Ẹkpẹti Onọ

◼ Ẹvẹ ma rẹ rọ ẹro te iruo ukoko na?

Oware nọ o be lẹliẹ ukoko ahwo Jihova nyaharo ziezi họ fiki okugbe ọvo nọ a wo. (1 Kọr. 14:33, 40) Dai roro kpahe eware nọ a re ru evaọ ewuhrẹ ukoko ọvo. U te no ọruẹrẹfihotọ ewuhrẹ na no, iruo efa sa-sa e riẹ nọ inievo na a re ru taure a te ti muhọ gbe okenọ ewuhrẹ na ọ tẹ fa no. Eware efa nọ a rẹ rọ ẹro te nọ amọfa a re mu ẹro họ họ e roja re. Kọ ẹvẹ mai omomọvo ma sae rọ zọhọ fihọ ọruẹrẹfihotọ nana?

Fialọ oma ra via. Ahwo nọ a wọ ẹzi unevaze a rẹ ruẹ eware buobu nọ a re ru. (Ol. 110:3) Dhesẹ ọdawẹ kẹ ahwo nọ oma o ga ha gbe enọ e kpako no. Fiobọhọ evaọ erufuọ Ọgwa Uvie na. Ma rẹ sai ru iruo iwoma buobu ababọ ezizie nọ a re zizie omai tao. Oware nọ ma gwọlọ họ unevaze nọ ma re ro fi obọ họ.

Ru iruo ra avọ omarokpotọ. Ahwo nọ a wo omarokpotọ a rẹ wereva eva eware i ru kẹ amọfa. (Luk 9:48) Omarokpotọ u re ru nọ ma gbẹ rehọ ewha-iruo bu vi enọ ma rẹ sae rọ ẹro te he. Ofariẹ re, omarokpotọ u re fi obọ họ kẹ omai nọ ma gbe ru vrẹ umuo nọ a kẹ omai udu nọ ma ru te he.—Itẹ 11:2.

Jọ ohwo nọ a re fi eva họ. A ta kẹ Mosis nọ ọ salọ ezae nọ “a re fievahọ” re a rọ ẹro te ọkwa ewha-iruo evaọ Izrẹl anwae. (Ọny. 18:21) Ere ọvona o gwọlọ nẹnẹ re. Rọ eva ra kpobi ru iruo nọ a kẹ owhẹ. (Luk 16:10) Otẹrọnọ whọ be te sai ru iruo nọ a kẹ owhẹ hẹ, muẹrohọ nọ a ru obọdẹ ọruẹrẹfihotọ re omọfa o ru iruo na nọ whọ gbẹ riẹ hẹ.

Ru utho ẹgba ra kpobi. A ta udu họ Ileleikristi awọ re a rọ ẹwẹ-kpobi ru iruo makọ evaọ iruo okọ dede. (Kọl. 3:22-24) Ẹjiroro ologbo ọ riẹ nọ ma re ro ru ere evaọ okenọ ma te bi ru iruo rọ wha egagọ uzẹme haro. O tẹ make rọnọ iruo na e wọhọ nọ i fioka ha, o rrọ oghale kẹ ukoko na nọ a te ru ei ziezi.

Iruo kpobi e be kẹ omai uvẹ nọ ma re ro dhesẹ uyoyou nọ ma wo kẹ Jihova gbe inievo mai. (Mat. 22:37-39) Joma rọ ẹro te iruo kpobi nọ a kẹ omai ziezi.