“Rọ Kpahe Ithihi Riẹ” Kpekpekpe
1. Ẹvẹ ma sae rọ jọ egbodibo nọ i wo onaa?
1 Jesu o kpohọ isukulu ikpehru oke riẹ hẹ, ghele na ọ jọ Ọgbodibo nọ ọ mae rro evaọ ikuigbe ohwo-akpọ. U woma kẹhẹ inọ a kere ikuigbe odibọgba Jesu fihotọ kẹ erere mai. Re ma sae jọ egbodibo nọ i wo onaa, ma rẹ “rọ kpahe ithihi riẹ” kpekpekpe.—1 Pita 2:21.
2. Eme o re fiobọhọ k’omai dhesẹ oghẹrẹ uyoyou nọ Jesu o wo kẹ ahwo?
2 Dhesẹ Uyoyou kẹ Ahwo: Uyoyou o wọ Jesu fiobọhọ kẹ ahwo. (Mak 6:30-34) Ibuobu ahwo nọ e rrọ ẹkwotọ mai ‘a rrọ edada,’ o tẹ jẹ gwọlọ nọ a rẹ riẹ uzẹme na. (Rom 8:22) Ma te bi roro kpahe uyero ọyawọ nọ a rrọ gbe isiuru nọ Jihova o wo kpahe ae, o rẹ wọ omai ruabọhọ usiuwoma nọ ma rẹ ta kẹ ae. (2 Pita 3:9) Ofariẹ, ahwo a rẹ mae gaviezọ kẹ omai nọ a tẹ ruẹ nọ ma wo uvi isiuru kpahe ae.
3. Uvẹ vẹ Jesu ọ jẹ rọ ta usiuwoma?
3 Rọ Uvẹ Kpobi nọ U Rovie Fihọ Ta Usiuwoma: Jesu ọ rehọ uvẹ kpobi nọ u rovie fihọ rọ vuẹ amọfa emamọ usi na. (Mat. 4:23; 9:9; Jọn 4:7-10) Epọvo na, ma gwọlọ ruẹrẹ oma kpahe re ma whowho emamọ usi na nọ ma be wha iruẹru okpẹdẹ mai haro na. Inievo jọ a rẹ wha Ebaibol gbe ebe ukoko na lele oma re a sae rọ ta usiuwoma eva oria iruo, obọ isukulu, nọ a te bi kpohọ erẹ, obọ eki gbe eria efa.
4. Ẹvẹ ma sae rọ tẹrovi ẹta kpahe Uvie na evaọ usiuwoma ota mai?
4 Tẹrovi Uvie Na: Emamọ usi Uvie na họ uzoẹme nọ Jesu ọ jẹ rọ ta usiuwoma. (Luk 4:43) O tẹ make rọnọ ma rọ Uvie na mu ẹmeọta mai họ họ, ma rẹ daoma fiobọhọ kẹ ohwo nọ ma bi lele t’ẹme na re ọ riẹ oware nọ Uvie na o jẹ r’oja. O tẹ make rọnọ ma be fodẹ iyero akpọ nọ i bi yoma nọ u dhesẹ inọ ma be rria edẹ urere na, ma rẹ tẹrovi ewhowho ‘usiuwoma emamọ eware’ nọ e be tha na.—Rom 10:15.
5. Re ma sai wuhrẹ amọfa ziezi, oghẹrẹ vẹ ma rẹ rehọ Ebaibol na ruiruo?
5 Rọ Ẹro So Ẹme Ọghẹnẹ: Jesu ọ rehọ Ikereakere na ruiruo ziezi evaọ etoke odibọgba riẹ kpobi. Ọ rehọ udu obọriẹ ta ẹme ọvo ho. (Jọn 7:16, 18) Ọ jẹ hai se Ẹme Ọghẹnẹ yọ o fi rie họ iruo rọ thọ oma riẹ evaọ okenọ Setan ọ jẹ dawo iẹe. (Mat. 4:1-4) Re ma sai wuhrẹ amọfa ziezi, ma re se Ebaibol na kẹdẹ kẹdẹ je fi ei họ iruo evaọ uzuazọ mai. (Rom 2:21) Nọ ma tẹ be kiyo enọ evaọ odibọgba na, ma rẹ fodẹ eria Ikere nọ e tha ẹme nọ ma be ta na uke je se ai no Ebaibol na ze oke kpobi nọ o tẹ lọhọ. Ma gwọlọ nọ ohwo nọ ma be ta ẹme kẹ ọ ruẹ nọ orọnikọ ẹme obọ mai ma be ta ha rekọ Ẹme Ọghẹnẹ.
6. Ẹvẹ Jesu ọ sae rọ rehọ uwuhrẹ riẹ nyate udu amọfa?
6 Jọ Uwuhrẹ Ra U Duobọte Ahwo Udu: “Ohwo ọvo ọ re ta ẹme wọhọ ohwo ọnana ha!” (Jọn 7:46) Ere elakpa a ta kpahe Jesu kẹ ilori izerẹ gbe otu Farisi nọ a nọ ae oware nọ a gbe mu Jesu ze he. Orọnikọ Jesu o je dhunu te igogo-eme jọ ọvo evaọ uwuhrẹ riẹ hẹ, rekọ o wuhrẹ ahwo evaọ edhere nọ u je duobọte ai udu. (Luk 24:32) Ọ rehọ eware nọ ahwo a riẹ kpahe rọ kẹ etadhesẹ re a w’otoriẹ eme riẹ. (Mat. 13:34) Orọnikọ Jesu ọ ta eme buobu nọ i re reghe ahwo nọ e jẹ gaviezọ kẹe he. (Jọn 16:12) Ọ kpọ iroro ahwo bru Jihova orọnikọ omobọ riẹ hẹ. Wọhọ Jesu, ma rẹ sae jọ emamọ iwuhrẹ ẹkwoma uwuhrẹ mai nọ ma re muẹrohọ ẹsikpobi.—1 Tim. 4:16.
7. Eme ọ lẹliẹ Jesu thihakọ evaọ odibọgba na?
7 Thihakọ Ghelọ Ababọ Ezọgaviẹ gbe Ọwọsuọ: Dede nọ Jesu o je ru iruo igbunu, ahwo buobu a gaviezọ kẹe he. (Luk 10:13) Makọ ahwo uviuwou obọ Jesu dede, a roro nọ “ọ be mọ oruẹ.” (Mak 3:21) Ghele na, Jesu ọ ruabọhọ iruo na. Ọ gba riẹ mu nọ ọ rẹ ruabọhọ iruo na keme u mu rie ẹro inọ uzẹme nọ o je wuhrẹ ahwo na u re ru ai họ emuyẹ. (Jọn 8:32) Avọ obufihọ Jihova, ma gba riẹ mu no re inọ ma re s’obọ họ họ.—2 Kọr. 4:1.
8, 9. Ẹvẹ ma sae rọ rehọ aro kele Jesu ru inwene fiki emamọ usi na?
8 Ru Inwene nọ I Fo re Whọ Sai w’Obọ Vọvọ: Fiki odibọgba na, Jesu ọ kpairoro vrẹ ekwakwa abọ-iwo nọ e hae wha omosasọ sei. (Mat. 8:20) Ọ ta usiuwoma ababọ eriosehọ, tubẹ ruọ aso dede evaọ ẹsejọ. (Mak 6:35, 36) Jesu ọ riẹ nọ umutho oke o wo nọ o re ro ru iruo odibọgba riẹ gba. Nọ ‘oke nọ u kiọkọ o rẹ kpẹkpẹe’ na, o gwọlọ nọ ma re ru inwene re ma rọ oke mai, ẹgba mai, gbe ekwakwa-efe mai ro ruiruo evaọ aruorokele Jesu.—1 Kọr. 7:29-31.
9 Ileleikristi ikpe-udhusoi ọsosuọ a jọ egbodibo nọ i wo onaa ziezi fikinọ a rọ aro kele Jesu. (Iruẹru 4:13) Ma sai ru odibọgba mai gba re otẹrọnọ ma rọ aro kele Ọgbodibo nọ ọ mae rro kpobi evaọ ikuigbe ohwo-akpọ.—2 Tim. 4:5.