Ikokohọ Akpọ-Soso E rẹ Wha Orro se Jihova
1. Ẹjiroro vẹ ikokohọ ilogbo mai i bi rugba?
1 Isẹri Jihova a be hae jọ ikokohọ ilogbo ẹsiẹvo ẹgbukpe wo omosasọ gbe uduotahawọ abọ-ẹzi jẹ reawere omakugbe osasa Ileleikristi. Ikokohọ ilogbo ahwo Jihova e tẹ jẹ rrọ obọdẹ edhere nọ a bi ro whowho odẹ Jihova gbe emamọ usi Uvie na.
2. Didi uvẹ ikokohọ akpọ-soso i re rovie fihọ?
2 Kukpe kukpe, a be hae ruẹrẹ ikokohọ ubrotọ họ evaọ akpọ soso re ma sai wo uduotahawọ abọ-ẹzi. Rekọ ẹsejọ ma re ru ikokohọ akpọ-soso evaọ ekwotọ jọ. Onana u re rovie uvẹ fihọ nọ ma re ro dhesẹ inọ ukoko na yọ ukoko akpọ-soso, o rẹ jẹ jọ obọdẹ isẹri kẹ amọfa.
3. (a) Kọ o lọhọ re ohwo kpobi o kpohọ ikokohọ akpọ-soso? Ru ei vẹ. (b) Ẹvẹ ehri-uzi nọ o rrọ Ahwo 1 Kọrint 14:40 u re ro fi obọ họ k’omai nọ a gbẹ make salọ omai kẹ okokohọ na ha?
3 Ọruẹrẹfihotọ Ẹsalọ Ahwo nọ a rẹ Nya: Inievo buobu a kpohọ ikokohọ akpọ-soso no evaọ oke nọ u kpemu. Evaọ obaro, o te sae lọhọ kẹ inievo efa buobu re a kpohọ ikokohọ itieye na. Rekọ, re ma sai ru ẹjiroro ikokohọ akpọ-soso na gba, je ru eware kpobi kpatiẹ, ọruẹrẹfihotọ na họ uwou-ogha kpobi o rẹ salọ umutho ahwo nọ a re kpohọ okokohọ akpọ-soso nọ a ghale orẹwho rai fihọ. Onana u re ru ei nọ inievo i je no abọ akpọ na sa-sa ze nọ o rẹ jọ uduotahawọ kẹ inievo nọ e rrọ ẹkwotọ yena jẹ jọ isẹri kẹ ahwo nọ a rrọ ukoko na ha. Fikiere, orọnikọ ahwo kpobi nọ a fi obe họ, nọ Ogbẹgwae Iruo Ukoko rai u kuenu kẹ a rẹ salọ re a kpọhọ okokohọ na ha. Ma riẹ nọ o te da ahwo jọ gaga nọ a gbẹ rọ salọ ae he, rekọ ma fievahọ nọ ohwo kpobi o ti w’otoriẹ ugogo ẹjiroro nọ o rọ rrọ ere.—1 Kọr. 14:40.
4. Ono ọ rẹ salọ ahwo nọ a re vi no orẹwho kpohọ okokohọ akpọ-soso, kọ fikieme?
4 Re emamọ iyẹrẹ e sai noi ze, ma be yare inọ jọ ohwo kpobi ọ nya lele ọruẹrẹfihotọ nọ a ru kẹ ikokohọ akpọ-soso na. Otẹrọnọ inievo nọ uwou ogha o salọ họ a tẹ rọ udu obọrai kpohọ okokohọ akpọ-soso jọ, onana o rẹ wha ebẹbẹ ze. Uwou ogha o rẹ salọ ahwo nọ a re vi no orẹwho rai kpohọ okokohọ akpọ-soso. Onana o r’oja re ahwo a seba ebu hrọ evaọ ogege okokohọ na. Otẹrọnọ ahwo a bu ga hrọ evaọ ogege okokohọ, ọruẹrẹfihotọ okokohọ na ọ rẹ nya kpatiẹ hẹ, yọ o rẹ lẹliẹ ahwo egọmeti rehọ emamọ ubiẹro rri omai hi.
5. (a) Didi uruemu nọ u fo ho a muẹrohọ evaọ okokohọ akpọ-soso ọrọ 2003? (b) Ehri-izi Ebaibol vẹ i re fi obọ họ kẹ omai whaha uruemu nọ ma jọ obehru fodẹ na?
5 Evaọ 2003, ma muẹrohọ nọ usu ahwo nọ a jọ Nigeria salọ nọ i kpohọ okokohọ evaọ obọ Ghana, ejọ e wha emọ esese rai lele oma dede nọ uwou ogha o vẹvẹ unu kpahe onana. Onana o wha evedha se ahwo jọ nọ i kpohọ okokohọ na nọ a ruẹ ahwo jọ nọ a wha emọ nọ unuikpe rai u kpotọ vrẹ unuikpe nọ a kuvẹ riẹ kpakiyọ a vẹvẹ unu kpahe onana. (Se Ahwo Hibru 13:17.) O gwọlọ nọ ma yoẹme evaọ abọ nana re a sai ru okokohọ na evaọ edhere nọ ọ rrọ kpatiẹ. Nọ ma te fi emamọ oriruo h’otọ kẹ inievo mai, o rẹ wha uyoyou, udhedhẹ gbe okugbe haro.—1 Kọr. 16:16; Fil. 2:1-4.
6, 7. Eme ahwo nọ a salọ re a kpohọ okokohọ na a re wo họ iroro?
6 Ahwo nọ a salọ inọ a kpohọ okokohọ na a re woi họ iroro inọ ẹjiroro nọ a bi ro kpohọ okokohọ na họ re a wha isiuru Uvie na haro. Ma rẹ sai ru ẹjiroro nana gba otẹrọnọ ahwo nọ a salọ kpobi a rẹ nya lele ọruẹrẹfihotọ kpobi nọ ukoko na u ru fiki okokohọ na, re a siọ ọruẹrẹfihotọ obọ rai ba eruo.
7 Evaọ ukpe 2009, a te jọ erẹwho sa-sa ru ikokohọ obọdẹ evaọ akpọ na. Evaọ usu ikokohọ akpọ-soso nana, ọrọ Ghana a ghale Nigeria fihọ. Evaọ obọnana, a be salọ ahwo nọ a ti kpohọ okokohọ nana. Ogbẹgwae Iruo Ukoko sa-sa a whobọhọ obe kẹ iwhowho-uvie nọ i te nọ e rehọ oma mudhe jẹ họ-ame no, je vi ebe rai se uwou ogha no. Ma bi rẹro inọ ahwo nọ a salọ kpobi evaọ Nigeria a te daoma dhesẹ emamọ uruemu evaọ udevie amọfa nọ a ti no erẹwho efa ze.
8. Oghẹrẹ uruemu vẹ u fo nọ ma re dhesẹ nọ ma te kpohọ ikokohọ akpọ-soso hayo erọ obonẹ?
8 Te a salọ omai re ma kpohọ okokohọ akpọ-soso, hayo ma te kpohọ ikokohọ ubrotọ mai evaọ obonẹ, jọ uruemu mai o kẹ imuẹro inọ ma be rọ udu mai kpobi gọ Jihova, avọ isiuru nọ ma rẹ rọ rehọ oware kpobi nọ ma bi ru rọ wha orro sei!—1 Kọr. 10:31; 1 Pita 2:12.