Imuẹro Ẹrọwọ Ọgaga!
1. Didi eware iyoma Jesu ọ ta nọ e te romavia?
1 Ikọ na a jẹ gaviezọ kiọkiọkiọ nọ Jesu ọ jẹ ta kpahe ọzino riẹ gbe ekuhọ eyero akpọ na. Ọ ta nọ iye buobu i ti te ahwo-akpọ—ẹmo, ohọo, etọ nọ i ti nuhu, gbe eyao sa-sa. O te je fibae nọ a re ti mukpahe ilele riẹ, a ti kpokpo ai, je kpe ai dede. Eruẹaro erue e te romavia je su ibuobu thọ. Uyoyou ahwo buobu u re ti kiekpo.
2. Fikieme o rọ rrọ oware igbunu inọ ma be jọ akpọ-soso whowho emamọ usi na?
2 O sae jọnọ u gbe ikọ na unu nọ Jesu ọ ta inọ evaọ udevie eyena kpobi na, a te vuẹ emamọ usi Uvie Ọghẹnẹ nya otọakpọ na soso duwu. (Mat. 24:3-14) Nẹnẹ ma be rọ ẹro ruẹ orugba eruẹaruẹ yena evaọ edhere nọ o gbunu gaga. Dedenọ ma be rria etoke nọ okpẹtu ọ jọ d’otọ fia, Isẹri Jihova a bi whowho emamọ usi na avọ ajọwha. Nọ uyoyou ahwo akpọ na u bi kiekpo na, yọ uyoyou mai u bi dhe ẹgẹga. Dedenọ “erẹwho na kpobi” i mukpahe omai, ma be jọ enwenọ erẹwho kpobi ta usiuwoma.
3. Eme whọ jọ iyẹrẹ-iruo na ruẹ nọ o k’owhẹ uduotahawọ?
3 O rrọ oware uduotahawọ re ma kiẹ iruẹru Isẹri Jihova erọ ukpe iruo nọ u kpo na riwi wọhọ epanọ o rrọ iyẹrẹ-iruo nọ a fihọ ẹwẹ-obe avọ 3 rite orọ avọ 6 na! Onana họ orọ ukpe avọ 16 nọ ma be rọ raha euwa nọ i bu vi ima-odu evaọ iruo usiuwoma ota na kukpe kukpe. Onana ginọ imuẹro ẹrọwọ ọgaga! Ma jọ unu ekobaro wo ẹvi 5.8 evaọ udhusoi, evaọ unu iwhowho-uvie ẹvi 3.1 gbe evaọ ebe-iwuhrẹ Ebaibol ẹvi 4.4 evaọ udhusoi. Evaọ ahwo nọ a họ-ame, ma rọ 20.1 evaọ udhusoi ro vi erọ ukpe iruo nukpo. O rrọ oware evawere nọ ma rọ ruẹ inọ enwenọ ahwo ima ihrẹ a be rọ ẹrọwọ gọ Jihova nẹnẹ, bu vi oke ofa kpobi evaọ ikuigbe ohwo-akpọ! Nọ who bi rri iyẹrẹ-iruo na, eme whọ ruẹ nọ o ginẹ tuduhọ owhẹ awọ gaga?
4. Iruemu iyoma vẹ ọzae jọ o si obọ no taure ọ tẹ te họ-ame?
4 Ajọ o thọrọ omai ẹro ho inọ ẹvi nana nọ ma ta kpahe na yọ inọmba gheghe he, rekọ ahwo nọ a dhesẹ ẹrọwọ via. Rri oriruo jọ. Orẹwho Bolivia oye Guillermo ọ rria no emaha ze. A yẹ riẹ evaọ 1935, yọ ikpe izii ọ jọ nọ o ro mu iruo họ eru evaọ oria nọ a rẹ jọ kọ ige. No emaha ze, ọ jẹ hae re ẹbe ige rọ kpairoro vrẹ edada iruo egaga nọ o bi ru. O te je mu idi họ ẹda vrẹta je vovo isigareti. Nọ o mu oware nọ Jihova ọ gwọlọ mi ei họ ewuhrẹ no, Guillermo ọ tẹ siọ isigareti ivovo ba jẹ siọ idi eda vrẹta ba. Use-abọ ulogbo nọ ọ rẹriẹ ovao ku họ epanọ o re ro si obọ no ẹbe ige nọ ọ jẹ hae re na. Ọ jẹ lẹ kpahe onana ẹsikpobi, ọ tẹ sai si obọ no ekpehre uruemu nana. Nọ o nwene je si obọ no eware etọtọ nọ o je ru no, ọ tẹ te họ-ame. Ọ ta nọ: “Enẹna, oma mẹ o fo, me te je wo evawere.”
5. Eme ọ rrọ isiuru ra?
5 Jihova o gine wo isiuru gaga kpahe ahwo. O rrọ isiuru riẹ re ahwo kpobi a kurẹriẹ. (2 Pita 3:9) Ere o rrọ isiuru mai re. Ajọ udu mai o wọ omai dao ẹgba mai kpobi evaọ obọ ufihọ kẹ ahwo nọ a wo evezi re a ruẹse riẹ je you Jihova wọhọ omai.