Whaha Idhere Akpọ Na
1 Uruemu jọ nọ akpọ na o wo họ ‘edhesẹ omovia ọrọ eyero uzuazọ ohwo.’ (1 Jọn 2:15-17) Onana u dhesẹ oma via no evaọ ehaa ilogbo nọ a re se nọ ohwo ọ tẹ be rọo, onọ u zihe ruọ uruemu ahwo kpobi no na. Enẹna a zihe ehaa-orọo ruọ ekiọthuọ no evaọ idhere sa-sa. U yoma kẹhẹ inọ ahwo jọ nọ a rrọ ukoko Ileleikristi na a bi dhesẹ nọ a wo ohẹriẹ no akpọ na ha evaọ oghẹrẹ nọ a bi ru ehaa-orọo rai.—Jọn 17:16; Rom 12:2.
2 Wọhọ oriruo, ahwo jọ evaọ ukoko na a ru oghẹrẹ ehaa-orọo ivẹ no—orọo uzi-ẹwho gbe orọo uzi-egọmeti—nọ a je se ehaa ivẹ. Onana u ru araha igho ehaa-orọo kpehru gaga no. Abọjọ uzoẹme na “Orọo Adhẹwẹ—Abọ 1, Orọo Uzi-Ẹwho gbe Orọo Uzi-Egọmeti,” nọ o rrọ Odibọgba Uvie Mai ọrọ October 1994 (ọrọ Oyibo), o ta nọ: ‘U wuzou gaga je fo re ma kẹ evuẹ jọ kpahe oghẹrẹ erọo ivẹ nọ ma jọ orẹwho nana wo, koyehọ orọo nọ a rẹ ro lele Uzi Egọmeti gbe Orọo Uzi-Ẹwho. Oghẹrẹ erọo ivẹ nana i kiehọ, i lele uzi, jẹ rrọ avọ adhẹẹ. Onọ ohwo o ru kpobi evaọ usu ivẹ nana ma rẹ jẹe rehọ evaọ ukoko Ileleikristi na.’
3 Uzoẹme na “Orọo Adhẹwẹ—Abọ Avọ 2: Orọo Uzi-Ẹwho gbe Orọo Uzi-Egọmeti,” nọ o roma via evaọ Odibọgba Uvie Mai ọrọ November 1994 (ọrọ Oyibo), u fibae nọ: “Fiki eware nọ ma jọ obehru fodẹ na gbe ẹjiroro na inọ erọo ivẹ na i kiehọ, i lele uzi, jẹ rrọ avọ adhẹẹ, o roja re whọ jiroro onọ whọ rẹ jọ usu ivẹ na ru. O roja ha, yọ o rrọ utee gbe he inọ ohwo o re ru ivẹ na nọ ọ tẹ be rọo. Whọ rẹ sai ru onọ o rrọ lele Uzi-Egọmeti hayo orọ Uzi-Ẹwho onọ who te ru no whọ vẹ nyai kere odẹ fihọ obọ egọmeti. Nọ o rọnọ igho-iruo na ọvo, ababọ ọmọtẹ na nọ a re si obọ no kẹ ọzae na, o rẹ lẹliẹ orọo Uzi-Ẹwho gba ha na, ohwo nọ o bi ru orọo nọ o nya lele Uzi-Egọmeti ọ rẹ sae wha igho ababọ eruo eware efa nọ i re lele orọo uzi-ẹwho.”
4 Be ta kpahe orọo nọ a re ru lele Uzi-Egọmeti, Odibọgba Uvie Mai ọrọ October 1994 (ọrọ Oyibo), nọ a jọ obehru fodẹ na o ta nọ: “Ma tuduhọ ahwo kpobi awọ inọ a ru oghẹrẹ orọo onana keme o rẹ thọ aye na avọ emọ riẹ jẹ wha irere efa ze otẹrọnọ ọzae na o whu se ai ba. Irere efa erọ orọo Uzi-Egọmeti e rẹ sae kẹre te obọ nọ u re fihọ kẹ Oleleikristi whaha iruemu akpọ na jọ nọ e rẹ sae raha edikihẹ ohwo evaọ ukoko na. Wọhọ oriruo, evaọ orọo Uzi-Egọmeti, u du gwọlọ họ inọ ohwo nọ ọ rrọ ukoko ho ọ rẹ lẹ kẹ ọzae avọ aye na fikinọ ọ rrọ ọsẹ hayo ohwo nọ ọ yọrọ ọmọtẹ na, keme ohwo otiọye na ọ tẹ lẹ yọ ọguakugbe orọwọ. Epọvo na re kpahe iruemu ẹwho efa nọ i fo kẹ Ileleikristi hi.
5 Fiki eware nọ ma jọ obehru tẹme te no na, ono o re dhesẹ oghẹrẹ orọo nọ a re ru? Uzoẹme na “Orọo Adhẹwẹ—Abọ Avọ 3: Orọo Uzi-Ẹwho gbe Orọo Uzi-Egọmeti,” nọ o rrọ Odibọgba Uvie Mai ọrọ December 1994 (ọrọ Oyibo) o ta eva ẹwẹ-obe avọ 3, edhe-ẹme 1 inọ: “Makọ esẹgbini hayo imoni ahwo nọ a be te rọo na a rẹ jẹ iroro itieye na ha. O rrọ owha-iruo ahwo nọ a be te rọo na re a jiroro oghẹrẹ orọo nọ a gwọlọ, sọ orọo nọ a rẹ ro lele Uzi-Egọmeti hayo onọ a rẹ ro lele Uzi-Ẹwho. Uvumọ ohwo o wo udu nọ ọ rẹ rọ gba imava nọ e gwọlọ rọo na họ ru oghẹrẹ orọo jọ họ. Ahwo nọ a be te rọo na ọvo a wo owha-iruo nọ a rẹ rọ jiroro yena. A te je wo udu nọ a rẹ rọ salọ oria nọ a je ru ehaa-orọo na gbe . . . ohwo nọ ọ rẹ kẹ ovuẹ orọo na.”
6 Wọhọ epanọ ma fodẹ evaọ edhe-ẹme nọ ọ vrẹ na, nọ o rrọ owha-iruo esẹgbini re a jiroro oghẹrẹ orọo nọ a re ru hu na, u fo ho re ogbẹgwae iruo ukoko na u sikẹ inọ a rẹ nyate itee orọo uzi-ẹwho taure a te ti siobọno Ọgwa Uvie kẹ ehaa-orọo. Owha-iruo nọ u te ogbẹgwae iruo ukoko na họ, a rẹ ruẹ nọ ahwo nọ a be te rọo na a wo emamọ edikihẹ abọ-ẹzi evaọ ukoko na. A re ru onana ẹkwoma ileta nọ i re dhesẹ oghẹrẹ nọ ahwo nọ a be te rọo na a rrọ nọ a rẹ yare mi ogbẹgwae iruo ukoko hayo ikoko nọ imava nana a rrọ.
7 Otẹrọnọ ohwo o bi ru orọo nọ o nya lele Uzi-Egọmeti, ọzae nọ ọ be te rọo na avọ egọ riẹ a rẹ sae jiroro oware nọ a gwọlọ ru kpahe igho-iruo. O tẹ rrọ ae oja nọ a ru igho na, a rẹ sai fi ẹdẹ họ kẹ igho-iruo na ababọ ehaa nọ a re se. Ma ta onana keme orọo nọ a re ru lele Uzi-Egọmeti o gba je kiehọ ababọ igho nọ a re ru. Fikiere, ma rẹ sae whaha araha-igho buobu keme a bi ti se ehaa ivẹ hẹ—ojọ rọkẹ igho-iruo (nya lele Uzi-Ẹwho), gbe ọfa rọkẹ ehaa-orọo (nya lele Uzi-Egọmeti).
8 Oware ofa nọ ma gwọlọ tẹme kpahe họ ohẹriẹ nọ o rrọ obe-ukere orọ orọo Uzi-Ẹwho evaọ obọ egọmeti gbe orọo nọ a ru lele Uzi-Egọmeti. Otẹrọnọ a gbe ru orọo Uzi-Ẹwho ho (koyehọ, igho-iruo gbe obusino ọmọtẹ na), obe-ukere orọo na evaọ obọ egọmeti u re ru orọo na gba ha o tẹ make rọnọ obe nọ a ti kere na o wọhọ Form E, nọ a rẹ kẹ evaọ orọo Uzi-Egọmeti. Iviena muẹrohọ inọ orọo Uzi-Egọmeti orọnikọ obe-ukere orọ orọo uzi-ẹwho ho. O rrọ uzi hi inọ ohwo o re ru orọo nọ u lele Uzi-Ẹwho taure o te ti ru orọo Uzi-Egọmeti. Oware nọ orọo Uzi-Egọmeti o gwọlọ họ ọzae hayo ọmọtẹ nọ ọ gwọlọ rọo na ọvo hayo aimava na a re kpohọ Oria Obe-Orọo Ukere a vẹ kẹ ọjọriẹ ọrọ edẹ 21 inọ a gwọlọ ruọ orọo. Nọ edẹ 21 na e tẹ gba no, imava nọ e gwọlọ rọo na a ve mi Form C evaọ Oria Obe-Orọo Ukere na onọ o rẹ kẹ ae uvẹ ru orọo na evaọ Ọgwa Uvie hayo evaọ Oria Obe-Orọo Ukere na nọ a rẹ jọ kẹ ae Form E. Obọ-owhẹhọ gbe ẹrehọkẹ orọ Form E na họ oware nọ u ru orọo Uzi-Egọmeti na dikihẹ. U du gwọlọ eruo orọo nya lele uzi-ẹwho ho, igho-iruo gbe obusino ọmọtẹ na. Onana u wo ohẹriẹ no ekere-obe-orọo uzi-ẹwho nọ a re ru evaọ ewho jọ, o tẹ make rọnọ efọmo ẹwho nọ a re kere eme fihọ na i tho onọ a rẹ kẹ evaọ orọo Uzi-Egọmeti.
9 Ohwo ọ tẹ jiroro nọ o bi ru orọo nọ o nya lele Uzi-Ẹwho, ọ rẹ sai ru ere. Rekọ, re ohwo na ọ sae reawere uvẹ-iruo obọdẹ eva ukoko na, ọ rẹ nyai kere obe-orọo riẹ eva obọ local government. Ọ rẹ vuẹ ohwo egọmeti nọ o re kere obe-orọo na inọ ọ gwọlọ kere obe-orọo riẹ onọ a ru lele Uzi-Ẹwho, a vẹ te kẹe obe nọ u re dhesẹ nọ o kere obe-orọo riẹ no. Ọzae na ọvo ọ sae nyai kere obe-orọo na, hayo o sae gwọlọ nọ ọzae avọ aye na a gbẹ nya. Evaọ iyero jọ, o sae gwọlọ nọ ọsẹ ọmọtẹ na hayo ohwo nọ ọ yọrọ e riẹ ọ rẹ jariẹ evaọ oke nọ a bi ro kere obe-orọo na.
10 Obe-orọo nọ a rẹ kẹ ahwo i re wo ohẹriẹ no local government ruọ local government. Rekọ, taure wha tẹ te nyai kere obe-orọo onọ a ru lele Uzi-Ẹwho, ọzae na ọ rẹ ruẹ nọ o ru igho họ ọmọtẹ na no, a tẹ jẹ rehọ ọmọtẹ na kẹe no wọhọ aye riẹ. Re a kpohọ obọ egọmeti nyai kere obe-orọo nọ a re ru lele Uzi-Ẹwho yọ a re nyate ugogo itee ẹwho na ha u wo otọhotọ họ keme uzẹme riẹ họ imava na a re ginẹ rọo ho.
11 Local government jọ i wo ọruẹrẹfihotọ ọvuọvo ho kẹ ekere obe-orọo nọ a re ru lele uzi-ẹwho. Evaọ uyero utioye na, whọ sai kpohọ local government nọ i wo ọruẹrẹfihotọ otiọye na hayo who ve ru orọo nọ a re ru lele Uzi-Egọmeti ababọ ehaa efa nọ who re ru lele iei.
12 Ma fi eva họ inọ ekpọvio obehru na nọ ma rẹ nya lele u ti fiobọhọ thọ omai no idhere akpọ na.—Jọn 17:14, 16.
[Picture on page 5]
Whaha Iruemu Akpọ na Evaọ Uwhori
1 Osu akpọ nana, Setan, ọ rọ so ẹrọwọ mai. Fikiere, ọ be họre gaga re o ru omai raha izi Ebaibol. Ma re dikihẹ ga wọso iẹe eva ẹsikpobi re ma siọ abọ akpọ nọ ọ rrọ otọ esuo riẹ nọ a te raha no riẹriẹriẹ kẹle na ba ẹjọ.—Jem. 4:7; 1 Jọn 2:15-17.
2 Abọ nọ o wuzou gaga nọ o gwọlọ nọ ma jọ muẹrohotọ ziezi họ okenọ a bi ru uwhori. Ma rẹ gbaemu re ma whaha iruemu uwhori kpobi nọ i muhọ no orọwọ egagọ erue ze, imizi nọ a rẹ gọ, iruemu gbe ẹzi akpọ na, makọ oghẹrẹ nọ e jọ ẹwho mai ga te hayo rrọ odode ga te kẹhẹ. Wọhọ epanọ o rrọ evaọ eme efa na, eva etoke uwhori, oware nọ o rẹ j’omai oja họ re ma siọ oware ovo nọ u re gbe egagọ efuafo mai ku ba eruo, kpokpo iroro mai nọ ma rehọ Ebaibol wuhrẹ no, kpokpo iroro amọfa, hayo wha afuẹwẹ se odẹ Jihova. O rẹ mai woma re ma ruẹ-uye ekela, ẹkoko, ọwọsuọ, makọ ukpokpoma dede nọ o tẹ gwọlọ ere, fiki edikihẹ abọ-ẹzi mai, viukpenọ ma rẹ jẹ iruemu uwhori nọ i no Ebaibol ze he rehọ re ma sai ru eva were imoni gbe egbẹnyusu mai nọ e rrọ ukoko ho.
3 Eware Ekareghẹhọ nọ A rẹ Kẹ Evaọ Uwhori: Kọ u fo re a rọ eware itieye na kẹ okẹ evaọ etoke uwhori? Ẹjiroro nọ a re ro kpohọ oria nọ ohwo o jo whu họ re a sasa enọ e rrọ uweri na oma. Ẹjiroro nọ a rẹ rọ nya o rẹ jọ ọrọ uvi uyoyou gbe ọdawẹ nọ a re dhesẹ kẹ uviuwou nọ o rrọ uweri na, orọnikọ orọ isiuru oriobọ nọ a rẹ rọ kẹ owhẹ okẹ jọ họ hayo re whọ kẹ erara nọ e ziọ uwhori na okẹ hẹ. Fikiere, u du gwọlọ nọ ahwo nọ a rrọ uweri na a rẹ rọ eware ru ahwo nọ a ziọ uwhori ọghọ họ. O tẹ make rọnọ a wo ugho nọ a rẹ rọ rehọ iroro obọ rai kẹ ahwo ekẹ itieye, u fo re ahwo nọ a rrọ uweri a kareghẹhọ inọ oke uwhori yọ oke uweri gbe eroro didi kpahe uzuazọ ohwo, orọnikọ oke nọ a rẹ rọ da jẹ re, hayo oke nọ a re ro dhesẹ oma ha, wọhọ eware nọ a rẹ ghale kẹ ahwo nọ i re dhesẹ odẹ ohwo nọ ọ be kẹ okẹ na. (Ọtausi. 7:2; 1 Jọn 2:16) Ahwo nọ a bi weri kẹ ahwo a re kpohọ oria uwhori avọ ẹjiroro okẹ nọ a rẹ kẹ ae he. Uyoyou Oleleikristi o ta inọ ahwo nọ a rrọ uweri họ enọ e rẹ sae gwọlọ obufihọ re a sae rọ ẹro te araha igho uwhori na.—Jem. 1:27.
4 Oye jabọ nọ abọjọ evaọ uzoẹme na “Uwhori Ileleikristi—Abọ Avọ 4,” nọ a kere fihọ Odibọgba Uvie Mai ọrọ February 1994 (ọrọ Oyibo), ẹwẹ-obe avọ 3, o rọ ta nọ: “Ahwo nọ a gwọlọ rehọ ugho fiobọhọ kẹ enọ e rrọ uweri na, a rẹ sai se ai họ akotọ nyai ru ere. Ẹjiroro ọrọ okẹ utioyena nọ a re se ai họ akotọ nyae kẹ na orọnikọ re a ro there emu jẹ ha idi kẹ erara gbe imoni orua nọ i wo ororokẹ hẹ na ha, rekọ re a rọ wha ugho etehe-ori na gbe araha efa nọ i wuzou.” Fikiere, ma rọwo kugbe uruemu eware nọ a rẹ rọ kẹ okẹ eva etoke uwhori vievie he nọ o rọnọ uruemu nana u no Ebaibol ze he na yọ o rẹ wha uvi erere ọvuọvo se enọ e rrọ uweri na ha na. Ukpoye, e rrọ rọkẹ orro nọ e rẹ wha se ahwo-akpọ jẹ wha iruemu nọ i fo ho fihọ uwhori Ileleikristi.—Rom 12:2.
5 Edẹ Ikuhọ Ahwo nọ A Whu No: Eva uwhori, ma rẹ daoma sasa enọ e rrọ uweri oma. (2 Kọr. 1:3-5) Ọruẹrẹfihotọ ọvuọvo ọ riẹ kẹ uvumọ ohwo ho nọ o re ro se oware jọ hayo ta eme jọ ro ku edẹ họ ohwo nọ o whu na taure a tẹ te kẹ ovuẹ ori na hayo nọ a tẹ kẹ ovuẹ na no. Ohwo nọ ọ be kẹ ovuẹ uwhori ọ rẹ ta hayo ru uvumọ oware rọkẹ ẹjiroro orro orọkẹ ọnọ o whu na ha. Ukpenọ a re zihe uwhori na họ ehaa nọ a re ro jiri ọnọ o whu na, uwhori na u re rovie uvẹ fihọ nọ ma rẹ rọ ta kpahe ekwakwa-aghae Ọghẹnẹ, nọ o kẹre te aruoriwo riẹ nọ ọ rọ komai ẹruore ẹkparomatha. Ohwo nọ ọ be kẹ ovuẹ uwhori na ọ rẹ nya lele omaa ẹmeọta nọ a kẹ riẹ na, yọ wọhọ epanọ a dhesẹ na, rọ areghẹ fodẹ iruemu iwoma jọ erọ ohwo nọ o whu na. Otẹrọnọ ohwo nọ o whu na o kru ẹrọwọ riẹ kẹ Ọghẹnẹ te urere, u re woma re whọ ta kpahe ẹgbakiete riẹ. (Hib. 6:12) Eware iwoma nana nọ a rẹ tẹme te eva uwhori o rẹ wha omosasọ se enọ e rrọ uzuazọ je ru ai kareghẹhọ ọnọ o whu no na evaọ emamọ edhere.
6 Emuọriọ Eva Oria Uwhori: Ebaibol i dhesẹ vevẹ ohẹriẹ nọ o rrọ “oke jọ nọ a rọ viẹ, oke jọ nọ a rọ hwẹ; oke jọ nọ a ro weli, oke jọ nọ a re ro gbe ile.” (Ọtausi. 3:4) A jọ Ọtausiwoma Na 7:2 dhesẹ vevẹ ohẹriẹ nọ o rrọ “uwou uweri” gbe “uwou eha.” Uyero oria uwhori u re wo ohẹriẹ ulogbo no oria ehaa-orọo. U re vevẹ, uwhori Ileleikristi o rẹ jọ oke ehaa nọ a jẹ re, da, je kporo ile he.
7 Fikiere, otẹrọnọ a jọ uwhori there emu, a re rri rie wọhọ edhesẹ ọghoruo nọ uviuwou ohwo nọ o whu na a dhesẹ kẹ ahwo nọ a no ugbothabọ ze, nọ o rẹ sae jọ bẹbẹ kẹ re ae ọvo a ruẹ emu kẹ omarai fikinọ ae yọ erara. (Wawo Matiu 15:32.) Fikiere, ahwo nọ a no ewho ekẹloma ze a re rẹro emu nọ a ti there kẹ ae he, re a siọ araha igho ba efiba kẹ ahwo nọ a rrọ uweri na. Ukpoye, uyoyou o rẹ wọ ae nọ a je tube fi erara nọ i no ugbothabọ ze họ iwou rai jẹ rọ ẹro te ai, onana o vẹ jọ emamọ isẹri kẹ ahwo nọ a rrọ ukoko ho nọ i wo uruemu emuọriọ, idi-eda, gbe ile-igbe evaọ uwhori. (Ọtausi. 3:4, 8) Fikiere, nọ who te bi kpohọ uwhori, wo uthubro nọ a kere fihọ Uwou-Eroro ọ June 1, 1978 (ọrọ Oyibo), ẹwẹ-obe avọ 7 na họ iroro inọ “ahwo kpobi nọ a ziọ uwhori a re dhesẹ ororokẹ nọ a gbẹ rọ oriobọ ru eware evaọ edhere nọ a re ro fiba araha igho nọ uviuwou ohwo nọ o whu na a be wọ họ evaọ omaruẹrẹhọ kẹ uwhori na. Ukpoye, o rẹ jọ oware uwoma re a fiobọhọ kẹ uviuwou na evaọ ẹruorote eware uwou na hayo eware efa nọ i kie kpahe uwhori na.”
8 Ehaa Uwhori nọ A re Gbe Hẹrioke gbe Ukio Avivẹ: Uruemu ehaa uwhori nọ a re gbe hẹrioke hayo roi ori hẹrioke yọ a be da-idi, re-emu, je kporo ile i muhọ no orọwọ erue ze. Ẹjiroro nọ a be hai ro ru ei họ re a le izi imuomu vrẹ, re ugboma hayo ẹzi ohwo nọ o whu na ọ sae nya kpohọ uzuazọ ofa ababọ oware jọ nọ u re ru ei. Iviena wha muẹrohọ inọ eru ọruẹrẹfihotọ ehaa uwhori nọ a re gbe hẹrioke gbe ekpohọ ehaa itieye na e wọso Ikereakere na. Fikiere, uvumọ Oleleikristi o re ru ọruẹrẹfihotọ hayo kpohọ ehaa uwhori nọ a re gbe hẹrioke he, makọ evaọ umutho oke hayo aso-hẹrioke. Oware ovona u kie kpahe uwhori avivẹ onọ wọhọ epanọ a ta a re ru “re a ro fiobọhọ kẹ ohwo nọ o whu na ruẹrẹ oma họ kẹ uzuazọ ‘evaọ akpọ ọfa,’ re a jẹ yare obufihọ gbe ọthọwẹ ohwo nọ o whu na.” Setan—ọsẹ erue na—họ ọnọ ọ be wha iruemu nana haro, i no orọwọ erue na ze inọ oware jọ nọ a se ẹwẹ hayo ẹzi o rrọ ohwo oma nọ u re whu hu nọ ohwo o te whu. (Emu. 2:7; Izik. 18:4, 20a; Ol. 22:29; Jọn 8:44) Fikiere, ohwo kpobi nọ o bi ru ehaa uwhori nọ a re gbe hẹrioke, ru ukio avivẹ, hayo rọ edhere jọ tha ai uke yọ o bi wobọ evaọ ẹgọ ahwo nọ a whu no. Re a rri ori ogbẹnyusu oyoyou hayo omoni mai nọ o whu no o thọ họ otẹrọnọ whọ gwọlọ rue riẹ, rekọ oware nọ ma rẹ whaha họ “ori na nọ a rẹ wọ fihọ oria jọ” erara e vẹ be nyai rri rie jẹ ta eme ujiro kẹe.
9 Eware Efa: Iruemu efa nọ i no Ebaibol ze he nọ a rẹ rọ do-orro-họ jẹ dhozọ ahwo nọ a whu no nọ Isẹri Jihova a rẹ jọ w’abọ họ e kẹre te: ile nọ a re gbe ruọ ore nọ a te ki ohwo na no, evaọ eria jọ, a re ru onana evaọ edẹ avọ eree, ẹdẹ avọ ikpegbisoi, hayo ẹdẹ avọ udhuvẹ; uzou nọ a rẹ fọrọ ukoliẹ; ẹnware ikpe-ituabọ; ẹwha oghẹrẹ ifiare jọ evaọ abọjọ oma na; eka nọ a re bru họ oma fiki ohwo nọ o whu na; gbe ẹgọ nọ a rẹ gọ ori na ẹkwoma ẹwọ nọ a rẹ wọe kpohọ iwou sa-sa gbe ‘eria nọ i wuzou’ taure a tẹ nyai ki ei. (Izerẹ 19:28; Rom 1:21-25) Ofariẹ re, oghẹrẹ iwu jọ nọ a re fihọ evaọ etoke uwhori yọ uruemu jọ nọ a re ru fiki ozọ gbe orro nọ a rẹ kẹ ohwo nọ o whu na evaọ eria sa-sa eva Nigeria. Evaọ abọjọ Nigeria, imoni orua, ilorogu, hayo ahwo ẹwho na a rẹ ta kẹ uviuwou ohwo nọ o whu na inọ a dẹ imẹlu ọsoso hayo ewe, erifẹ, idi, gbe elẹ kẹ ae. Ahwo ẹwho hayo ilorogu, hayo imoni orua na a vẹ ghale erao na rehọ jẹ ria ae no. Rekọ taure a tẹ te re erao na, a re ku azẹ erao na ku otọ rọ gọ esemọ wọhọ epanọ a rẹ rọ udi ru na. A re ru onana ro kiofu izi esemọ nọ i whu no na. Kọ u fo re uvi idibo Jihova nọ a rọ uzẹme Ẹme riẹ rọ dẹ no iwuhrẹ erue, ugbẹrọwo, gbe iruemu nọ e rrọ erọ Ileleikristi hi no a nya lele iruẹru enana? Malakae 3:18 u fi ẹgba họ oware nọ o jẹ gwọlọ re uvi idibo Jihova a wo ohẹriẹ no akpọ na. Ofariẹ re, a jọ 1 Jọn 5:21 vẹvẹ omai unu vevẹ inọ ma ‘si oma no edhọ-egọ.’
10 Wọhọ Ileleikristi nọ i wo ẹrọwọ, ma re weri jẹ kareghẹhọ iyoyou mai nọ i whu no. Rekọ, uzẹme Ebaibol u re ru edada gbe uweri mai kpotọ inọ ahwo nọ a whu no a rrọ uvumọ oria ruẹ uye he jegbe inọ ẹruore ekparomatha ọ riẹ. Fikiere, ma re dikihẹ ga nya lele uzẹme Ebaibol na, ma vẹ whaha iruemu nọ i no Ebaibol ze he riẹriẹriẹ gbe iruemu nọ ahwo nọ a rrọ ukoko Jihova ha a re ru evaọ uwhori, wọhọ epanọ ma be hae jọ eware efa ru na.—1 Kọr. 10:31; 2 Kọr. 6:14-18; Jọn 17:16.
11 Ẹkwoma ẹro nọ ma re muhọ ithubro gbe ekareghẹhọ nana nọ a ro no Ebaibol ze na, ma te nya evaọ edhere Ọghẹnẹ je ru eware nọ e rẹ were iẹe.—Kọl. 1:10.