Iwhowhovia

◼ Ebe nọ a ti fihọ ada evaọ February: Obe ọ Si Kẹle Jihova a ti fihọ ada. Onọ a sai ro nwene iei: Obe kpobi nọ u kri no nọ o vọ owhai obọ. March: Obe okpokpọ na Eme Ebaibol na O Gine Wuhrẹ? Daoma gaga re whọ to ebe-iwuhrẹ Ebaibol họ. April and May: Emagazini Uwou-Eroro Na gbe Awake! Okenọ who te bi zihe bru ahwo nọ a dhesẹ isiuru, gbe ahwo nọ a kpohọ Ekareghẹhọ na hayo omakugbe Ileleikristi mai efa jọ rekiyọ a ri kuomagbe ukoko na ziezi hi, tẹrovi efihada obe okpokpọ na Eme Ebaibol na O Gine Wuhrẹ? Who re fi iei họ ada avọ ẹjiroro obe-uwuhrẹ Ebaibol nọ whọ rẹ rehọ iẹe tohọ.

◼ Nọ amara April o wo urere-oka isoi soso na, o te jọ obọdẹ amara kẹ ọkobaro obufihọ.

◼ Uzoẹme ovuẹ ogbotu obọdẹ rọkẹ ezi Ekareghẹhọ 2006 na o te jọ “Ono O Fo nọ O re Su Akpọ Na?” Rri owhowhovia nọ ọ tẹme kpahe onana evaọ Odibọgba Uvie Mai ọrọ September 2005.

◼ A te jọ Ewuhrẹ Odibọgba ọrọ oka ọ April 3 ru ẹme nọ o wo uzoẹme na “Reawere Ewuhrẹ Obe na Eme Ebaibol na O Gine Wuhrẹ?” nọ o rrọ ẹwẹ-obe avọ 6 na. Iviena rawo uko-obeva nọ uzoẹme yena o rrọ na gbe omaa ewuhrẹ nọ a fi kugbei na.

◼ Ọsẹro ukoko na hayo omọfa nọ o vi ọ rẹ kiẹ igho ukoko na riwi evaọ March 1 hayo oke ofa nọ o kẹle riẹ. Otẹrọnọ wha wo ẹkpa-ugho jọ nọ a ruẹrẹ họ kẹ ẹjiroro jọ, wọhọ ẹruorote hayo ebabọ, a re ru ọruẹrẹfihotọ re a kiẹ igho nana riwi re. A te ru onana no, a ve whowho iei kẹ ukoko na nọ a te se iyẹrẹ epanọ igho e nya n’otha na no.

◼ Okere-obe gbe ọsẹro usiuwoma ota na a rẹ kiẹ iruo ekobaro oke-kpobi riwi. Otẹrọnọ ejọ i bi wo ẹbẹbẹ evaọ ẹnyate euwa nọ a gwọlọ na, jọ ekpako na a ru ọruẹrẹfihotọ re a kẹ obufihọ. Rọkẹ iroro-ejẹ, kiẹ ileta k’ukpe k’ukpe na S-201 nọ Ukoko ulogbo u re vi ze na riwi.

◼ Ma kuvẹ kẹ uvumọ ohwo hayo utu ahwo re a weze kpohọ ọfisi Lagos ọkpokpọ mai nọ a muhọ ẹbọ obọ na ha. Onana o rrọ ere keme ekọmpene jọ nọ e rẹ bọ ebabọ a rọ iruo na kẹ, yọ a te bi weze kpohọ oria na o te lẹliẹ iruo na nyaharo ho.

◼ Eva ikokohọ okogho gbe erọ ẹdẹ obọdẹ nọ a ti ru eva 2006 na, ikogho nọ e rrọ obotọ na a ti wo ofẹ nọ a ruẹrẹ họ kẹ ahwo nọ a diezọ nọ a te jọ rọ abọ t’ẹme kẹ ai eva Ẹvẹrẹ Obọ rọ t’Ẹme America (ASL). Ma ti kere eria efa fihọ Odibọgba Uvie Mai ọrọ March 2006:

Badagry (WE-02) January 21-22 gbe April 23

Badagry (WE-14) January 14-15 gbe April 22

Ibadan (WE-09) February 11 gbe June 17-18

Ota (WE-05) January14-15 gbe April 8

Ota (WE-25) January 21-22 gbe April 9

Ubogo (ME-07) February 4-5 gbe May 21