Iruo Odibọgba Mai na O Gwọlọ Odiri
1. Ẹvẹ Jihova o ro dhesẹ odiri kẹ ahwo-akpọ no?
1 Ọghẹnẹ o wo odiri kẹ ahwo-akpọ gaga. (Ọny. 34:6; Ol. 106:41-45; 2 Pita 3:9) Oware jọ nọ ma be jọ ruẹ odiri Jihova gaga họ iruo usiuwoma ota nọ ma be jọ akpọ-soso ru na. Jihova ọ rehọ ẹkwoma iruo nana fi obọ họ kẹ ahwo te enwenọ ikpe idu ivẹ no, ghele na yọ o gbe bi si ahwo nọ e gwọlọ gọe rehọ te oma. (Jọn 6:44) Ẹvẹ ma rẹ sae rọ rehọ aro kele odiri Jihova evaọ odibọgba mai.
2. Ẹvẹ ma re ro dhesẹ odiri evaọ ẹkwotọ usiuwoma ota mai?
2 Usiuwoma Ota N’uwou Ruọ Uwou: Ma rẹ rọ aro kele odiri Jihova ẹkwoma usiuwoma ota nọ ma re “seri” riẹ họ họ evaọ ẹkwotọ nọ ahwo a be jọ maki dhesẹ isiuru hu. (Iruẹru 5:42) Ma re thihakọ nọ ahwo a gbẹ maki wo isiuru kpahe iruo mai na ha, bi se omai ẹkoko jẹ wọso omai. (Mak 13:12, 13) Ma re je dhesẹ odiri ẹkwoma ozihebro nọ ma rẹ ruabọhọ nya o tẹ make rọnọ ma bi diọ ahwo nọ a dhesẹ isiuru họ uwou hu.
3. Fikieme o jẹ gwọlọ odiri nọ ma te bi ru izihebro gbe ebe-uwuhrẹ Ebaibol?
3 Ebe-Uwuhrẹ Ebaibol: O rẹ gwọlọ odiri mi omai nọ ma tẹ kọ okakọ. Ma rẹ sae gbẹ ẹbe fihọ iẹe je ku ame ku ei rekọ ma sai ru ei rro vẹrẹ vẹrẹ hẹ. (Jem. 5:7) Epọvo na re, ẹnyaharo abọ-ẹzi o rẹ romavia emẹrera no edhe ruọ edhe. (Mak 4:28) O rẹ sae jọ bẹbẹ kẹ enọ ma bi wuhrẹ kugbe re a nyasiọ iwuhrẹ gbe iruemu egagọ erue ba. Ma rẹ gba emọ-uwuhrẹ mai họ vievie he re a ru inwene. O gwọlọ odiri mi omai re ma sae kẹ ẹzi Ọghẹnẹ uvẹ ziezi re ọ jọ oma ọmọ-uwuhrẹ na ruiruo.—1 Kọr. 3:6, 7.
4. Ẹvẹ odiri ọ sai ro fi obọ họ kẹ omai ta ẹme Ọghẹnẹ kẹ imoni mai nọ e rrọ ukoko ho nọ u je te ai udu?
4 Imoni Mai nọ E Rrọ Ukoko Ho: Dede nọ o rrọ isiuru mai gaga inọ imoni mai nọ e rrọ ukoko ho a wuhrẹ uzẹme na, ma rẹ hẹrẹ bọo ẹruoke nọ u fo nọ ma rẹ rọ ta eware nọ ma rọwo kẹ ae, jẹ yọroma re ma siọ ae eware ba ewuhrẹ bu hrọ ẹsiẹvo. (Ọtausi. 3:1, 7) Nọ ma be hẹrẹ na, ma re dhesẹ emamọ uruemu, jẹ ruẹrẹ oma kpahe re ma rehọ udu udhedhẹ avọ omaurokpotọ ta eware nọ ma rọwo. (1 Pita 3:1, 15) Ababọ avro, nọ ma te bi dhesẹ odiri evaọ odibọgba mai ẹsiẹe ma te mai wo emamọ iyẹrẹ, yọ o te were Ọsẹ obọ odhiwu mai.