Oghẹrẹ nọ U Fo nọ Ma re Rri Ebe Mai Jẹ Rehọ Ai Ruiruo
1 Anwọ ikpe jọ ze na, ukoko na u bi kere ebe nọ ma be rọ ta usiuwoma gbe enọ ma be rehọ kẹ omobọ mai ababọ ugogo unuigho jọ nọ ma be wha fihọ ae. Ọruẹrẹfihotọ nana ọ be wha uvi eghale ze, yọ u ru oghẹrẹ nọ a bi ru eware buobu lọhọ no evaọ obọ Ebẹtẹle gbe evaọ ikoko. Rekọ u fo re ma riẹ inọ dede nọ ebe na i wo “ugogo unuigho” nọ a be wha fihọ ae he, orọnikọ u dhesẹ nọ ebe na “ọvọvẹ” hẹ. Re a dẹ je vi ekwakwa nọ a bi ro kere ebe na no obọ ẹwho-Iyibo ze, jẹ wha emu abọ-ẹzi nana se ikoko o be rehọ ugho buobu. Fikiere, o roja re ma riẹ ugogo eware jọ kpahe oghẹrẹ nọ u fo nọ ma re ru ebe nana.
2 Fikieme o jẹ rrọ owha-iruo mai re ma ru unevaze kẹ iruo akpọ-soso na? (Se Itẹ 3:9.) O rrọ uvẹ-ọghọ ulogbo inọ ma sae rọ ekwakwa aghae mai jiri Jihova. Eware iwoma nọ ma wo kpobi obọ Jihova i no ze. Unevaze nọ ma re ru yọ edhere jọ nọ ma re ro dhesẹ kẹ Jihova inọ ma wo ovuhumuo kẹ eware kpobi nọ o bi ru k’omai. Kọ ma gbẹ rrọ ahwo nọ Jihova ọ ghale no? Fikiere, orọnikọ ahwo nọ ma fi ebe họ ada kẹ ọvo ma re rẹro nọ a re ru unevaze he.
3 Ẹvẹ ma re ru ebe mai? (Se Matiu 25:21.) Oruọzewọ họ oware nọ a jọ onana gwọlọ. Oruọzewọ o rẹ wha eghale buobu ze. O sae j’omai oma ẹsejọ inọ ma gbẹ make rọ ẹro te ebe mai hi, u muẹme he. Rekọ nọ ma tẹ rọ ẹro te eware esese, a sai mu eware ilogbo efa họ omai obọ. Evuẹ nọ e rrọ ebe mai na yọ emu abọ-ẹzi nọ ọ ghare gaga. U fo re oghẹrẹ nọ ma be sẹro ebe mai u dhesẹ onana via. U fo ho re ma rọ ebe mai kẹ emaha nọ a riẹ aghare ebe na ha hayo nọ i wo otoriẹ eware nọ e rrọ ae eva ha, nọ e rẹ raha ai no. Nọ emaha e tẹ riẹ obe ese ziezi te epanọ a re ro wo ebe obọrai no, u fo re a dhesẹ kẹ ai epanọ a re ru ebe na nọ e gbẹ raha ha. Ma jọ ikoko jọ muẹrohọ nọ a be nya siọ ebe ba otọ, nọ e be raha no. Onana u dhesẹ emamọ ovuhumuo kẹ aghare nọ ebe mai i wo ho.
4 Kọ ugho nọ me bi ro ru unevaze u gbe bu tere he, mẹ sae rehọ obe? (Se 2 Ahwo Kọrint 8:13-15.) Ugboma Esuo na o gwọlọ nọ ohwo kpobi o wo erere no ọruẹrẹfihotọ ithubro abọ-ẹzi nọ a be jọ ikoko Isẹri Jihova nọ e rrọ akpọ-soso kẹ ze. Fiki ẹjiroro nana, a kẹ ọkpọvio na inọ ugogo ebe nọ a re ro ru iwuhrẹ na e rẹ jariẹ kẹ ohwo kpobi, ebe wọhọ Uwou-Eroro Na gbe obe nọ a re ro ru Uwuhrẹ Obe Ukoko na. Rekọ, orọnikọ onana o rẹ lẹliẹ omai ru ebe na whọhọwhọhọ họ. Evaọ ekwakwa wọhọ CD, DVD, gbe ekwakwa obọdẹ efa nọ ukoko na u bi kporo na ma rẹ sai mi ohwohwo. O roja ha re omomọvo evaọ uviuwou o wo ọvuọ riẹ. Yọ o roja gbe he re uviuwou kpobi u wo ekasẹte ividio gbe DVD kpobi nọ ukoko u kporo.
5 Makọ ma rehọ ebe hayo ma rehọ họ, joma riẹ nọ o rrọ owha-iruo mai gbe uvẹ-ọghọ k’omai re ma rọ unevaze mai tha iruo akpọ-soso na uke, yọ ma re rri uvẹ-ọghọ nana ghaghae o tẹ make rrọ nọ ma wo ugho buobu nọ ma re ro ru unevaze he.
6 Ma wo irẹro inọ ovuẹ nana o te w’omai dhesẹ ovuhumuo kẹ ebe ukoko na nọ e be hai te omai obọ na vi epaọ ọsosuọ. Jọ mai kpobi ma rehọ oghẹrẹ nọ ma rri ebe mai jẹ be rehọ ai ruiruo dhesẹ inọ ma rrọ ahwo oruọzewọ makọ evaọ eware esese, re a sae rọ ere mu eware ilogbo h’omai obọ evaọ obaro.