Ẹruorote Abọ-Ezi ọrọ Iwhowho-Uvie nọ E Kwa No Ukoko Rai Kpohọ Ofa
1. (a) Nọ owhowho-uvie ọ tẹ kwa, eme okere-obe ukoko nọ ọ jọ vẹre gbe ọrọ ukoko nọ o kpohọ na a re ru? (b) Ẹvẹ a re ru ileta nọ a re ro dhesẹ owhowho-uvie na? (c) Okevẹ o rọ gwọlọ nọ a re vi ekade owhowho-uvie kpohọ ukoko ofa?
1 Evaọ ẹsejọ, iwhowho-uvie ukoko e rẹ kwa no oria ruọ oria. Re owhowho-uvie nọ ọ kwa na ọ gbẹ sae jọ gaga evaọ abọ-ẹzi, o re mu oma họ ekugbe ukoko nọ o kẹle oria nọ ọ kwa kpohọ na, o ve je dhesẹ oma riẹ kẹ ekpako ukoko yena. (Itẹ 18:1) Otẹrọnọ owhowho-uvie o ti kpohọ erẹ nọ ọ te jọ rria vrẹ emerae esa, ọ rẹ kẹ okere-obe ukoko okpokpọ nọ ọ rrọ na adrẹse ukoko nọ ọ jọ vẹre re okere-obe na ọ sae yare Ekade Iruo Owhowho-Uvie Ukoko na gbe ileta nọ a re ro dhesẹ owhowho-uvie nọ ogbẹgwae iruo ukoko nọ ọ jọ vẹre na a re kere, whobọhọ vi lele ekade na. Otẹrọnọ ọ riẹ odẹ gbe adrẹse ukoko nọ ọ be kwa kpohọ na, ọ rẹ rehọ evuẹ na kẹ okere-obe ukoko nọ o bi ti no no na taure ọ tẹ te kwa. Ogbẹgwae iruo ukoko na a gbe du hẹrẹ bẹsenọ a re kere no ukoko okpokpọ nọ o bi kpohọ na ze taure a te vi ekade riẹ vrẹ hẹ.—Rri A Koko Omai Họ re Ma Ru Oreva Jihova, ẹwẹ-obe avọ 88.
2. Re ekade owhowho-uvie gbe ileta nọ a re kere lele iei na e sai te ukoko okpokpọ na gbẹsinẹdẹ, eme o gwọlọ nọ a re ru?
2 Otẹrọnọ oria nọ ọ kwa kpohọ na u thabọ, a rẹ rọ ẹkwoma uwou-ogha vi ekade na se ukoko okpokpọ riẹ na. Onana u re ru nọ ekade na i je t’obei gbẹsinẹdẹ. Otẹrọnọ ukoko na o kẹle oma, ekpako na a sae rọ ekade na kẹ ekpako ukoko odekọ na. Ekpako ukoko nọ owhowho-uvie na o bi no no na a re fotokọpi ekade na gbe ileta nọ a bi vi lele ekade na, a ve kru enọ a fotokọpi na bẹsenọ a re yo mi ukoko okpokpọ na inọ ekade owhowho-uvie na u te rai obọ no.
3. Ẹvẹ a re ru iyẹrẹ owhowho-uvie nọ ọ kwa kpohọ ukoko ofa nọ ekade riẹ i ri t’obọ họ, kọ eme a re ru nọ ekade riẹ i te kpozi no?
3 Otẹrọnọ ekade na i gbe ri te ukoko okpokpọ na obọ evaọ etoke jọ họ, okere-obe ukoko okpokpọ riẹ na o re rovie ekade ọkpokpọ kẹe he, rekọ o re kru iyẹrẹ usiuwoma ota owhowho-uvie na bẹsenọ ekade na i re tei obọ. Nọ ekade na i te tei obọ no, okere-obe na o ve kere iyẹrẹ usiuwoma ota na fihọ ekade na je ku iyẹrẹ na kpobi kugbe erọ ukoko na evaọ amara yena, nya lele ithubro nọ a kẹ no kpahe epanọ a re ru iyẹrẹ nọ i t’obọ whremu.
4. Ẹvẹ mai kpobi ma sai ro fi obọ họ kẹ ahwo nọ a kwa no ukoko rai kpohọ ofa?
4 Ekpako ukoko, esẹgbini hayo enọ e yọrọ emọ nọ e be kwa kpohọ obọfa, gbe ibe Ileleikristi a rẹ kareghẹhọ iwhowho-uvie nọ e be kwa na oware nọ o gwọlọ nọ a re ru re a sai kuomagbe ukoko okpokpọ rai na ziezi. Ahwo ukoko nọ owhowho-uvie na ọ kwa kpohọ na kpobi, maero kọ ekpako ukoko na a re dhesẹ uvi isiuru kpahe iwhowho-uvie itieye na, daoma riẹ oria nọ a be rria vẹrẹ vẹrẹ je fi obọ họ kẹ ae re ẹkwotọ na o reria ae oma.—Rom. 15:7; 2 Kọr. 6:11-13.