Ẹkpẹti Onọ

◼ Kọ u fo re ukoko soso u ru ọruẹrẹfihotọ ekiọthuọ hayo eware itieye efa nọ ugho u re no ze re a ro ru iruẹru ukoko?

O rrọ uruemu ichọche re a ru eware nọ e rẹ wha igho tha, wọhọ ehavẹste, eware nọ a rẹ zẹ, hayo ehaa akpẹwẹ nọ a rẹ jọ zizie ikpahwo. Dedenọ ahwo jọ a sai roro nọ emamọ eware a be rehọ igho na ru, uzẹme riẹ họ oyena yọ edhere igho-yare jọ. Isẹri Jihova a rẹ rehọ edhere yena wo igho rai hi.

Uvitha avivẹ ọrọ Uwou-Eroro na, August 1879 o ta kpahe epanọ ma rọ se nọ ma rẹ raro kele ichọche yare igho ho, o ta nọ: “Ma rẹroso Jihova kẹ uketha orọ ‘Zion’s Watch Tower,’ yọ o rrọ ere na, ma te lẹ hayo yare ahwo igho kẹ ekere riẹ hẹ. Okenọ Ọnọ ọ tanọ: ‘Oro gbe isiliva kpobi emẹ,’ ọ tẹ siọ ugho nọ a re ro ru iruo na ba ẹrọze no, ma te riẹ nọ oke nọ ma rẹ rọ siọ obe na ba ekere u te no.”

Ma ti gbe lele ehri-uzi Ebaibol nana: “Ohwo o re ru wọhọ epanọ o roro evaọ eva riẹ, o jọ o rọ obọ [okeke] hayo ọgbahọ họ, keme Ọghẹnẹ o re you ohwo nọ ọ rẹ kẹ okẹ-evawere.” (2 Kọr. 9:7) A fi itehe unevaze họ Ọgwa Uvie na re ahwo a sai ru azọhọ unevaze nọ o tẹ ruọ ai. (2 Iv. 12:9) Ma rẹ yare unevaze mi ahwo ho, yọ a re ru unevaze na avọ iroro nọ oware jọ u ti noi ze te ai obọ họ.