Ọkiẹkpemu Isukulu Odibọgba Esuo-Ọghẹnẹ

A te kẹ iyo enọ nọ e rrọ obotọ na eva Isukulu Odibọgba Esuo-Ọghẹnẹ nọ a ti ru eva oka nọ o rọ October 30, 2006 muhọ. Ọsẹro isukulu na ọ te rehọ iminiti 30 ru ọkiẹkpemu ọrọ eme nọ a ru eva eka ọ September 4 rite October 30, 2006. [Muẹrohọ: Nọ a gbe kere oria nọ a rehọ ẹme no ze lele onọ na ha, o gwọlọ nọ who re ru ekiakiẹ kẹ omobọ ra ro duku uyo na.—Rri obe ọ Isukulu Odibọgba, ẹwẹ. 36-37.]

EKWAKWA ẸMEỌTA

1. Fikieme omakpọmu u ro wuzou nọ ma tẹ be ta ẹme, kọ ẹvẹ ma sai ro bru awaọruọ mai kpotọ? [be-IS ẹwẹ. 135 edhe. 5–ẹwẹ. 137 edhe. 2, ekpẹti]

2. Nọ a tẹ nọ omai kpahe eware nọ ma rọwo, fikieme ma jẹ daoma re ma rehọ Ebaibol na rọ kuyo? [be-IS ẹwẹ. 143 edhe. 1-3]

3. Ẹvẹ ma sai ro wo ona ziezi evaọ eroruiruo Ebaibol na? [be-IS ẹwẹ. 144, ẹkpẹti]

4. Fikieme u ro wuzou re ma rehọ Ebaibol na ruiruo ẹsikpobi nọ ma tẹ rrọ usiuwoma ota, kọ ẹvẹ ma sae rọ ta udu họ amọfa awọ re a rehọ iẹe ruiruo nọ ma tẹ rọ iwuhrẹ ukoko? [be-IS ẹwẹ. 145-146, ekpẹti]

5. Nọ ma tẹ be fodẹ oria ikereakere nọ ma gwọlọ se, eware ivẹ vẹ ma rẹ daoma le tobọ? [be-IS ẹwẹ. 147 edhe. 2]

ẸME. 1

6. Fikieme ma jẹ whaha omoya? (Ol. 75:4, 5, 10) [w06-IS 8/1 ẹwẹ. 29 edhe. 3]

7. Eme họ “ozodhẹ ỌNOWO na”? [w87-E 5/15 ẹwẹ. 28 edhe. 3-4]

8. Didi eware ihrẹ e rẹ tọtọ Jihova oma? (Itẹ 6:16-19) [w87-E 5/15 ẹwẹ. 28 edhe. 12]

9. Wọhọ epanọ Itẹ 2:1-5 o kẹ uduotahawọ, eme u dhesẹ re ma hae gwọlọ eriariẹ, otoriẹ, gbe orimuo “wọhọ isiliva, jẹ wọhọ efe nọ a sino”? [be-IS ẹwẹ. 38 edhe. 4]

10. Fikieme obọ ufihọ kẹ oruori o rọ wọhọ emomo kẹ Jihova? [w87-E 5/15 ẹwẹ. 29 edhe. 14-15]

ISASE EBAIBOL ẸKPOKA

11. Ẹvẹ Devidi o ro ‘ru udu riẹ wolẹ gbe ẹwẹ riẹ dhedhẹ wọhọ ọmọ nọ a bru-evie no nọ ọ rrọ adobọ oni riẹ,’ kọ ẹvẹ ma sae rọ rehọ aro kele iei? (Ol. 131:1-3)

12. Didi omosasọ ma rẹ sae ruẹ evaọ eme Olezi 139:7-12?

13. Iriruo oruaro Jihova jọ vẹ a fodẹ evaọ Olezi avọ 145 nọ ma sai ro jiri ei evaọ elẹ mai gbe evaọ odibọgba na? (Ol. 145:3)

14. Evaọ oghẹrẹ vẹ ozodhẹ Jihova o rọ rrọ “emuhọ eriariẹ” gbe “emuhọ areghẹ”? (Itẹ 1:7; 9:10)

15. Eme “ijaje mẹ” gbe “eme mẹ” nọ a tẹme te evaọ Itẹ 7:1, 2 na e kẹre te?