mosis ọruaro na “ọ kparo ruẹ erere” na.—Hib. 11:7, 26.
2. Didi enọ ma rẹ nọ oma mai?
2 Ẹhẹ, idibo Jihova no anwae ze a fi uvi itee họ je le ai tobọ, nọ o wha oruaro se Jihova. Kọ ẹvẹ ma sai ro fi itee abọ-ẹzi họ nẹnẹ nọ ma rẹ rọ kẹ Ọnọma mai orro? Itee vẹ ma rẹ sai le, kọ owọ vẹ ma rẹ jẹ re ma le ai tobọ?
3. Evaọ idhere vẹ itee abọ-ẹzi i ro wo ohẹriẹ no itee akpọ na?
3 Wo Uvi Iroro Na: Itee abọ-ẹzi e wọhọ erọ isiuru-ọkwa-okpehru akpọ na ha. Ugogo ẹjiroro itee akpọ na họ isiuru egaga kẹ efe gbe ọkwa gbe ogaga. Rekọ, itee nọ e rẹ wha orro se Jihova Ọghẹnẹ i wobọ kugbe ẹgọ nọ ma rẹ gọe gbe isiuru Uvie na nọ ma re wo. (Mat. 6:33) Itee itieye na i re no uyoyou nọ ma wo kẹ Ọghẹnẹ gbe ọrivẹ mai ze, yọ omarọkẹ Ọghẹnẹ họ ugogo ẹjiroro rai.—Mat. 22:37-39; 1 Tim. 4:7.
4, 5. Didi itee abọ-ẹzi jọ ma rẹ sai roro kpahe?
4 Itee Abọ-Ẹzi nọ A Re Roro Kpahe: Whọ sai fi itee họ nọ who re ro ru eriariẹ ra kpahe Ẹme Ọghẹnẹ rro haro. A jọ Itẹ 2:1-5 hrẹ omai re ma ‘gwọlọ eriariẹ Ọghẹnẹ.’ Ẹkwoma uwuhrẹ omobọ-ohwo nọ who re ru ẹsikpobi, whọ rẹ sae rehọ eme Ikereakere nọ a ruẹrẹ họ re i si owhẹ kẹle Jihova ziezi na fihọ iroro gbe udu ra. U ti fi obọ họ kẹ owhẹ thomakpahe ziezi re whọ jẹ emamọ iroro nọ whọ tẹ rẹriẹ ovao ku eme nọ i wuzou.
5 Ahwo jọ a wo itee omobọrai nọ a re ro fi ugogo oke jọ họ kẹ odibọgba na evaọ oka kpobi. Kọ o rrọ ute ra re whọ jọ owuhrẹ nọ o wo ona eva izihebro gbe ebe-uwuhrẹ Ebaibol? Ahwo jọ nọ a rrọ isukulu a fi itee ẹgbukpe họ nọ a re ro ru ọkobaro obufihọ evaọ oke ehọlide amara ọvo hayo bu vi ere. Kọ ẹvẹ kpahe emagazini Uwou-Eroro Na gbe Awake!? Ahwo jọ a fi ute họ nọ a re ro se uvitha kpobi nọ o tẹ nwani te ai obọ.
6. Owọ vẹ ma rẹ sae jẹ nọ i re fi obọ họ kẹ omai le itee mai tobọ?
6 Itee Mai nọ Ma re Kere Fihotọ O Sai Fi Obọ họ kẹ Omai Ru Ai Gba: Solomọn o kere nọ emamọ eme e sai wo ẹgba nọ e rẹ rọ kpọ ohwo vi evaọ edhere uzuazọ. (Ọtausi. 12:11) Nọ a te kere eme yena fihọ otọ, i re kpomahọ iroro gbe udu na ziezi. (Izie. 17:18) Fikiere, joma daoma kere itee mai gbe epanọ ma sai ro ru ai gba fihọ obe, kere ezadhe nọ ma re rẹro rai fihotọ gbe idhere nọ ma re ro fi ai kparobọ.
7. Ẹvẹ ọkobaro obọdẹ jọ o ro le itee riẹ tobọ?
7 Roro kpahe oriruo ọkobaro obọdẹ oke-thethei jọ evaọ ẹkwotọ nọ o siomano nọ aye riẹ o whu idudhe. Nọ oke nọ o ro ru inwene o vrẹ no, ọ tẹ jiroro nọ o re du oma kpobi họ iruo odibọgba ọkobaro riẹ na ẹkwoma itee nọ o fihọ. Nọ o kere omaa riẹ fihọ obe no, ọ tẹ lẹ jẹ jiroro nọ o re mu ebe-iwuhrẹ Ebaibol ekpokpọ esa họ evaọ urere amara na. Ẹdẹ kpobi, ọ jẹ hae kiẹ iruo riẹ riwi, yọ evaọ edẹ ikpe kpobi, ọ vẹ kiẹ ẹnyaharo riẹ riwi. Kọ ọ nyate ute riẹ? Avọ ebe-uwuhrẹ Ebaibol ekpokpọ ene nọ ọ nẹ iyẹrẹ rai, ọ rọ evawere yo nnọ Ee!
8. Eme ma rẹ gbamu nọ ma re ru?
8 Dede na evaọ ẹsejọ, iyero e rẹ sai ru nọ ma gbẹ sai le itee jọ tobọ họ. Wọhọ oriruo, ẹyao hayo ewha-iruo uviuwou e rẹ sai ru nọ ma gbe le itee jọ tobọ họ. Dede na, ma sae ‘dhẹozọ Ọghẹnẹ je koko izi riẹ.’ (Ọtausi. 12:13) Itee abọ-ẹzi i re fi obọ họ kẹ omai tẹrovi eruo oreva Ọghẹnẹ. Fikiere, joma rehọ ae kẹ Ọnọma omai orro.