Yọroma kẹ “Imoni Erue”
1. Eme Pọl ukọ na ọ ta kpahe “imoni erue”?
1 Pọl ukọ na o kere inọ use-abọ jọ nọ ọ rẹriẹ ovao dhe wọhọ Oleleikristi o jọ ọza orọ “imoni erue” nọ e ruọ ukoko Ileleikristi na. Ọ ta nọ imoni erue na e rẹ lẹlẹ ruọ ukoko na jẹ wha ọraha fihọ iẹe otẹrọnọ ahwo ukoko na a gbẹ yọroma ha. (2 Kọr. 11:26; Gal. 2:4) O sae jọnọ imoni erue nana e wha idhọvẹ se Pọl gaga.
2. Eme a muẹrohọ no nọ ahwo jọ a bi ru evaọ oke mai nana?
2 Evaọ oke mai nana, ahwo jọ nọ a ta nọ ae omarai yọ Isẹri Jihova a wha uye se inievo-emezae gbe erọ emetẹ mai jọ no. Imoni erue itieye na a sae faki ru wọhọ ẹsenọ oware idudhe jọ o via kẹ ae fikiere ugho o gbẹ rrọ ae obọ họ, hayo ru wọhọ ẹsenọ a be mọ ẹyao, fikiere a gwọlọ ugho nọ a re ro kpohọ ẹsipito. Efa a rẹ sae ta nọ a wo uvẹ iruo ologbo nọ a be kẹ amọfa. Evaọ ẹsejọ, ahwo nọ a be faki ru wọhọ ẹsenọ a rrọ Isẹri Jihova a sae ta nọ oniọvo jọ nọ uye u t’oma ọ gwọlọ obufihọ ugho, a vẹ rọ (e-mail hayo unu gheghe) rọ yare inọ ahwo a vi ugho fihọ ẹkpa-ugho ebanke jọ.
3. Kọ u fo re uyoyou mai kẹ ibe ileleikristi mai u kiekpo evaọ edẹ urere nana? Ru ei vẹ.
3 Nọ ma be nya kodo ruọ edẹ urere eyero eware nana, o gwọlọ nọ uyoyou mai kẹ ibe Ileleikristi mai u ‘he dhe ẹruẹruọ.’ (Fil. 1:9) Ofariẹ, ahwo omuomu gbe otu eviẹhọ a ti no eyoma ruọ onọ o mai yoma. (2 Tim. 3:13) Fikiere, ẹvẹ ma sae rọ yọroma kẹ ahwo otiọye na, rekiyọ ma be daoma nyate owha-iruo Oleleikristi mai nọ ma re ro dhesẹ ohrọriọ kẹ inievo nọ e ginẹ gwọlọ obufihọ?—Mat. 10:16, 17; Jem. 2:15, 16.
4. (a) Fikieme u ro woma re ma yọroma? (b) Ẹvẹ ma sai ro fi ehri-uzi nọ ọ rrọ Job 34:3 họ iruo?
4 O Gwọlọ Oma-Oyọrọ: Dede nọ ma re mu viẹro ku ahwo ho, o gwọlọ nọ ma re wo areghẹ, muẹrohotọ, yọ orọnikọ ‘ẹme kpobi ma rẹ rọwo’ ho, re ahwo iwhayo a siọ omai ba ẹviẹhọ. (Itẹ 14:15) Ebaibol e ta udu họ omai awọ inọ ma roro ziezi kpahe eme nọ ahwo a be ta k’omai viukpenọ ma re mu rọwo ẹme kpobi nọ ma yo. “Ezọ e rẹ dawo ẹme epanọ unu o rẹ dawo emu.” (Job 34:3) Kọ oyena o gbẹ rrọ uzẹme? Wọhọ epanọ ma rẹ dawo emu taure ma te ti si rie lọ na, kọ u gbe fo re ma roro kpahe eme gbe owojẹ ahwo taure ma te ti fi eva họ ae?
5. Eme ma re ru re ma riẹ ohwo nọ ọ ginẹ rrọ omọvo Isẹri Jihova?
5 Eva e rẹ dha uvi oniọvo Oleleikristi mai hi nọ ma tẹ be nọe enọ jọ re ma riẹ sọ uvi oniọvo ọ ginẹ rrọ, hayo sọ uzẹme ọ be ta. Pọl ukọ na ọ kẹ ohrẹ nọ: “Jawo koware koware.” (1 Tẹs. 5:21) A jẹ hae rehọ ẹme Griki nọ Pọl o ro ruiruo nọ a fa “jawo” na rọ t’ẹme re nọ a tẹ be jawo itehru sọ e ginẹ rrọ emamọ. Fikiere, o rrọ oware areghẹ re ma nọ ahwo nọ a nya bru omai ze nọ a ta nọ ae omarai Isẹri Jihova enọ ziezi re ma seba ekiero abọ ahwo eviẹhọ.
6. (a) Nọ ma be make yọroma na, eme ma re gbabọ kẹ hẹ? (b) Fikieme ma re ro fi obọ họ kẹ inievo Ileleikristi mai?
6 Nọ ma tẹ be hai fi obọ họ kẹ uvi inievo Ileleikristi mai, yọ ma bi dhesẹ nọ ma rrọ ‘ogbẹnyusu nọ o vi oniọvo’ rọ kẹ ae. (Itẹ 18:24) Ofariẹ, ae omarai a ti ru epọvo na k’omai re nọ ma tẹ gwọlọ obufihọ. Wọhọ epanọ Luk 6:38 o fi rie họ, a te ‘wawo k’omai oghẹrẹ owawọ nọ ma be wawo kẹ amọfa na.’ Nọ ma bi dhesẹ ẹwo nọ o wuzou gaga evaọ egagọ mai na, j’oma yọroma ẹsikpobi wọhọ epanọ o gwọlọ.—Jem. 1:27.