Rehọ Ebe Mai Ruiruo avọ Areghẹ
1 Edhere ọkpakpatiẹ nọ ma be rọ rehọ ebe mai ruiruo o muhọ ẹkwoma ẹghale emagazini Uwou-Eroro ọ July 1, 1879 (ọrọ Oyibo) nọ i bu te 6,000. Anwọ okioye na ze, ma rọ ijini kere oghoghẹrẹ ebe sa-sa no, jẹ ghale ibuobu gbidi gbidi kẹ ahwo no.
2 Ọruẹrẹfihotọ Azọhọ nọ O Gine n’Evaze Na: Evaọ December 1999, a ru rie vevẹ inọ emagazini gbe ebe i ti te iwhowho-uvie gbe amọfa nọ a wo isiuru obọ evaọ edhere ọ azọhọ unevaze, koyehọ, ababọ ayare hayo ẹfodẹ nnọ a hwa ugogo unuigho jọ wọhọ osa nọ a re ro wo obe jọ. Nọ ma te fi obe họ ada, ma rẹ jẹ azọhọ unevaze rehọ rọ tha iruo akpọ-soso ọrọ ewhowho emamọ usi na uke. Ababọ avro, ma ruẹ no inọ Jihova ọ be ghale ọruẹrẹfihotọ ọnana.—Wawo Matiu 6:33.
3 Oware nọ Who re Ru Evaọ Usiuwoma Ota: Ma te gbẹ rehọ eme emuhọ nọ ma ruẹrẹ kpahe ziezi rọ kpare isiuru. Ohwo o gbe dhesẹ isiuru hu, ma re du rọ obe kẹe he. Ma gwọlọ gbolo ebe mai kufiẹ hẹ ẹkwoma ẹrọkẹ ahwo nọ a wo isiuru hu. Evaọ abọdekọ riẹ, nọ ohwo o te dhesẹ isiuru jẹ rọwo inọ o ti se obe na, a rẹ sae rehọ iẹe kẹe. Ma gwọlọ rọ ebe mai ruiruo avọ areghẹ.
4 Who te dhesẹ obe na kẹ ohwo na no, nọ ohwo na o te dhesẹ isiuru kpahe iẹe, whọ sae ta nọ: “Who te se obe na, whọ te reawere riẹ. Nọ iruo mai e rrọ iruo nọ ma be jọ akpọ-soso ru na, u re gbe ahwo buobu unu oghẹrẹ nọ ma be sae rọ ruẹ ugho ru iruo na. Ahwo buobu nọ a be rehọ ebe mai a be hai dhesẹ ovuhumuo kẹ eware nọ a te jarai wuhrẹ, yọ a be hai ru unevaze kẹ iruo akpọ-soso mai. Nọ a te ru ere, ma re mi ai unevaze na avọ evawere.”
5 Kọ A Gine Dhesẹ Uvi Isiuru? U re vevẹ inọ o rrọ ẹjiroro mai hi re ma rọ ebe mai kẹ ahwo ugbẹrọkẹ. Ma gwọlọ nọ ebe na i ru ẹjiroro rai gba, koyehọ, re i fiobọhọ kẹ ahwo nọ a wo udu-oruọzewọ gbe wuhrẹ haro kpahe ẹjiroro igbunu Jihova. O rẹ jọ oware uvrẹvru re ma nyasiọ ebe na ba kẹ ahwo nọ a wo uvumọ ovuhumuo kẹ eware abọ-ẹzi hi. (Hib. 12:16) Re efihọ ada ebe o wha emamọ iyẹrẹ ze o roma hwa ẹgba ra nọ who re ro vuhu uvi isiuru. Ẹvẹ who re ro vuhu nọ ohwo o dhesẹ uvi isiuru? Emamọ oka jọ họ uvẹ nọ ohwo ọ k’owhẹ re wha t’ẹme. Hayo nọ ọ tẹ be kezọ evaọ okenọ whọ be t’ẹme na, be kuyo enọ ra, jẹ be ta ẹkẹ eva riẹ evaọ ẹme na. Ọ tẹ be rehọ unu kpotọ t’ẹme k’owhẹ ziezi avọ adhẹẹ u re dhesẹ emamọ uruemu. O te bi rovie Ebaibol riẹ lele owhẹ hayo gaviezọ k’owhẹ nọ who bi se na o sai dhesẹ nọ o wo adhẹẹ kẹ Ẹme Ọghẹnẹ. Ẹsibuobu, u re fiobọhọ re whọ nọ ohwo na sọ o ti se obe nọ whọ be rọ kẹe na. Ofariẹ, whọ rẹ sae ta nọ who ti zihe ze re wha t’ẹme na haro. Emamọ uyo nọ ọ kẹ yọ imuẹro efa inọ o wo isiuru. Who te muẹrohọ uvi isiuru sa-sa itieye na, o sai muowhẹ ẹro inọ ohwo na o ti se obe na.
6 Ebe nọ Ma Rehọ kẹ Eroruiruo Obọmai: Nọ ma tẹ rehọ ebe kẹ eroruiruo obọmai, u fo re ma kareghẹhọ inọ ma re ru unevaze. Ma rẹ sai ru unevaze na eva okenọ ma rọ rehọ ebe na hayo eva oke ofa. Ofariẹ re, ma rẹ rọ ẹro te ebe nọ ma rehọ kẹ eroruiruo obọmai ziezi re e seba ẹjọ gbegbe hayo re e seba ẹraha. Nọ ma tẹ nya siọ ebe na ba obọ emaha na wọhọ eware nọ a rẹ rọ zaharo, yọ u dhesẹ eroruiruo ebe eghaghae mai evaọ edhere areghẹ hẹ.
7 Nọ ọraha Babilọn Ologbo na o bi si kẹle na, otunyẹ ọ rẹriẹ aro dhe egagọ kpobi. Isiuru mai họ re obọdẹ iruo ẹta usiuwoma Uvie na evaọ akpọ-soso e gbẹ nyaharo ababọ ẹwhaha, re o rehọ ahwo buobu ziọ esiwo.—Mat. 24:14; Rom 10:13, 14.