U Fo re Egbodibo Ileleikristi A Hae Lẹ
1. Re ma sai ru odibọgba mai gba, eme o roja?
1 Ma rẹ sae rehọ ẹgba mai ọvo ru iruo odibọgba na ha. Jihova ọ be k’omai ẹgba nọ ma re ro ru iruo na. (Fil. 4:13) Ọ be rehọ ikọ-odhiwu riẹ fi obọ họ k’omai gwọlọ enọ e wọhọ igodẹ. (Evia. 14:6, 7) Jihova họ ọnọ o re ru ubi uzẹme nọ ma kọ je ku ame ku rro. (1 Kọr. 3:6, 9) O roja gaga re egbodibo Ileleikristi a lẹ se Ọsẹ obọ odhiwu mai kẹ obufihọ!
2. Eware jọ vẹ ma rẹ lẹ kẹ?
2 Rọkẹ Omobọ Mai: U fo re ma lẹ oke kpobi nọ ma te bi kpohọ usiuwoma. (Ẹf. 6:18) Eme ma rẹ lẹ kẹ? Ma rẹ sae lẹ kẹ aruọwha gbe epanọ ma rẹ sae rọ rehọ emamọ ubiẹro rri ahwo ẹkwotọ mai. (Iruẹru 4:29) Ma rẹ sae yare Jihova re ọ kpọ omai bru enọ i wo eva-ezi nọ ma rẹ sai wuhrẹ Ebaibol kugbe. Otẹrọnọ ọnọ ma be ta usiuwoma kẹ ọ n’onọ, ma sae lẹ olẹ okpẹkpẹe heva se Jihova re o fi obọ họ k’omai kẹ emamọ uyo. (Neh. 2:4) Ma sae jẹ lẹ kẹ areghẹ re ma sae rọ iruo odibọgba na karo. (Jem. 1:5) Ofariẹ, eva e rẹ were Jihova nọ ma te yere iei kẹ uvẹ-ọghọ nọ ma rọ rrọ egbodibo riẹ.—Kọl. 3:15.
3. Ẹvẹ amọfa nọ ma rẹ lẹ roro u re ro fi obọ họ evaọ iruo usiuwoma ota na?
3 Rọkẹ Amọfa: Ma rẹ jẹ ‘lẹ kẹ ohwohwo,’ tubẹ fodẹ odẹ ibe Ileleikristi mai evaọ olẹ, nọ u te fo. (Jem. 5:16; Iruẹru 12:5) Kọ ẹyao o bi ru owhẹ nọ whọ gbẹ be sai ro kpohọ usiuwoma ziezi hi? O tẹ rrọ ere, lẹ rọkẹ inievo nọ oma rai o rẹ gaga. Who du roro ho inọ elẹ ra kẹ amọfa e roja ha. U te je fo re ma lẹ kẹ enọ i bi su na re a siọ iruo usiuwoma ota na ba emukpahe, re inievo mai a “ruẹse yere uzuazọ udhedhẹ avọ omofọwẹ.”—1 Tim. 2:1, 2.
4. Fikieme ma jẹ lẹ kẹse kẹse?
4 Ewhowho emamọ usi na evaọ akpọ na soso yọ iruo ilogbo. Rekọ, nọ ma tẹ be “hẹ lẹ kẹse kẹse,” ma ti ru iruo na gba avọ obufihọ Jihova.—Rom 12:12.